ນາງ ເມິ່ງ ຫວ່ານໂຈວ ໄວອາຍຸ 46 ປີ ຜູ້ບໍລິຫານສູງສຸດດ້ານການເງິນ ແລະ ເປັນລູກສາວຂອງປະທານບໍລິສັດຫົວເວີ່ຍ ອ້າງເຫດຜົນດ້ານສຸຂະພາບເພື່ອຂໍປະກັນຕົວ ຫຼັງຖືກຈັບກຸມໃນການາດາຂໍ້ຫາລະເມີດມາດຕະການຂວໍ້າບາດອິຫຼ່ານ ແລະ ກຽມຖືກສົ່ງຕົວໄປດຳເນີນຄະດີໃນສະຫະລັດ.
ສຳນັກຂ່າວຕ່າງປະເທດລາຍງານຈາກເມືອງແວນຄູເວີ ປະເທດການາດາ ເມື່ອວັນທີ 12 ທັນວາ 2018 ວ່າ ສານສູງສຸດແຫ່ງລັດບຣິຕິຊໂຄລຳເບຍ ໃນເມືອງແວນຄູເວີ ທາງຕະເວັນຕົກຂອງການາດາ ມີຄຳພິພາກສາເມື່ອວັນອັງຄານທີ່ຜ່ານມາວ່າ ໃຫ້ ນາງ ເມິ່ງ ຫວ່ານໂຈວ ໄດ້ຮັບການປະກັນຕົວຊົ່ວຄາວພາຍໃຕ້ເງື່ອນໄຂການວາງຫຼັກຊັບ 10 ລ້ານໂດລາການາດາ ເຊິ່ງຍັງບໍ່ມີການເປີດເຜີຍຢ່າງຊັດເຈນວ່ານາງໃຊ້ເຮືອນພັກໃນເມືອງແວນຄູເວີຄໍ້າປະກັນນຳ ຫຼື ບໍ່. ຂະນະດຽວກັນ ນາງ ເມິ່ງ ຕ້ອງໄດ້ໃສ່ປອກຂາອິເລັກໂທຣນິກ ເພື່ອຢູ່ພາຍໃຕ້ການສັງເກດການຂອງເຈົ້າໜ້າທີ່ຕະຫຼອດ 24 ຊົ່ວໂມງ.
ຂະນະທີ່ແຫຼ່ງຂ່າວກະຊວງການຕ່າງປະເທດສະຫະລັດລະບຸວ່າ ລັດຖະບານສະຫະລັດຈະຍື່ນເອກະສານເພີ່ມເຕີມເພື່ອສະໜັບສະໜູນຄຳຮ້ອງຂໍຕົວນາງ ເມິ່ງ ໃນຖານະຜູ້ຮ້າຍຂ້າມແດນ ຢ່າງໃດກໍ່ຕາມການອະນຸມັດຄຳຮ້ອງປະກັນຕົວນາງ ເມິ່ງ ຂອງສານໃນເມືອງແວນຄູເວີ ເກີດຂຶ້ນທ່າມກາງການລາຍງານວ່າເຈົ້າໜ້າທີ່ຄວາມໝັ້ນຄົງຂອງລັດຖະບານຈີນໄດ້ຄວບຄຸມຕົວທ່ານ ໄມເຄິລ ຄັອຟຣິກ ອະດີດນັກການທູດຊາວການາດາປະຈຳນະຄອນຫຼວງປັກກິ່ງ, ຮ່ອງກົງ ແລະ ສະຫະປະຊາຊາດ (ຢູເອັນ) ໂດຍບໍ່ມີການເປີດເຜີຍສາເຫດທີ່ຊັດເຈນໃນການຈັບກຸມ ເຊິ່ງປັດຈຸບັນທ່ານ ຄັອຟຣິກ ເປັນທີ່ປຶກສາດ້ານນະໂຍບາຍເອເຊຍຕະເວັນອອກສຽງເໜືອ ໃຫ້ກັບອົງກອນ “ອິນເຕີເນຊັ່ນນໍ ໄຄຣຊິສ ກຣຸ໊ບ” ເຊິ່ງມີສຳນັກງານຢູ່ທີ່ນະຄອນບຣັສເຊລ. ດ້ານກະຊວງຄວາມປອດໄພສາທາລະນະຂອງການາດາເປີດເຜີຍວ່າ ໄດ້ຮັບຮູ້ເລື່ອງທີ່ເກີດຂຶ້ນແລ້ວ ແລະ ຍັງບໍ່ມີການຕັ້ງສົມມຸດຕິຖານວ່າມີຄວາມເຊື່ອມໂຍງກັບກໍລະນີລູກສາວເຈົ້າຂອງຫົວເວີ່ຍ ຫຼື ບໍ່ ແຕ່ຫຼາຍຝ່າຍເຊື່ອວ່ານີ້ “ບໍ່ແມ່ນເລື່ອງບັງເອີນ”.
ຮຽບຮຽງຂາ່ວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th, nationtv.tv
ຮູບປະກອບ: techxcite