ສູນປິ່ນປົວ ແລະ ຮັກສາສຸຂະພາບຕາ ກະຊວງສາທາລະນະສຸກ ໄດ້ເປີດບໍລິການຜ່າຕັດແກ່ນຕາຂຸ້ນ ໂດຍບໍ່ໄດ້ເສຍຄ່າ ຂຶ້ນວັນທີ 17 ທັນວາ ຈົນເຖິງວັນທີ 21 ທັນວາ 2018 ທີ່ສູນປິ່ນປົວ ແລະ ຮັກສາສຸຂະພາບຕາ ທົ່ງປົ່ງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍໄດ້ຮັບການຮ່ວມມືຈາກໂຮງໝໍປະຊາຊົນເລກ 2 ແຂວງຢຸນນານ ສປ ຈີນ.
ທ່ານ ສີເພັດທະວົງ ສີສະເຫຼີມສັກ ຮອງອຳນວຍການສູນປິ່ນປົວ ແລະ ຮັກສາສຸຂະພາບຕາ ກ່າວວ່າ: “ໂຮງໝໍປະຊາຊົນເລກ 2 ແຂວງຢຸນນານໄດ້ນຳເອົາວັດຖຸ ອຸປະກອນການແພດ ແລະ ຢາຈໍານວນໜຶ່ງເຂົ້າມາຊ່ວຍເຫຼືອ ຜ່າຕັດພະຍາດແກ່ນຕາຂຸ້ນໂດຍບໍ່ເສຍຄ່າໃຫ້ປະຊາຊົນຜູ້ທີ່ມີບັນຫາສາຍຕາພິການ ແລະ ເປັນໂຄງການໜຶ່ງທີ່ມີປະສິດທິຜົນດີ ທີ່ນຳເອົາແສງສະຫວ່າງມາໃຫ້ເຂົາເຈົ້າ ເໝືອນກັບມາມີຊີວິດໃໝ່ອີກຄັ້ງໃນການທຳມາຫາກິນ ແລະ ປະກອບສ່ວນເຂົ້າໃນການພັດທະນາປະເທດຊາດ. ພ້ອມນັ້ນ, ໂຮງໝໍດັ່ງກ່າວ ໄດ້ນຳເອົາອຸປະກອນການແພດ ແລະ ຢາຈຳນວນໜຶ່ງ ລວມມູນຄ່າ 678.391 ຢວນ (ຫຼື ປະມານ 830 ລ້ານກີບ) ໃຫ້ສູນປິ່ນປົວ ແລະ ຮັກສາສຸຂະພາບຕາ ເພື່ອນຳໃຊ້ເຂົ້າໃນວຽກງານການປິ່ນປົວຕາໃຫ້ມີປະສິດທິພາບດີຂຶ້ນ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່, ໜັງສືພິມເສດຖະກິດສັງຄົມ
ຮູບພາບຈາກ: summitshort.pro