ລັດຖະມົນຕີ ກະຊວງແຜນການ ແລະ ການລົງທຶນ ຊີ້ແຈ້ງໃນກອງປະຊຸມສະໄໝສາມັນເທື່ອທີ6 ຂອງສະພາແຫ່ງຊາດຊຸດທີVIII ວ່າ: ເຫດຜົນທີ່ອະນຸມັດຮັບຮອງແຜນປະຈໍາປີມີຄວາມຊັກຊ້າ ແລະ ແກ່ຍາວເວລາ ຍ້ອນບາງສິນຄ້າຜະລິດຢູ່ພາຍໃນ ບາງບໍລິສັດທີ່ຕ້ອງການຊື້ພາຍໃນເທົ່ານັ້ນ; ການນໍາເຂົ້າທາດເຄມີຕ້ອງມີໃບທະບຽນ ແລະ ຕ້ອງໄດ້ໃຊ້ເວລາໃນການພິຈາລະນາ; ບາງວິສາຫະກິດສະເໜີຂໍນະໂຍບາຍຜ່ານບໍລິສັດຂົນສົ່ງ ທີ່ບໍ່ໄປຕາມຮ່າງແຜນນໍາເຂົ້າປະຈໍາປີ; ບາງບໍລິສັດສະເໜີຂໍນະໂຍບາຍນໍາເຂົ້າທີ່ມີມູນຄ່າສູງກວ່າຄວາມເປັນຈິງ; ການປະກອບເອກະສານຍັງບໍ່ຄົບຖ້ວນຕາມລະບຽບການຂອງຂະແໜງການທີ່ກ່ຽວຂ້ອງ ແລະ ອື່ນໆ.
ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ຊີ້ແຈ້ງວ່າ: ພາຍຫຼັງທີ່ໄດ້ມີການມອບ-ຮັບວຽກງານການຈັດຕັ້ງປະຕິບັດນະໂຍບາຍດ້ານພາສີ ແລະ ອາກອນໃນທ້າຍປີ 2017 ເປັນຕົ້ນມາ. ປັດຈຸບັນ, ມີລັດວິສາຫະກິດຍື່ນຂໍສະເໜີນະໂຍບາຍແຜນນໍາເຂົ້າວັດຖຸອຸປະກອນ ເພື່ອຮັບໃຊ້ວຽກງານການຜະລິດ ຫຼື ວຽກງານໂຄງການຫຼາຍເຖິງ 353 ບໍລິສັດ/ໂຄງການ ໃນນັ້ນ, ຄົ້ນຄວ້າສໍາເລັດ 329 ບໍລິສັດ/ໂຄງການ, ຍັງປະມານ 24 ບໍລິສັດ/ໂຄງການ. ຈໍານວນ 24 ບໍລິສັດນີ້, ໄດ້ຍື່ນເອກະສານເຂົ້າມາຊ້າ ຈຶ່ງເຮັດໃຫ້ການພິຈາລະນາອະນຸມັດຊ້າອອກໄປ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: laoedaily.com.la