ສຳນັກຂ່າວຣອຍເຕີແຈ້ງວ່າ ປະທານາທິບໍດີ ໂດນັລ ທຣໍ້າ ກ່າວກັບນັກຂ່າວຣອຍເຕີເມື່ອວັນອັງຄານທີ 11 ທັນວາ 2018 ທີ່ຜ່ານມາວ່າ “ຕົນອາດເຂົ້າມາແຊກແຊງກະຊວງຍຸດຕິທຳຂອງສະຫະລັດ ໃນກໍລະນີນາງ ເມິ່ງ ຫວ່ານໂຈວ ຖ້າຫາກເປັນການຮັກສາຜົນປະໂຫຍດດ້ານຄວາມໝັ້ນຄົງຂອງປະເທດຊາດ ຫຼື ເປັນການຊ່ວຍດ້ານການຄ້າລະຫວ່າງສະຫະລັດກັບຈີນ”.
ທ່ານ ລູ່ ກັງ ໂຄສົກກະຊວງການຕ່າງປະເທດຈີນຖະແຫຼງວ່າ ລັດຖະບານຈີນຍິນດີຕໍ່ຄວາມພະຍາຍາມທຸກຢ່າງຂອງລັດຖະບານສະຫະລັດທີ່ຈະດຳເນີນການໃນການຊ່ວຍເຫຼືອນາງ ເມິ່ງ ຫວ່ານໂຈວ ພ້ອມກັບລະບຸວ່າ ການທີ່ທາງການການາດາຈັບກຸມຕົວນາງ ເມິ່ງ ຫວ່ານໂຈວນັ້ນ ຖືເປັນການກະທຳທີ່ຜິດພາດຕັ້ງແຕ່ຕົ້ນ ເຊິ່ງລັດຖະບານຈີນຍິນດີຕໍ່ຄວາມເຄື່ອນໄຫວທຸກຢ່າງໃນເລື່ອງນີ້ທີ່ຈະມຸ່ງໜ້າໄປສູ່ຄວາມຖືກຕ້ອງ.
ມີລາຍງານວ່າ ອະດີດນັກການທູດການາດາ ຖືກທາງການຈີນຈັບກຸມຕົວ ກ່ອນທີ່ສານການາດາຈະອະນຸຍາດໃຫ້ປະກັນຕົວນາງ ເມິ່ງ ດ້ວຍວົງເງິນປະກັນຕົວ 7.4 ລ້ານໂດລາ (ປະມານ 63.196.000.000 ກີບ) ໂດຍທີ່ນາງຕ້ອງຢູ່ພາຍໃຕ້ການຄວບຄຸມຂອງເຈົ້າໜ້າທີ່ຕຳຫຼວດ 24 ຊົ່ວໂມງ ຮວມເຖິງການໃສ່ປອກຂາ GPS ແລະ ຫ້າມອອກນອກເຮືອນພັກ ໃນລະຫວ່າງເວລາ 23:00-06:00 ໂມງ ແລະ ຕ້ອງມອບພາສປອດ, ໜັງສືເດີນທາງທັງໝົດໃຫ້ແກ່່ເຈົ້າໜ້າທີ່ທາງການ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: thairath.co.th, khaosod.co.th