ສະຖາບັນ ນິຕິບັນຍັດ ສປ ຈີນ ກໍາລັງພິຈາລະນາອອກກົດໝາຍໃໝ່ ເພື່ອວາງກົດລະບຽບການລົງທຶນຂອງປະເທດໃນ ສປ ຈີນ ເຊິ່ງຈະເປັນການປັບປຸງກົດໝາຍທີ່ມີແລ້ວໃຫ້ມີປະສິດທິພາບສູງສຸດ ແລະ ປ້ອງກັນການບັງຄັບຕ່າງປະເທດທີ່ຖ່າຍທອດເຕັກໂນໂລຊີ.
ສໍານັກຂ່າວ AFP ລາຍງານຈາກນະຄອນຫຼວງປັກກິ່ງ ສປ ຈີນ ໃນວັນທີ 23 ທັນວ່າ 2018 ວ່າ ກົດໝາຍລວມ ຈະໃຊ້ແທນກົດໝາຍ 3 ສະບັບທີ່ມີຢູ່ໃນປັດຈຸບັນຄື: ການລົງທຶນຮ່ວມຫຸ້ນຈີນ-ຕ່າງປະເທດ, ການຮ່ວມລົງທຶນໂດຍບໍ່ໃຊ້ຫຸ້ນ ແລະ ການລົງທຶນໂດຍທຸລະກິດທີ່ຕ່າງປະເທດເປັນເຈົ້າຂອງທັງໝົດ.
ຮ່າງກົດໝາຍດັ່ງກ່າວ, ຖືກສະເໜີຕໍ່ກອງປະຊຸມຄະນະກໍາມະການປະຈໍາຂອງສະພາປະຊາຊົນ ແຫ່ງຊາດຈີນ (MPC) ເຊິ່ງໄດ້ເລີ່ມປະຊຸມໃນອາທິດທີ່ແລ້ວ. ເມື່ອກົດໝາຍສະບັບໃໝ່ມີຜົນບັງຄັບໃຊ້ ຈະມີກໍານົດຫ້າມລັດຖະບານທ້ອງຖິ່ນຈໍາກັດການເຂົ້າເຖິງຕະຫຼາດສໍາລັບບໍລິສັດຕ່າງປະເທດ ແລະ ຫ້າມບັງຄັບບໍລິສັດຕ່າງຊາດໃຫ້ຖ່າຍທອດເທັກໂນໂລຊີ ເຊິ່ງຈະເປັນການຮັບປະກັນວ່ານັກລົງທຶນຕ່າງປະເທດ ຈະມີສິດທິທຽບເທົ່າກັບນັກລົງທຶນຈີນເກືອບທຸກພາກ ຍົກເວັ້ນບາງພາກທີ່ຖືກແຍກໃຫ້ຢູ່ໃນບັນຊີລົບ.
ຖະແຫຼ່ງການກ່ຽວກັບການປະຊຸມຂອງຄະນະກໍາມະການປະຈໍາ ໄດ້ເຜີຍແຜ່ເວັບໄຊສ໌ AAPC ວ່າ: ເພື່ອຂະຫຍາຍການເປີດກວ້າງອອກໄປ ລວມທັງສົ່ງເສີມການລົງທຶນຂອງຕ່າງປະເທດ, ເພື່ອປົກປ້ອງສິດທິ ແລະ ຜົນປະໂຫຍດອັນຊອບທໍາໃນການລົງທຶນຂອງຕ່າງປະເທດ ແລະ ສົ່ງເສີມການເປີດກວ້າງຢ່າງຮອບດ້ານໃນຮູບແບບໃໝ່ ຕາມທີ່ຄະນະລັດຖະມົນຕີ ໄດ້ສະເໜີຮ່າງກົດໝາຍ ເຊິ່ງເປັນການສົ່ງສັນຍານວ່າ ຈີນໃຫ້ການສະໜັບສະໜູນຕໍ່ເສດຖະກິດຫຼາຍຂຶ້ນ.
ຈາກຂໍ້ມູນທາງເສດຖະກິດສະແດງໃຫ້ເຫັນວ່າ ເສດຖະກິດຈີນເຊື່ອມລົງໃນຊ່ວງລະດູການໃບໄມ້ຫຼົ່ນປີນີ້, ການໃຊ້ຈ່າຍຂອງຜູ້ບໍລິໂພກເຕີບໂຕຊ້າສຸດໃນຮອບ 15 ປີ ໃນຊ່ວງເດືອນ ພະຈິກ ແລະ ບັນດາໂຮງງານຕ່າງກໍລໍຖ້າການຜະລິດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th
ຮູບພາບຈາກ: coindesk.com