ລັດຖະບານ ແຕ່ງຕັ້ງຄະນະຊີ້ນຳລະດັບຊາດ ສຳຫຼວດເສດຖະກິດທົ່ວປະເທດ ຄັ້ງທີ 3 ເລີ່ມແຕ່ປີ 2018-2020 ເພື່ອຂຶ້ນບັນຊີຫົວໜ່ວຍພື້ນຖານເສດຖະກິດທີ່ດຳເນີນທຸລະກິດຢູ່ລາວ ແລະ ສ້າງຖານຂໍ້ມູນຫົວໜ່ວຍພື້ນຖານເສດຖະກິດ ເພື່ອຮັບໃຊ້ໃນການສຳຫຼວດຕ່າງໆ ທີ່ກ່ຽວຂ້ອງກັບຫົວໜ່ວຍເສດຖະກິດ ພ້ອມທັງເປັນບ່ອນອີງແກ່ການຄາດຄະເນລວມຍອດລາຍຮັບ ແລະ ກຳລັງແຮງງານແຕ່ລະຂະແໜງການເສດຖະກິດ ຕາມລະຫັດສາລະບານການຈັດແບ່ງຂອງສາກົນ.
ກອງປະຊຸມຄັ້ງປະຖົມມະເລີກ ຄະນະຊີ້ນຳລະດັບຊາດຂອງການສຳຫຼວດເສດຖະກິດທົ່ວປະເທດ ຄັ້ງທີ 3 ປີ 2018 ຈັດຂຶ້ນວັນທີ 6 ທັນວາ 2018 ທີ່ກະຊວງການເງິນ ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການເງິນ ຫົວໜ້າຄະນະຊີ້ນຳການສຳຫຼວດເສດຖະກິດທົ່ວປະເທດ ມີບັນດາຄະນະຊີ້ນຳຈາກກະຊວງ ແລະ ອົງການຈັດຕັ້ງທີ່ກ່ຽວຂ້ອງທັງສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ສົມດີ ດວງດີ ກ່າວວ່າ: “ການສຳຫຼວດເສດຖະກິດທົ່ວປະເທດ ຄັ້ງນີ້, ມີຄວາມສຳຄັນຈຳເປັນທີ່ສຸດ ໂດຍການສຳຫຼວດໄດ້ກຳນົດໄວ້ໃນກົດໝາຍວ່າດ້ວຍ ສະຖິຕິ ແລະ ຍຸດທະສາດພັດທະນາລະບົບສະຖິຕິແຫ່ງຊາດ 2016-2025 ແລະ ວິໄສທັດ 2030. ຜົນການສຳຫຼວດຈະນຳໃຊ້ເພື່ອຕິດຕາມ, ປະເມີນຜົນແຜນພັດທະນາເສດຖະກິດ-ສັງຄົມ ຂອງປະເທດ; ກຽມສ້າງແຜນ 5 ປີ ຄັ້ງທີ 9 ໂດຍການສຳຫຼວດຄັ້ງທີ 3 ຖືເປັນການສຳຫຼວດໃຫຍ່ທີ່ສຳຄັນ ເຮັດໃຫ້ລັດຖະບານ ກໍ່ຄືຄະນະຮັບຜິດຊອບໄດ້ເພີ່ມທະວີຄວາມຮັບຜິດຊອບສູງເປັນຕົ້ນ ການຈັດແບ່ງໜ້າທີ່ຄວາມຮັບຜິດຊອບ, ກົນໄກ ແລະ ວິທີເຮັດວຽກການສຳຫຼວດພາກສະໜາມ ລວມທັງການຄົ້ນຄວ້າກ່ຽວກັບການນຳໃຊ້ງົບປະມານໃຫ້ມີປະສິດທິຜົນ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່