ໃນເວທີການປະກວດນາງງາມຈັກກະວານ ຫຼື Miss Universe ປະຈໍາປີ 2018, ອອນອານົງ ຫອມສົມບັດ Miss Universe Laos 2018 ຕົວແທນຈາກປະເທດລາວ ສາມາດຄວ້າລາງວັນຊຸດປະຈໍາຊາດດີເດັ່ນມາຄອງ ຈາກສາວງາມ 93 ປະເທດທົ່ວໂລກ ໃນຕອນເຊົ້າຂອງມື້ນີ້ ວັນທີ 17 ທັນວາ 2018, ທີ່ປະເທດໄທ ຖືເປັນລາງວັນອັນຊົງກຽດ ແລະ ຂອງຂວັນສົ່ງທ້າຍປີທີ່ຍິ່ງໃຫ່ຍຂອງປະເທດລາວ.
ຊຸດດັ່ງກ່າວ, ມີຊື່ວ່າ: “ທານນໍ້າໃຈສູ່ປະເທດລາວ” ໂດຍໄດ້ຮັບແຮງບັນດານໃຈມາຈາກ ນາງກິນນາຣີ ເປັນສັດເຄິ່ງຄົນເຄິ່ງນົກ ເຊິ່ງເປັນຊຸດປະຈໍາຊາດທີ່ມີເອກະລັກສະເພາະທີ່ສະທ້ອນເຖິງປະເທດລາວ ແລະ ເປັນການສະແດງໃຫ້ຄົນທົ່ວທຸກມຸມໂລກໄດ້ເຫັນ ໂດຍຜ່ານເວທີການປະກວດລະດັບໂລກ. ນອກຈາກນັ້ນຊຸດດັ່ງກ່າວ, ຍັງໄດ້ແຮງບັນດານໃຈຈາກເຫດການສັນເຂື່ອນໃນໂຄງການເຂື່ອນໄຟຟ້າເຊປຽນ-ເຊນໍ້ານ້ອຍແຕກ ເຮັດໃຫ້ປະຊາຊົນຫຼາຍພັນຄົນໄດ້ຮັບຜົນກະທົບ ແລະ ຮູບແບບຂອງຊຸດໄດ້ຮັບແຮງບັນດານໃຈຈາກກິນນາຣີ ສັດໃນຕຳນານເລື່ອງເລົ່າຂອງລາວ ປະກອບກັບເຕັກນິກການນຳສະເໜີແບບການສະແດງຫຸ່ນເປີດໝວກຮັບບໍລິຈາກເງິນ ເຊິ່ງເຫັນໄດ້ຕາມສະຖານທີ່ທ່ອງທ່ຽວຕ່າງໆ.
ສ່ວນດ້ານ ສາວງາມ ອອນອານົງ ຫອມສົມບັດ ກ່າວຕໍ່ ສະຕີບ ຮາວີ ພິທີກອນດຳເນີນການປະກວດ ຫຼັງຈາກໄດ້ຮັບລາງວັນດັ່ງກ່າວວ່າ “ຂ້ອຍຮູ້ສຶກພາກພູມໃຈຫຼາຍທີ່ໄດ້ຮັບລາງວັນຊຸດປະຈຳຊາດດີເດັ່ນໃນມື້ນີ້ ແລະ ເປັນຕົວແທນໃຫ້ແກ່ປະເທດລາວ. ນີ້ກໍເປັນຄັ້ງທີ 2 ແລ້ວທີ່ປະເທດລາວຮ່ວມເຂົ້າແຂ່ງຂັນມິສຢູນິເວີສ. ຂ້ອຍຮູ້ສຶກດີໃຈຫຼາຍທີ່ພວກເຮົາສາມາດມາໄກໄດ້ຂະໜາດນີ້”.
ຢ່າງໃດກໍຕາມ, ຂໍສະແດງຄວາມຍິນດີກັບ ອອນອານົງ ຫອມສົມບັດ Miss Universe Laos 2018 ທີ່ສາມາດຄວ້າລາງວັນຊຸດປະຈໍາຊາດໃນການປະກວດຄັ້ງນີ້ ຖືເປັນໂສມໜ້າອັນໃໝ່ ຫຼື ເປັນຂອງຂວັນສົ່ງທ້າຍປີໃຫ້ແກ່ມິດຮັກແຟນເຊຍ ກໍຄືປະຊາຊົນລາວທົ່ວປະເທດ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: PPTV HD 36