ໃນວັນທີ 18 ທັນວາ 2018 ບັນດາສະມາຊິກສະພາແຫ່ງຊາດ (ສສຊ) ໄດ້ສະເໜີໃຫ້ສະພາແຫ່ງຊາດພິຈາລະນາຄືນກ່ຽວກັບການຊື້-ຂາຍສິດນຳໃຊ້ທີ່ດິນຂອງລັດ ແບບມີກຳນົດເວລາ ໃນມາດຕາ 96 ຂອງຮ່າງທາບທາມກົດໝາຍວ່າດ້ວຍທີ່ດິນ (ສະບັບປັບປຸງ) ທີ່ລະບຸວ່າ ອະນຸຍາດໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງທັງພາຍໃນ ແລະ ຕ່າງປະເທດ ສາມາດຊື້ໄດ້ພາຍໃນກຳນົດເວລາບໍ່ເກີນ 50 ປີ ແລະ ສາມາດຊື້ໄດ້ອີກ 1 ຄັ້ງ ແຕ່ບໍ່ໃຫ້ເກີນກຳນົດເວລາ 40 ປີ, ເຊິ່ງເຫັນວ່າຍັງບໍ່ທັນມີຄວາມເໝາະສົມ ໂດຍສະເພາະແມ່ນການຂາຍກຳມະສິດທີ່ດິນໃຫ້ກັບຄົນຕ່າງປະເທດ.

ປະມານ 90% ຂອງ ສສຊ ຈໍານວນທັງໝົດ 29 ທ່ານທີ່ປະກອບຄໍາເຫັນໃສ່ຮ່າງກົດໝາຍສະບັບນີ້ ແມ່ນບໍ່ເຫັນດີ ທີ່ຈະຂາຍສິດນຳໃຊ້ທີ່ດິນໃຫ້ກັບຄົນຕ່າງປະເທດ ແລະ ຢາກໃຫ້ມີການຄົ້ນຄວ້າພິຈາລະນາຄືນ ໃຫ້ລະອຽດເລິກເຊິ່ງກວ່າເກົ່າ ເພື່ອປົກປ້ອງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າກໍຄື ປະເທດຊາດ.

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ສຳນັກຂ່າວສານປະເທດລາວ
ຮູບປະກອບ: hukased.blogspot