ສຳນັກຂ່າວ ໄຊນ່າ ມໍນິງ ໂພສ ຂອງຮ່ອງກົງລາຍງານເມື່ອວັນທີ 17 ທັນວາ 2018ວ່າ ສຳນັກງານໄອຍະການສະຫະລັດ ໃຊ້ບົດການລາຍງານພາວເວີພອຍ 17 ສະໄລນ໌ ທີ່ນາງ ເມິ່ງ ຫວ່ານໂຈວ ເຮັດຂຶ້ນເປັນພາສາຈີນ ແລະ ແປເປັນພາສາອັງກິດ ຍື່ນຕໍ່ທະນາຄານຮ່ອງກົງ ແລະ ຊຽງໄຮແບັງກິງຄັອບເປີເລຊັ່ນ (HSBC) ເມື່ອປີ 2013 ເພື່ອອະທິບາຍຄວາມສຳພັນລະຫວ່າງຫົວເວີ່ຍກັບບໍລິສັດສະກາຍຄອມ ເຊິ່ງເປັນຫຸ້ນສ່ວນເຮັດທຸລະກິດໃນອີຣານ ເປັນຫຼັກຖານວ່າຫົວເວີ່ຍຫຼົບຫຼີກມາດຕະການຄວໍ້າບາດຂອງສະຫະລັດ ແລະ ເອີຣົບເພື່ອເຮັດການຄ້າກັບອິຣານ.
ໂດຍຫົວເວີ່ຍໄດ້ນຳບົດການລາຍງານສະເໜີຂອງນາງ ເມິ່່ງ ມາເປີດເຜີຍໃນສານສູງສຸດ ລັດບຣິຕິຊໂຄລຳເບຍ ຂອງການາດາ ເຊິ່ງເນື້ອໃນບົດລາຍງານລະບຸວ່າ ຫົວເວີ່ຍເຮັດທຸລະກິດໃນຣານຕາມກົດໝາຍ, ຂໍ້ບັງຄັບ ແລະ ມາດຕະການຂອງສະຫະປະຊາຊາດ, ສະຫະລັດ ແລະ ສະຫະພາບເອີຣົບ ສ່ວນສະກາຍຄອມເປັນຫຸ້ນສ່ວນທຸລະກິດ ທີ່ຮ່ວມກັບຫົວເວີ່ຍໃນການຂາຍ ແລະ ໃຫ້ການບໍລິການໃນອິຣານ ຫົວເວີ່ຍເຄີຍເປັນຜູ້ຖືຫຸ້ນໃນສະກາຍຄອມ ແລະ ນາງ ເມິ່ງກໍ່ເຄີຍເປັນສະມາຊິກຜູ້ບໍລິຫານລະດັບສູງຂອງສະກາຍຄອມ ເພື່ອໃຫ້ການບໍລິຫານຈັດການຄວາມເປັນຫຸ້ນສ່ວນກັນເຮັດໄດ້ງ່າຍຂຶ້ນ.
ຢ່າງໃດກໍ່ຕາມ ລາຍງານລະບຸວ່າ ຄວາມສຳພັນດັ່ງກ່າວບໍ່ຈຳເປັນແລ້ວເພາະຫົວເວີ່ຍຈະເຮັດທຸລະກິດກັບສາຂາໃນອິຣານ ຫົວເວີ່ຍ ຈິ່ງຂາຍຫຸ້ນທັງໝົດໃຫ້ສະກາຍຄອມ ແລະ ນາງ ເມິ່ງ ລາອອກຈາກຕຳແໜ່ງຜູ້ບໍລິຫານ.
ໄອຍະການສະຫະລັດ ແລະ ທະນາຍຄວາມຂອງນາງ ເມິ່ງ ເຫັນກົງກັນວ່າ ບົດລາຍງານສະເໜີນີ້ເຊິ່ງຜ່ານຈາກການແປເປັນພາສາອັງກິດແລ້ວ ມີເປົ້າໝາຍເພື່ອຜ່ອນຄາຍຄວາມກັງວົນຂອງທະນາຄານ HSBC ທີ່ກັງວົນວ່າ ຫົວເວີ່ຍ ຮ່ວມກັບບໍລິສັດສະກາຍຄອມໃນຮ່ອງກົງ ອາດກຳລັງລະເມີດມາດຕະການຄວໍ້າບາດຂອງສະຫະລັດດ້ວຍການເຮັດທຸລະກິດໃນອິຣານ ແລະ ຂໍໃຫ້ HSBC ເຮັດແບບດຽວກັນ ແຕ່ສະຫະລັດລະບຸວ່າ ລາຍງານນີ້ເຕັມໄປດ້ວຍຄຳຂີ້ຕົວະ ແລະ ການຊີ້ນຳທີ່ຜິດ ເຊິ່ງທະນາຍຂອງນາງ ເມິ່ງ ໄດ້ປະຕິເສດການກ່າວຫາຂອງສະຫະລັດ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: thairath.co.th