ສປປ ລາວ ກໍາລັງຈະມີສູນວັດແທກ ເຕືອນໄພພິບັດຂອງເຂື່ອນໄຟຟ້າ, ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ເຊັນບົດບັນທຶກຄວາມເຂົ້າໃຈ (MOU) ກັບ ບໍລິສັດ ອິເຕີເນເຊີນນໍ ຊິດສ์ເຕັມ ລາວ ຈໍາກັດ ລົງນາມບົດ ກ່ຽວກັບການສຶກສາຄວາມເປັນໄປໄດ້ໃນການສ້າງສູນວັດແທກ ເຕືອນໄພພິບັດຂອງເຂື່ອນໄຟຟ້າໃນ ສປປ ລາວ ເພື່ອຕອບສະໜອງຄວາມຮຽກຮ້ອງຕ້ອງການແກ້ໄຂປະກົດການຫຍໍ້ທໍ້ ແລະ ປົກປ້ອງຊີວິດການເປັນຢູ່ຂອງປະຊາຊົນລາວ ພ້ອມທັງຮັບປະກັນຄຸນນະພາບ, ຖືກຕ້ອງຕາມມາດຕະຖານແຫ່ງຊາດ ແລະ ສາກົນ.
ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ກ່າວວ່າ: ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມໃນການແກ້ໄຂປະກົດການຫຍໍ້ທໍ້ ແລະ ປະຊາຊາຊົນລາວທົ່ວປະເທດ ພ້ອມທັງຮັບປະກັນຄຸນນະພາບ, ຖືກຕ້ອງກັບມາດຕະຖານແຫ່ງຊາດ ແລະ ມາດຕະຖານສາກົນ. ການຈັດຕັ້ງປະຕິບັດວຽກງານດັ່ງກ່າວ, ເປັນການປະກອບສ່ວນຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດສັງຄົມ 5 ປີຄັ້ງທີ VIII (2016-2020) ຂອງ ສປປ ລາວ ໃຫ້ປະກົດຜົນເປັນຈິງ. ສະນັ້ນ, ກົມມາດຕະຖານ ແລະ ວັດແທກ ຈຶ່ງໄດ້ປະສານສົມທົບກັບບັນດາພາກສ່ວນທີ່ກ່ຽວຂ້ອງກະກຽມເງື່ອນໄຂຄື: ດ້ານນິຕິກໍາໃຫ້ມີການສ້າງສູນວັດແທກ ເຕືອນໄພພິບັດ ຂອງເຂື່ອນໄຟຟ້າໃນ ສປປ ລາວ; ພັດທະນາຊັບພະຍາກອນມະນຸດ ແລະ ຈັດເຝິກອົບຮົມກ່ຽວກັບວຽກງານວິຊາການໃຫ້ມີຄວາມຊ່ຽວຊານດ້ານວິຊາສະເພາະ ແລະ ເຜີຍແຜ່ໃຫ້ພາກລັດ-ເອກະຊົນຮັບຊາບ; ມີການຈັດຫາວິຊາການ, ອຸປະກອນ ແລະ ຄູ່ມືຢ່າງມີປະສິດທິພາບໃນການຮັບຮອງວຽກງານດັ່ງກ່າວ.
ພິທີດັ່ງກ່າວ, ຈັດຂຶ້ນໃນວັນທີ 18 ທັນວາ 2018, ຕາງໜ້າຮ່ວມລົງນາມບົດບັນທຶກຄວາມເຂົ້າໃຈ (MOU) ໂດຍທ່ານ ວຽງທອງ ວົງທະວີໄລ ຫົວໜ້າກົມມາດຕະຖານ ແລະ ວັດແທກ ກະຊວງ ກວຕ, ທ່ານ ກະດິງທອງ ສິງດາລາ ຫົວໜ້າສູນວັດແທກ ແລະ ທ່ານ ອາລີວັນ ສີທາລາ ປະທານບໍລິສັດ ບໍລິສັດ ອິເຕີເນເຊີນນໍ ຊິດສ์ເຕັມ ລາວ ຈໍາກັດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ກະຊວງວິທະຍາສາດ ແລະເຕັກໂນໂລຊີ, laoedaily.com.la
ຮູບພາບຈາກ: ກະຊວງວິທະຍາສາດ ແລະເຕັກໂນໂລຊີ