ລົງມືກໍ່ຢ່າງເປັນທາງການອາຄານໂຮງໝໍມະໂຫສົດຫຼັງໃໝ່ບັນຈຸ 600 ຕຽງ ໃນວັນທີ 14 ທັນວາ 2018 ພາຍຫຼັງທີ່ໄດ້ວາງສີລາຈາລຶກໃນປີ 2017 ຜ່ານມາ ເປັນການຊ່ວຍເຫຼືອຈາກລັດຖະບານ ແລະ ປະຊາຊົນ ສປ ຈີນ ໂດຍມີທັງໝົດ 6 ພາກສ່ວນ ກວມເອົາເນື້ອທີ່ທັງໝົດ 30,3000 ຕາແມັດ ຄາດໝາຍການກໍ່ສ້າງຈະສໍາເລັດໃນປີ 2022.
ທ່ານ ເສີນເຣີ້ນ, ຕາງໜ້າ ກຸ່ມບໍລິສັດ ວິສະວະກໍາ ສາກົນ ຈົງຢວນ ຈໍາກັດ (IPPR) ກ່າວວ່າ: ໂຄງການກໍ່ສ້າງໂຮງໝໍມະໂຫສົດໃນຄັ້ງນີ້, ເປັນໂຄງການທີ່ໃຫຍ່, ມີມູນຄ່າການລົງທຶນຫຼາຍກວ່າໝູ່, ມາດຕະຖານການກໍ່ສ້າງສູງ ໃນບັນດາໂຄງການຊ່ວຍເຫຼືອສ້າງໂຮງໝໍຂອງ ສປ ຈີນ ຢູ່ບັນດາປະເທດຕ່າງໆ. ການກໍ່ສ້າງໄດ້ມ້າງອາຄານເກົ່າສ່ວນໜຶ່ງອອກ ເພື່ອກໍ່ສ້າງອາຄານ 600 ຕຽງ, ເນື້ອທີ່ທັງໝົດຂອງໂຄງການ 30.300 ຕາແມັດ ອາຄານຕົ້ນຕໍລວມມີ 6 ພາກສ່ວນຄື: ອາຄານກວດກາສັງລວມ ເປັນອາຄານ 4 ຊັ້ນ, ອາຄານເຕັກນິກ 8 ຊັ້ນ, ອາຄານນອນຄົນເຈັບ 8 ຊັ້ນ, ອາຄານພະຍາດຊືມເຊື້ອແຖບຮ້ອນ 4 ຊັ້ນ, ອາຄານຫໍລາຍງານ 1 ຊັ້ນ ແລະ ຫ້ອງໃຕ້ດິນ.
ຖ້າກໍ່ສ້າງສໍາເລັດ ໂຮງໝໍມະໂຫສົດຈະເປັນໂຮງໝໍແຫ່ງໜຶ່ງທີ່ມີອຸປະກອນ ແລະ ເຄື່ອງຈັກທັນສະໄໝທີ່ສຸດ, ມີບົດບາດໃນການປິ່ນປົວ ແລະ ການແພດສົມບູນກວ່າເກົ່າ ສາມາດຮັບຄົນເຈັບຕະຫຼອດ 24 ຊົ່ວໂມງ. ນອກນັ້ນ, ຍັງຊ່ວຍຊຸກຍູ້ສົ່ງເສີມການພັດທະນາເສດຖະກິດ ແລະ ເປັນຂີດຫຼັກໝາຍອັນສໍາຄັນໃນປະຫວັດສາດມິດຕະພາບລາວ-ຈີນ, ຜູ້ພັດທະນາຈະຖືໂຄງການນີ້ເປັນໂອກາດເພື່ອເປີດ ແລະ ຄົ້ນຄວ້າວິທີການຮ່ວມມືແບບໃໝ່ທາງດ້ານການແພດລະຫວ່າງສອງປະເທດລາວ-ຈີນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມປະເທດລາວ, ໜັງສືພິມເສດຖະກິດ-ສັງຄົມ
ຮູບພາບຈາກ: ປະເທດລາວ Pathedlao