ເມື່ອວັນທີ 22 ທັນວາ 2018 CNN ລາຍງານສະຖານະການຊັດດາວ ຂອງໜ່ວຍງານລັດຖະບານສະຫະລັດອີກຄັ້ງ ຫຼັງຈາກວຸດທິສະພາລົງຄວາມເຫັນບໍ່ອະນຸມັດຮ່າງກົດໝາຍງົບປະມານຂອງ ປະທານາທິບໍດີ ໂດນັລ ທຣໍ້າ ເຊິ່ງຮວມເຖິງງົບປະມານໃນການກໍ່ສ້າງກຳແພງກັ້ນຊາຍແດນສະຫະລັດ-ເມັກຊິກ ທີ່ມີມູນຄ່າສູງເຖິງ 5.700 ລ້ານໂດລາ ສົ່ງຜົນໃຫ້ໜ່ວຍງານພາກລັດບາງສ່ວນຕ້ອງປິດລົງຕັ້ງແຕ່ຄໍ່າຄືນຂອງວັນທີ 22 ທັນວາ 2018 ຕາມເວລາທ້ອງຖິ່ນ. ນີ້ຖືເປັນຄັ້ງທຳອິດໃນຮອບ 40 ປີ ທີ່ສະຫະລັດມີການຊັດດາວ 3 ຄັ້ງໃນຊ່ວງເວລາພຽງປີດຽວ.
ສຳນັກຂ່າວກາຣ໌ດຽນລະບຸວ່າ ຜົນກະທົບຈາກການຊັດດາວຈະເຮັດໃຫ້ເຈົ້າໜ້າທີ່ໃນສັງກັດລັດຖະບານກາງປະມານ 800.000 ຄົນບໍ່ໄດ້ຮັບຄ່າຈ້າງ, ກວ່າ 380.000 ຄົນ ຕ້ອງຢຸດງານຊົ່ວຄາວ ແລະ ຈະມີເຈົ້າໜ້າທີ່ໃນໜ່ວຍງານສຳຄັນທີ່ຕ້ອງເຮັດວຽກໂດຍບໍ່ໄດ້ຮັບຄ່າຈ້າງໃນຊ່ວງເວລາຊັດດາວ ໄດ້ແກ່ເຈົ້າໜ້າທີ່ກວດສອບຂອງສຳນັກງານຄວາມປອດໄພດ້ານການຂົນສົ່ງແຫ່ງສະຫະລັດ, ເຈົ້າໜ້າທີ່ກວດສອບສ່ວນກາງ ແລະ ເຈົ້າໜ້າທີ່ລາດຕະເວນຊາຍແດນ.
ຂະນະທີ່ທ່ານ ທຣໍ້າ ກ່າວວ່າວຸດທິສະພາພັກຣີພັບບລິກັນບໍ່ສາມາດເຮັດຫຍັງໄດ້ “ຈະຮຽກວ່າການຊັດດາວຂອງເດໂມແຄຣດ ຫຼື ແມ່ນຫຍັງກໍ່ຕາມທີ່ພວກເຈົ້າເອີ້ນ ແຕ່ເຮົາບໍ່ຈຳເປັນຮັບຄວາມຊ່ວຍເຫຼືອຈາກພວກເຂົາ” ພ້ອມຮຽກຮ້ອງໃຫ້ທ່ານ ມິດຊ໌ ແມດຄອນເນລ ຜູ້ນຳພັກຣີພັບບລິກັນໃນວຸດທິສະພາ ໃຫ້ໃຊ້ມາດຕະການທີ່ຮຽກວ່າ “ທາງເລືອກລະເບີດນິວເຄຣຍ” ຄືອາໄສສຽງສ່ວນຫຼາຍແທນກຳນົດສຽງເຫັນດີທີ່ຕ້ອງມີຢ່າງໜ້ອຍ 60 ສຽງຂຶ້ນໄປ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: khaosod.co.th