ເຈົ້າໜ້າທີ່ທາງການ ກໍາປູເຈຍ ເຜີຍວ່າ: “ຍຶດງາຊ້າງຫາຍາກຈາກອາຟຣິກກາ ຈໍານວນ 1,026 ອັນ ດ້ວຍນໍ້າໜັກຫຼາຍກວ່າ 3 ໂຕນ ຊຸກເຊື່ອງໃນຕູ້ຄອນເທນເນີຮ້າງ ເຊິ່ງເປັນການຍຶດງາຊ້າງທີ່ຜິດກົດໝາຍຄັ້ງໃຫຍ່ທີ່ສຸດໃນຮອບ 4 ປີ”.
ສໍານັກຂ່າວ AP ລາຍງານຈາກນະຄອນຫຼວງພະນົມເປັນ ປະເທດກໍາປູເຈຍ ໃນວັນທີ 15 ທັນວາ 2018 ວ່າ ທ່ານ ສັນ ເຊຍ ຜູ້ອໍານວຍການທ່າເຮືອພະນົມເປັນ ເຜີຍວ່າ: “ໄດ້ຮັບແຈ້ງເບາະແສຈາກສະຖານທູດອາເມລິກາໃນນະຄອນຫຼວງພະນົມເປັນ ຈຶ່ງເຮັດໃຫ້ກວດພົບງາຊ້າງ 1.026 ອັນ ລວມນໍ້າໜັກທັງໝົດ 3.2 ໂຕນ ໃນຕູຄອນເທນເນີຮ້າງຢູ່ທ່າເຮືອພະນົມເປັນໃນວັນທີ 13 ທັນວາ ທີ່ຜ່ານມາ. ງາຊ້າງຊຸດນີ້, ຖືກນໍາສົ່ງມາຈາກ ໂມຊໍາບິກ ທາງພາກໃຕ້ຂອງທະວີບອາຟຣິກາ ເຊິ່ງເປັນງາຊ້າງທີ່ຖືກນໍາມາແຕ່ເດືອນ ກໍລະກົດ ແຕ່ເຈົ້າໜ້າທີ່ຫາກໍພົບເຫັນ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th, thairath.co.th