ເວັບໄຊ CNBC ລາຍງານຜ່ານມາວ່າ ເຈົ້າໜ້າທີ່ຕໍາຫຼວດອາເມລິກາ ປະກາດອົບພະຍົບຄົນອອກຈາກສໍານັກງານຂອງເຟສບຸກໃນຊິລິຄອນ ໄວເລຍ ໃກ້ກັບເມືອງຊານຟານຊິສໂກ ສະຫະລັດອາເມລິກາຢ່າງໄວວາ ເມື່ອວັນທີ 11 ທັນວາ 2018   ເນື່ອງຈາກມີບຸກຄົນປິດສະໜາຜູ້ບໍ່ຫວັງດີແຈ້ງວ່າ ມີການວາງລະເບີດໃນສໍານັກງານເຟສບຸກ ໃນເມນໂລປຣາດ ຄາລິຟຣໍເນຍ.

ເຈົ້າໜ້າທີ່ລະບຸວ່າ ໄດ້ຮັບການແຈ້ງດັ່ງກ່າວ, ໃນເວລາປະມານ 16:30 ໂມງ ຕາມເວລາທ້ອງຖິ່ນ ໂດຍເຈົ້າໜ້າທີ່ສັ່ງໃຫ້ອົບພະຍົບຄົນອອກຈາກອາຄານສູງ 3 ຊັ້ນ ຂະນະທີ່ເຈົ້າໜ້າທີ່ເປີດເຜີຍວ່າ ອາຄານດັ່ງກ່າວ, ບໍ່ແມ່ນອາຄານສໍານັກງານໃຫຍ່. ຕໍ່ມາເວລາປະມານ 20:00 ໂມງ ເຈົ້າໜ້າທີ່ໜ່ວຍເກັບກູ້ລະເບີດ ພ້ອມກັບພາກສ່ວນທີ່ກ່ຽວຂ້ອງໄດ້ລົງກວດສອບພື້ນທີ່ ພົບວ່າບໍ່ມີຜູ້ໃດໄດ້ຮັບອັນລາຍແຕ່ຢ່າງໃດ ແລະ ບໍ່ພົບລະເບີດຕາມທີ່ໄດ້ຂູ່ໄວ້ກ່ອນນ້ານີ້.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: matichon.co.th, thairath.co.th.