ສໍານັກຂ່າວຈາກ AFP ລາຍງານຈາກປະເທດອິນໂດເນເຊຍ ວັນທີ 20 ທັນວາ 2018 ວ່າ ເດັກຊາຍ ມູຄລິສ ໂຮລິດ ອາຍຸພຽງ 8 ປີ ເປັນນັກຮຽນ ປ 3 ທີ່ມີຮ່າງກາຍພິການຂາລີບນ້ອຍ, ລາວສູງພຽງແອວຂອງໝູ່ເພື່ອນເທົ່ານັ້ນ ໂດຍອາໄສຢູ່ກັບແມ່ໃນເຮືອນຫຼັງນ້ອຍໃນໝູ່ບ້ານແຫ່ງໜຶ່ງ ແຂວງ ເວສຊວາ ປະເທດ ອິນໂດເນເຊຍ. ແຕ່ລະມື້, ລາວຕ້ອງຍ່າງໄປໂຮງຮຽນໃນໄລຍະເວລາ 6 ກິໂລແມັດ ຍ່າງຜ່ານເສັ້ນທາງທີ່ມີພູ ແລະ ຂົວໄມ້ເກົ່າໆ ດ້ວຍສອງມືທີ່ໃສ່ເກີບແຕະເອົາໄວ້ສໍາລັບກັນຄວາມຮ້ອນຈາກພື້ນ ຂະນະທີ່ຕີນຂອງລາວມີເກີບໃສ່ຄືກັນ ແຕ່ກໍລອຍຢູ່ກາງອາກາດ ພ້ອມກັບພາຍຖົງທາງຫຼັງ.
ເລື່ອງລາວຂອງເດັກຊາຍ ໂຮລິດ ເປັນທີ່ໜ້າປະທັບໃຈຂອງຜູ້ຄົນທີ່ກໍາລັງສູ້ຊີວິດ ເຖິງຮ່າງກາຍຈະພິການ ສ້າງຄວາມປະທັບໃຈໃຫ້ຄົນອິນໂດເນເຊຍທີ່ມີປະຊາກອນ 260 ລ້ານຄົນ ຈົນສົ່ງຜົນເຮັດໃຫ້ ໂຮລິດ ມີໂອກາດເຂົ້າພົບປະທານາທິບໍດີ ໂຈໂຄ ວິໂດໂດ ຫຼັງສື່ມວນຊົນໄດ້ນໍາສະເໜີເລື່ອງລາວດັ່ງກ່າວ. ແມ່ຂອງ ໂຮລິດບອກວ່າ: “ລູກຊາຍຍັງຍ່າງໄປໂຮງຮຽນທຸກມື້ ຖ້າມີເງີນຈະຈ້າງລົດຈັກຮັບຈ້າງໄປສົ່ງລາວທີ່ໂຮງຮຽນ ແຕ່ລູກຊາຍບໍ່ໄດ້ຈົ່ມຫຍັງທັງສິ້ນ ບໍ່ວ່າຝົນຈະຕົກ ຫຼື ແດດຈະຮ້ອນປານໃດ ລາວກໍຍັງໄປໂຮງຮຽນກັບໝູ່ທຸກມື້”.
ໂຮລິດ ມີໂອກາດພົບກັບປະທານາທິບໍດີ ໂຈໂຄ ວິໂດໂດ ວັນທີ 3 ທັນວາ ທີ່ຜ່ານມາ ກົງກັບວັນພິການສາກົນ ເຊິ່ງ ວິໂດໂດ ໄດ້ເປີດເຜີຍວ່າ: “ໄດ້ຖາມ ໂຮລິດ ວ່າຢາກໄດ້ຫຍັງຫຼືບໍ່ (ຄິດວ່າລາວຄົງຈະຢາກໄດ້ຂອງຂວັນ) ແຕ່ຄໍາຕອບຄື ລາວບໍ່ຕ້ອງການຫຍັງ ມີພຽງບອກວ່າຕ້ອງການຮຽນຮອດມະຫາວິທະຍາໄລ ແລະ ມີຄວາມສຸກທີ່ໄດ້ພົບກັບປະທານາທິບໍດີ ວິໂດໂດ ເຊິ່ງເປັນໄອດໍ້ຂອງລາວ. ໂຮລິດ ໄດ້ບອກວ່າຕົນຕື່ມວ່າມີຄວາມຝັນຫຼາຍຢ່າງ ທັງຢາກເປັນນັກດັບເພີງ, ເປັນໝໍ ແລະ ນັກບິນອາວະກາດ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: dailynews.co.th