ຈາກອະດິດເຖິງປັດຈຸບັນ ເຕັກໂນໂລຊີ ຂອງມະນຸດມີການພັດທະນາຢູ່ສະເໜີ ເຮັດໃຫ້ທຸກມື້ຈະມີເຕັກໂນໂລຊີໃໝ່ໆມາອໍານວຍຄວາມສະດວກໃນການເປັນຢູ່ດີຂຶ້ນ. ເຊັ່ນ AI ຫຼື Artificial Intelligence (ປັນຍາປະດິດ) ເຊີ່ງສາມາດໃຊ້ສຽງສັ່ງການ ຫຼື ເວົ້າກັບຄອມພິວເຕີໄດ້ໂດຍກົງ, ແຕ່ຈະເປັນແນວໃດເມື່ອ AI ທີ່ເຮົາຕ້ອງການໃຊ້ປະໂຫຍດພັດສົ່ງສຽງຕອບໂຕ້ກັບມາວ່າ: “ຈົ່ງຂ້າພໍ່ແມ່ບຸນທໍາຂອງເຈົ້າສາ”.
ສໍານັກຂ່າວ Reuters ລາຍງານວ່າ ມີລູກຄ້າຄົນໜຶ່ງຖືກ AI ຊື່ Alexa ຊີ່ດັງຂອງ Amazon ສົ່ງສຽງບອກວ່າ: “ຈົ່ງຂ້າພໍ່ແມ່ບຸນທໍາຂອງເຈົ້າສາ”. ໂດຍມີການຄາດວ່າ Alexa ໄປຮຽນຮູ້ປະໂຫຍກດັ່ງກ່າວມາຈາກ Reddit ແລະ ນໍາມາໃຊ້ໂດຍທີ່ບໍ່ໄດ້ຮັບການວິເຄາະເຖິງບໍລິບົດກ່ອນ.
ຫຼັງຈາກເກີດເຫດການດັ່ງກ່າວ , ຕົວແທນຂອງ Amazon ກໍໄດ້ອອກມາຍອມຮັບຂໍ້ຜິດພາດ ໂດຍກ່າວວ່າ: “Alexa ໃຊ້ຂໍ້ມູນຈາກອິນເຕີເນັດເພື່ອພັດທະນາຕົວຕົນຂອງມັນ ດັ່ງນັ້ນ, ຈຶ່ງມີໂອກາດທີ່ Socialbot ຂອງເຮົາຈະຮຽນຮູ້ສິ່ງຕ່າງໆ ຈາກບາງສິ່ງທີ່ບໍ່ເໝາະສົມ. ມີລຸູກຄ້າທີ່ໃຊ້ງານ Socialbot ເປັນລ້ານໆຄົນ ແຕ່ກໍລະນີແບບນີ້ຖືວ່າເປັນກໍລະນີທີ່ບໍ່ໄດ້ເກີດຂຶ້ນເລື້ອຍໆປານໃດ” ຕົວແທນຂອງ Amazon ກ່າວ. ແນວໃດກໍຕາມ Alexa ແມ່ນເຮັດສິ່ງແປກໆ ບໍ່ແມ່ນເທື່ອທໍາອິດ ເພາະໃນເດືອນ ພຶດສະພາ ຜ່ານມາ ມີຊາຍຄົນໜຶ່ງຈາກປະເທດ ເຢຍລະມັນ ເວົ້າວ່າ: “ໄດ້ຮັບໄຟລ໌ແນບສຽງກວ່າ 1.700 ໄຟລ໌ທີ່ Alexa ບັນທຶກມາຈາກຄົນແປກໜ້າໄວ້ “.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: catdumb.com