ສໍານັກຂ່າວ AFP ລາຍງານໃນວັນທີ 20 ທັນວາ 2018 ວ່າ ກອງທັບມຽນມາປະກາດປະຕິບັດການກວດລ້າງຮອບໃໝ່ ໃນພື້ນທີ່ ລັດຍະໄຂ່ ເນື່ອງຈາກຊາວພຸດ 4 ຄົນຖືກທໍາຮ້າຍ ເຊິ່ງໃນນັ້ນ ມີຜູ້ເສຍຊີວິດ 2 ຄົນ. ເຫດເກີດມາຈາກການໂຈມຕີທີ່ເກີດຂຶ້ນບໍລິເວນຫ້ວຍປິວມາ ລັດຍະໄຂ່ ໂດຍເຊື່ອວ່າເປັນສີມີຂອງໂຣຮິນຈາ ຊົນເຜົ່າກຸ່ມນ້ອຍຊາວມຸດສະລິມໃນມຽນມາ. ການກວດລ້າງຄັ້ງນີ້, ກອງທັບມຽນມາ ຊີ້ວ່າ: “ຊາວໂຣຮີນຈາ ປະມານ 700,000 ຄົນຕ້ອງໜີໄພຄວາມຮຸນແຮງໄປປະເທດເພື່ອນບ້ານ”.
ຄໍາຖະແຫຼງການຂອງ ພົນເອກອາວຸໂສ ມິນ ອ່ອງ ລາຍ ຜູ້ບັນຊາການກອງທັບມຽນມາ ເຊິ່ງໂພສຜ່ານເວັບໄຊ້ທາງການຂອງມື້ດຽວກັນ ລະບຸວ່າ: “ກອງກໍາລັງຝ່າຍຄວາມໝັ້ນຄົງອອກເຄື່ອນໄຫວອີກຄັ້ງ ແລະ ຈະດໍາເນີນການກວດລ້າງໃນບໍລິເວນຫ້ວຍປິວມາ ເນື່ອງຈາກເກີດເຫດການຊາຍຊາວພຸດໃນລັດຍະໄຂ່ 2 ຄົນໄປຊອກປາໃນຫ້ວຍປິວມາ ແລະ ບໍ່ໄດ້ກັບມາ ເຊິ່ງຫຼັງຈາກນັ້ນ ກໍພົບເຫັນສົບຂອງທັງສອງຖືກປາດຄໍຢູ່ບໍລິເວນຫ້ວຍ, ແລະ ໃນມື້ດຽວກັບ ຊາຍອີກ 2 ຄົນກໍໄປຫາປາທີ່ຫ້ວຍດັ່ງກ່າວເຊັ່ນກັນ ແລະ ຖືກກຸ່ມຜູ້ຊາຍ 6 ຄົນເຊິ່ງເວົ້າພາສາເບງກາລີທຳຮ້າຍ ແຕ່ທັງສອງສາມາດຫຼົບໜີມາໄດ້ ແລະ ເຂົ້າຮັກສາຕົວທີ່ໂຮງໝໍ”.
ຫຼ້າສຸດ ລັດຍະໄຂ່ ກັບມາມີບັນຍາກາດຕຶງຄຽດອີກຄັ້ງ, ຫຼັງຈາກກອງທັບມຽນມາ ໄດ້ເລີ່ມປະຕິບັດການກວດລ້າງຊາວໂຣຮີນຈາ. ກອງທັບມຽນມາຊີ້ວ່າ: “ເປັນສີມືຂອງກຸ່ມ ໂຣຮີນຈາຜູ້ມີອາວຸດປະຕິບັດການດັ່ງກ່າວ ສົ່ງຜົນໃຫ້ມີຊາວໂຣຮີນຈາ ຖືກທໍາຮ້າຍ, ຖືກຂ້າຈໍານວນຫຼາຍ ແລະ ມີປະມານ 700,000 ຄົນ ຕ້ອງໜີໄພຄວາມຮຸນແຮງໄປປະເທດເພື່ອນບ້ານ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: matichon.co.th
ຮູບພາບຈາກ: transbordernews.in.