ສຳນັກຂ່າວຕ່າງປະເທດລາຍງານວ່າ ພູເຂົາໄຟ ເອດນາ ເທິງເກາະຊີຊີລີ ຂອງປະເທດອິຕາລີ ເຊິ່ງເປັນພູເຂົາໄຟທີ່ເຄື່ອນໄຫວຫຼາຍທີ່ສຸດໃນເອີຣົບ ໄດ້ປະທຸຂຶ້ນໃນຊ່ວງຕອນເຊົ້າວັນຈັນທີ 24 ທັນວາ 2018 ຕາມເວລາທ້ອງຖິ່ນ ຂະນະດຽວກັນມີລາຍງານມັກມາໄຫຼລົ້ນອອກມາຈາກຮອຍແຕກບໍລິເວນປ່ອງພູເຂົາໄຟທາງທິດຕາເວັນອອກສຽງເໜືອ ແລະ ເກີດແຜ່ນດິນໄຫວໃນພື້ນທີ່ດຽວກັນຫຼາຍກວ່າ 130 ຄັ້ງໃນເວລາພຽງ 3 ຊົ່ວໂມງ ໂດຍມີຄວາມຮຸນແຮງສູງສຸດຢູ່ທີ່ 4.3 ແມັກນິຈູ
https://twitter.com/LFiannacca/status/1077216024091611137
ທີມສັງເກດການພູເຂົາໄຟເອດນາລະບຸວ່າການປະທຸຂອງພູເຂົາໄຟເຮັດໃຫ້ເກີດຮອຍແຍກໃໝ່ທາງທິດຕາເວັນອອກສຽງໃຕ້ຂອງພູເຂົາໄຟ ແລະ ມີມັກມາໄຫຼອອກມາ ຂະນະທີ່ນັກພູເຂົາໄຟວິທະຍາທ້ອງຖິ່ນກວ່າວ່າ ນີ້ເປັນຄັ້ງທຳອິດໃນຮອບກວ່າທົດສະວັດທີ່ມີການປະທະຂອງພູເຂົາໄຟຫຼາຍທີ່ສຸດ.
ພູເຂົາໄຟເອດນາ ເທິງເກາະຊີຊີລີ ເປັນພູເຂົາໄຟທີ່ສູງທີ່ສຸດໃນທະວີບເອີຣົບ ດ້ວຍຄວາມສູງ 3.323 ແມັດ ໄດ້ປະທຸພົ່ນມັກມາ, ຖ່ານໄຟ ແລະ ຄວັນອອກມາ ຈົນເຮັດໃຫ້ຕ້ອງມີການປິດສະໜາມບິນຊົ່ວຄາວ ໃນເມືອງ ກາຕາເນຍ.
ເນື່ອງຈາກເຫດການປະທຸຂອງພູເຂົາໄຟເອດນາຕໍ່ມາໃນເວລາ 03.19 ນາທີ ຂອງເຊົ້າວັນທີ 26 ທັນວາ 2018 ເກີດມີແຜ່ນດິນໄຫວ ຂະໜາດ 4.8 ແມັກນິຈູ ສັ່ນສະເທືອນເກາະຊີຊີລີ ເກາະທີ່ໃຫຍ່ທີ່ສຸດໃນທະເລເມດິເຕເຣນຽນ ເຊິ່ງເປັນດິນແດນປົກຄອງຕົນເອງອິຕາລີ ເປັນເຫດໃຫ້ຜູ້ຄົນແຕກຕື່ນຕົກໃຈ ແລ່ນອອກຈາກອາຄານເຮືອນຊານມາຢູ່ກາງຖະໜົນຫົນທາງ ເນື່ອງຈາກແຜ່ນດິນສັ່ນສະເທືອນຢ່າງຮຸນແຮງ ຂະນະທີ່ອາຄານບ້ານເຮືອນໄດ້ຮັບຄວາມເສຍຫາຍ ແລະ ມີຜູ້ຮັບບາດເຈັບປະມານ 30 ຄົນ, ທາງເຈົ້າໜ້າທີ່ອິຕາລີລະບຸວ່າ ສູນກາງແຜນດິນໄຫວມີຄວາມເລິກຈາກໜ້າດິນປະມານ 1 ກິໂລແມັດເທົ່ານັ້ນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ, ຮູບປະກອບ : khaosod, thairath,
ວິດີໂອຈາກ Twitter : Laura Fiannacca