ກົມອຸຕຸນິຍົມ ແລະ ອຸທົກກະສາດຄາດຄະເນສະພາບອາກາດໃນໄລຍະວັນທີ 24-30 ທັນວາ 2018ວ່າ ຄວາມກົດດັນອາກາດສູງຂອງອາກາດໜາວເຢັນຍັງຈະສືບຕໍ່ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງອ່ອນ ຫາ ປານກາງ, ສົມທົບກັບກະແສລົມຕາເວັນອອກ – ຕາເວັນອອກສຽງເໜືອພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດເຢັນພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າແຕ່ລະພາກ ແລະ ອາກາດຍັງຈະໜາວເຢັນຢູ່ແຂວງພາກເໜືອ, ເຂດພູສູງ, ຮ່ອມພູ, ແຂວງ ໄຊສົມບູນ ແລະ ເຂດພູພຽງບໍລິເວນ. ພ້ອມມີໝອກໜາປົກຫຸ້ມຢູ່ບາງທ້ອງຖິ່ນ. ສະເພາະຢູ່ແຂວງພາກກາງ ແລະ ພາກໃຕ້ອາກາດຍັງຈະຮ້ອນໃນຕອນກາງເວັນ, ຈາກນັ້ນໃນວັນທີ 28-30 ທັນວາ 2018 ຄວາມກົດດັນສູງຂອງອາກາດເຢັນຈາກປະເທດຈີນຈະມີທ່າອ່ຽງເພີ່ມກຳລັງແຮງຂຶ້ນແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ແລະ ກະແສລົມຕາເວັນອອກສຽງເໜືອຍັງສືບຕໍ່ພັດປົກຄຸມເປັນສ່ວນໃຫຍ່, ຈະເຮັດໃຫ້ມີຝົນຕົກໃນລະດັບຄ່ອຍຢູ່ບາງທ້ອງຖິ່ນໃນແຕ່ລະພາກ ແລະ ອຸນຫະພູມອາກາດຈະຫຼຸດລົງ 2-4 ອົງສາ ພ້ອມຈະມີລົມພັດແຮງເປັນບາງໂອກາດ.
ພາກເໜືອດ້ານຕາເວັນອອກ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມຢູ່ທົ່ວໄປ ແລະ ໝອກໜາປົກຫຸ້ມເຂດພູສູງ, ຮ່ອມພູ ພ້ອມມີລົມພັດແຮງຢູ່ບາງທ້ອງຖິ່ນ ຈາກນັ້ນໃນວັນທີ 28-30 ທັນວາ 2018 ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງ ຜົ້ງສາລີ, ຫົວພັນ ແລະ ຊຽງຂວາງ, ອາກາດຈະໜາວເຢັນ ຫາ ໜາວຫຼາຍ.
ພາກເໜືອດ້ານຕາເວັນຕົກ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມຢູ່ທົ່ວໄປ ແລະ ໝອກໜາປົກຫຸ້ມເຂດພູສູງ, ຮ່ອມພູ, ຈາກນັ້ນວັນທີ 28-30 ທັນວາ 2018 ອຸນຫະພູມອາກາດຈະເຢັນລົງ 2-4 ອົງສາ ແລະ ຈະມີຝົນຕົກໃນລະດັບຄ່ອຍພ້ອມມີລົມພັດແຮງເປັນບາງໂອກາດ.
ພາກກາງ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມໃນຕອນເຊົ້າ ຈາກນັ້ນວັນທີ 27 – 30 ທັນວາ 2018 ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງວຽງຈັນ. ບໍລິຄຳໄຊ, ຄຳມ່ວນ ແລະ ສະຫວັນນະເຂດ ອຸນຫະພູມຈະຫຼຸດລົງ 1-3 ອົງສາ.
ສະເພາະແຂວງໄຊສົມບູນ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມໃນຕອນເຊົ້າ, ຈາກນັ້ນວັນທີ 28 – 30 ທັນວາ 2018 ອາກາດຈະໜາວເຢັນລົງ 2-4 ອົງສາ.
ພາກໃຕ້: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມໃນຕອນເຊົ້າ ສ່ວນໃນຕອນກາງເວັນອາກາດຮ້ອນ, ຈາກນັ້ນວັນທີ 28-30 ທັນວາ 2018 ອາກາດຈະເຢັນລົງ 1-3 ອົງສາ ພ້ອມຈະມີຝົນຕົກຢູ່ໃນລະດັບຄ່ອຍຢູ່ບາງທ້ອງຖິ່ນແຂວງ ຈຳປາສັກ, ສາລະວັນ, ເຊກອງ ແລະ ອັດຕະປື.
ສະເພາະເຂດພູພຽງບໍລະເວນ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມໃນຕອນເຊົ້າ, ຈາກນັ້ນວັນທີ 28-30 ທັນວາ 2018 ອາກາດຈະເຢັນ ຫາ ໜາວເຢັນຫຼາຍອຸນຫະພູມຈະຫຼຸດລົງ 2-4 ອົງສາ ພ້ອມຈະມີຝົນຕົກໃນລະດັບຄ່ອຍຢູ່ບາງບໍລິເວນ.
ນະຄອນຫຼວງວຽງຈັນ: ໃນໄລຍະວັນທີ 24-27 ທັນວາ 2018 ອາກາດຈະໜາວເຢັນ, ພ້ອມມີໝອກບາງປົກຫຸ້ມໃນຕອນເຊົ້າ ສ່ວນຕອນກາງເວັນອາກາດຮ້ອນ, ຈາກນັ້ນວັນທີ 28-30 ທັນວາ 2018 ອາກາດຈະເຢັນລົງ 1-3 ອົງສາ ພ້ອມຈະມີຝົນຕົກໃນລະດັບຄ່ອຍຢູ່ບາງບໍລິເວນ ແລະ ມີລົມພັດແຮງເປັນບາງໂອກາດ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ