ເຈົ້າໜ້າທີ່ກະສິກຳ ແລະ ປ່າໄມ້ ເມືອງຈັນທະບູລີ ນະຄອນຫຼວງວຽງຈັນ ກວດພົບສານຟໍມາລີນ ປົນເປື້ອນເປັນຈຳນວນຫຼາຍໃນອາຫານທະເລ ຢູ່ຕະຫຼາດໂພນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ໃນວັນທີ 12 ທັນວາຜ່ານມາ. ເຈົ້າໜ້າທີ່ໄດ້ໃຫ້ເຈົ້າຂອງຮ້ານອາຫານທະເລທີ່ຖືກກວດສອບ ເຊັນບົດບັນທຶກ ແລະ ຄະນະຮັບຜິດຊອບຕະຫຼາດໄດ້ສັ່ງໃຫ້ຮ້ານດັ່ງກ່າວ ຢຸດເຊົາການຂາຍຢູ່ໃນຕະຫຼາດ ເພື່ອສ້າງຄວາມໝັ້ນໃຈໃຫ້ຜູ້ບໍລິໂພກ.
ການລົງກວດກາສານປົນເປື້ອນໃນອາຫານທະເລຄັ້ງນີ້, ເຈົ້າໜ້າທີ່ໄດ້ເກັບຕົວຢ່າງຈາກອາຫານທະເລປະເພດກຸ້ງ, ຫອຍແຄງ, ປາໝຶກແຊ່ແຂງ, ປາໝຶກແຫ້ງ ແລະ ໄສ້ຍໍ່ຂາວຈຳນວນ 4 ຮ້ານ ເຊິ່ງໄດ້ພົບສານຟໍມາລີນ ປົນເປື້ອນເປັນຈຳນວນຫຼາຍ, ເຈົ້າໜ້າທີ່ຈິ່ງໄດ້ໃຫ້ເຈົ້າຂອງຮ້ານເຊັນບົດບັນທຶກ ແລະ ຕັກເຕືອນ ຖ້າພົບເຫັນກະທຳຜິດອີກຈະດຳເນີນມາດຕະການຕາມລະບຽບກົດໝາຍ ພ້ອມທັງຢຶດສິນຄ້າທີ່ມີສານປົນເປື້ອນໄປທຳລາຍ. ພ້ອມນັ້ນ, ເຈົ້າໜ້າທີ່ໃຫ້ຮູ້ຕື່ມວ່າ: ການນຳໃຊ້ສານຟໍມາລີນໃນອາຫານທະເລ ແລະ ເຄື່ອງໃນສັດຕ່າງໆ ຢູ່ຕາມທ້ອງຕະຫຼາດຍັງມີແຜ່ຫຼາຍ. ດັ່ງນັ້ນ, ເພື່ອຄວາມປອດໄພຕໍ່ສຸຂະພາບ ຈິ່ງແຈ້ງໃຫ້ປະຊາຊົນມີສະຕິລະວັງຕົວຕໍ່ການບໍລິໂພກ ຖ້າເປັນໄປໄດ້ຄວນກວດກາຄວາມປອດໄພໃຫ້ດີກ່ອນຈະເອົາໄປບໍລິໂພກ.
ເຈົ້າໜ້າທີ່ຈັດສັນຕະຫຼາດໂພນສະຫວ່າງໃຫ້ສຳພາດວ່າ: ຕໍ່ບັນຫາດັ່ງກ່າວ, ທາງຄະນະຮັບຜິດຊອບຕະຫຼາດຈະໃຫ້ທີ່ຜູ້ລະເມີດ ຫຼື ຜູ້ກະທຳຜິດກົດລະບຽບກົດໝາຍ ຢຸດເຊົາການຂາຍຢູ່ໃນຕະຫຼາດດັ່ງກ່າວ ເພື່ອສ້າງຄວາມໝັ້ນໃຈໃຫ້ຜູ້ບໍລິໂພກ ແລະ ຈະໄດ້ເພີ່ມມາດຕະການກັບຜູ້ປະກອບກິດຈະການໃນຕະຫຼາດຢ່າງເຂັ້ມງວດກວ່າເກົ່າອີກ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: laophattananews.com
ຮູບພາບຈາກ: http://oknation.nationtv.tv