ສຳນັກຂ່າວຣອຍເຕີລາຍງານຈາກນະຄອນຫຼວງປັກກິ່ງ, ປະເທດຈີນເມື່ອວັນທີ 9 ທັນວາ 2018 ວ່າ ກະຊວງການຕ່າງປະເທດຂອງຈີນໄດ້ເຊີນທ່ານເທີຣີ ແບຣນສະຕັດ ເອກອັກຄະຣາຊທູດສະຫະລັດອາເມລິກາປະຈຳນະຄອນຫຼວງປັກກິ່ງເຂົ້າພົບເພື່ອຍື່ນປະທ້ວງກໍລະນີທີ່ນາງ ເມິ່ງ ຫວ່ານໂຈວ ປະທານຄະນະ, ເຈົ້າໜ້າທີ່ບໍລິຫານດ້ານການເງິນ ແລະ ບັນຊີ (CFO) ຂອງບໍລິສັດ ຫົວເວີ່ຍ ເທັກໂນໂລຢີ ຈຳກັດ ແລະ ຍັງເປັນລູກສາວຂອງຜູ້ກໍ່ຕັ້ງບໍລິສັດຫົວເວີ່ຍ ຖືກຈັບຢູ່ໃນປະເທດການາດາ ເມື່ອວັນທີ 1 ທັນວາ 2018 ທີ່ຜ່ານມາ ແລະ ອາດຖືກສົ່ງຕົວໄປທີ່ສະຫະລັດອາເມລິກາໃນສະຖານະຜູ້ຮ້າຍຂ້າມແດນ ເພາະຖືກກ່າວຫາວ່າປົກປິດກໍລະນີບໍລິສັດຫົວເວີ່ຍກ່ຽວພັນກັບບໍລິສັດທີ່ພະຍາຍາມຂາຍອຸປະກອນເຄື່ອງມືໃຫ້ກັບອິຫຼ່ານ ເຖິງແມ່ນວ່າອິຫຼ່ານກຳລັງຖືກຂວໍ້າບາດຢູ່ໃນເວລານີ້ກໍ່ຕາມ.
ທ່ານ ລີ່ ຢູ່ເຊັງ ລັດຖະມົນຕີຊ່ວຍວ່າການຕ່າງປະເທດຂອງຈີນກ່າວກັບທ່ານ ເທີຣີ ແບຣນສະຕັດວ່າ ສະຫະລັດໄດ້ຍື່ນຂໍ້ຮຽກຮ້ອງທີ່ບໍ່ມີເຫດຜົນຕໍ່ການາດາໃຫ້ດຳເນີນການຈັບຕົວ ນາງ ເມ່ງ ຂະນະທີ່ເດີນທາງຜ່ານເມືອງແວນຄູເວີຂອງການາດາ ການກະທຳຂອງສະຫະລັດເທົ່າກັບເປັນການລະເມີດຂໍ້ກົດໝາຍຢ່າງຮ້າຍແຮງຮວມເຖິງສິດອັນຊອບທຳຕາມກົດໝາຍຂອງພົນລະເມືອງຈີນ ແລະ ຖືວ່າເປັນອັນຕະລາຍຢ່າງຍິ່ງ.
ກ່ອນໜ້ານີ້ກະຊວງການຕ່າງປະເທດຈີນໄດ້ເຊີນເອກອັກຄະຣາຊທູດການາດາ ປະຈຳນະຄອນຫຼວງປັກກິ່ງເຂົ້າພົບ ເຊິ່ງລັດຖະມົນຕີຊ່ວຍວ່າການຕ່າງປະເທດຈີນກ່າວຢໍ້າອີກວ່າ ລັດຖະບານຈີນຂໍຮຽກຮ້ອງໃຫ້ສະຫະລັດໃຫ້ຄວາມສຳຄັນກັບຈີນ ແລະ ຖອນໝາຍຈັບດ້ວຍ ເຊິ່ງຈີນຈະຕອບໂຕ້ຫຼາຍກວ່ານີ້ໂດຍຂຶ້ນກັບການກະທຳຂອງສະຫະລັດ ສ່ວນທີ່ຈີນບອກກັບເອກອັກຄະຣາຊທູດການາດາຄື ຈະມີຜົນຕາມມາຢ່າງຮ້າຍແຮງຫາກການາດາບໍ່ຍອມປ່ອຍຕົວ ນາງ ເມິ່ງ ຫວ່ານໂຈວ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th
ຮູບປະກອບ: mgronline.com