ສຳນັກຂ່າວຣອຍເຕີລາຍງານວ່າ ເມື່ອວັນທີ 22 ທັນວາ 2018 ທີ່ຜ່ານມາ ທ່ານ ນາງ ຄຣິສເທຍ ຟຣີແລນ ລັດຖະມົນຕີກະຊວງການຕ່າງປະເທດການາດາ ອອກມາເປີດເຜີຍວ່າ ໃນອີກບໍ່ພໍເທົ່າໃດມື້ຕໍ່ໜ້າການາດາຈະເດີນໜ້າຂໍແຮງສະໜັບສະໜູນຈາກບັນດາພັນທະມິດ ໃນການກົດດັນໃຫ້ຈີນປ່ອຍຕົວຊາວການາດາ 2 ຄົນທີ່ຖືກຈັບໄປ ຫຼັງຈາກທີ່ສະຫະລັດອອກມາສະແດງພະລັງສະໜັບສະໜູນການາດາ ໃນການຮຽກຮ້ອງໃຫ້ຈີນປ່ອຍຕົວຊາວການາດາ 2 ຄົນ ຄື: ທ່ານ ໄມເຄິລ ໂຄຣິກ ອະດີດນັກການທູດການາດາປະຈໍາສປ ຈີນ ແລະ ທ່ານ ໄມເຄິລ ສປາວໍ ນັກທຸລະກິດຊາວການາດາ ທີ່ເຊື່ອວ່າຖືກຈີນຈັບກຸມຕົວເພື່ອຕອບໂຕ້ກໍລະນີທີ່ການາດາຈັບກຸມຕົວລູກສາວປະທານບໍລິສັດ ຫົວເວີ່ຍ.
ໂດຍນອກຈາກທີ່ສະຫະລັດອອກມາສະໜັບສະໜູນການາດາແລ້ວຍັງມີອັງກິດ ແລະ ສະຫະພາບເອີຣົບ (ອີຢູ) ເຊິ່ງທ່ານ ນາງ ຟຣີແລນ ກ່າວກັບຜູ້ສື່ຂ່າວໃນລະຫວ່າງການຖະແຫຼງຂ່າວທາງໄກວ່າ “ໃນອີກບໍ່ພໍເທົ່າໃດມື້ຕໍ່ໜ້າຕົນພ້ອມກັບເອກອັກຄະຣາຊທູດການາດາທົ່ວໂລກ ຈະລົມກັບນານາປະເທດໃນເລື່ອງດັ່ງກ່າວ ແລະ ເຖິງແມ່ນວ່າທາງການຈີນຈະປະຕິເສດວ່າການຄວບຄຸມຕົວຊາວການາດາ 2 ຄົນ ບໍ່ໄດ້ເຊື່ອມໂຍງກັບການທີ່ການາດາຈັບກຸມຕົວທ່ານ ນາງ ເມິ່ງ ເມື່ອວັນທີ 1 ທັນວາ ຢ່າງໃດກໍຕາມ”.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: matichon.co.th