ເອກອັກຄະລັດຖະທູດ ຣັດເຊຍ ປະຈຳ ສປປ ລາວ ຖະແຫຼງຂ່າວວັນທີ 12 ທັນວາ 2018 ຜ່ານມາວ່າ: ລັດເຊຍ ມີຄວາມພໍໃຈຕໍ່ສາຍພົວພັນຮ່ວມມືລະຫວ່າງລາວ-ລັດເຊຍ ທີ່ມີບາດກ້າວຂະຫຍາຍຕົວ ໂດຍສະເພາະທ້າຍປີ 2018 ມູນຄ່າການຄ້າລະຫວ່າງສອງປະເທດເພີ່ມຂຶ້ນຫຼາຍກວ່າ 60% ຂະແໜງການທີ່ສຳຄັນທີ່ສຸດແມ່ນພະລັງງານໄຟຟ້າ ເຊິ່ງລັດເຊຍໄດ້ດຳເນີນການສຳຫຼວດ ທາງທໍລະນີວິທະຍາຢູ່ສະຖານທີ່ກໍ່ສ້າງເຂື່ອນໄຟຟ້ານ້ຳຕົກ ພິເສດການຮ່ວມມືພັດທະນາສາຍພົວພັນດ້ານການສຶກສາ ເຊິ່ງປີນີ້ໄດ້ສົ່ງນັກສຶກສາລາວ 91 ຄົນ ໄປສຶກສາຢູ່ມະຫາວິທະຍາໄລແຫ່ງຕ່າງໆໃນລັດເຊຍ ແລະ ການຮ່ວມມືວຽກງານຫຼາຍຂະແໜງການພວມສືບຕໍ່ໄປໃນທາງທີ່ດີ.
ທ່ານ ມີຄາອິນ ບາຣານນົບ ຍັງໄດ້ຢືນຢັນເຖິງເຈຕະນາຂອງລັດຖະບານລັດເຊຍ ທີ່ມີຕໍ່ອາຊຽນ ແລະ ສາກົນ ໃນການຮ່ວມມືສົ່ງເສີມເສດຖະກິດການຄ້າ ແລະ ສັງຄົມ ເວົ້າສະເພາະ ສປປ ລາວ ຈະສືບຕໍ່ສາຍພົວພັນຮ່ວມມືທີ່ມີມູນເຊື້ອມາແຕ່ດົນນານ ໃຫ້ນັບມື້ແຕກດອກອອກຜົນ ໂດຍມີການແລກປ່ຽນການຢ້ຽມຢາມຂອງການນຳຂັ້ນສູງທັງສອງປະເທດ ຮ່ວມກັນປຶກສາຫາລືຫຼາຍບັນຫາ ລະຫວ່າງຜູ້ແທນສອງຝ່າຍ, ການພົບປະ ປະຈຳປີລະຫວ່າງທ່ານ ວາຣາດີເມຍ ປູຕິນ ປະທານາທິບໍດີຣັດເຊຍ ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ ລາວ ໄດ້ກາຍເປັນປະເພນີອັນດີງາມ. ນອກນີ້, ທ່ານຍັງໄດ້ຍົກໃຫ້ເຫັນບາງທັດສະນະຂອງລັດເຊຍຕໍ່ອາຊຽນ ແລະ ສາກົນ ທີ່ເປັນບາງບັນຫາອັນພົ້ນເດັ່ນໃນຂົງເຂດພາກພື້ນ ແລະ ສາກົນ.
ຮຽບຮຽງໂດຍໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່