ໃນວັນທີ 5 ທັນວາ 2018 ທ່ານ ນາງ ມະລິນາ ໄຊສົມບູນ ຮອງເຈົ້າເມືອງສະໜາມໄຊ , ຄະນະກຳມະການຟື້ນຟູແກ້ໄຂໄພພິບັດນ້ຳຖ້ວມ ຢູ່ເມືອງສະໜາມໄຊ ໄດ້ຢືນຢັນຕໍ່ສື່ມວນຊົນວ່າ ອຳນາດການປົກຄອງເມືອງສະໜາມໄຊ ໄດ້ຮັບແຈ້ງ ຈາກປະຊາຊົນໃນວັນທີ 30 ພະຈິກ ວ່າໄດ້ພົບເຫັນຜູ້ເສຍຊີວິດຢູ່ບໍລິເວນທົ່ງນາ ທາງທິດໃຕ້ ຂອງບ້ານຫີນລາດ 2 ສົບ ເປັນເພດຊາຍ ອາຍຸ 14 ປີ ແລະ ຍິງອາ ຍຸ 7 ປີ, ເຊິ່ງເປັນສອງອ້າຍນ້ອງ ຢູ່ບ້ານຫີນລາດ.
ຈາກນັ້ນ, ອຳນາດການປົກຄອງເມືອງ ໄດ້ປະສານສົມທົບກັບເຈົ້າໜ້າທີ່ກ່ຽວຂ້ອງ ລົງເກັບກູ້ເອົາສອງສົບດັ່ງກ່າວ ມາທຳພິທີທາງສາສະໜາ, ປັດຈຸບັນ ສາມາດສັນລະສູດໄດ້ແລ້ວວ່າເປັນລູກຂອງໃຜ ແລະ ພໍ່ແມ່ ໄດ້ຢືນຢັນແລ້ວວ່າເປັນລູກຂອງຕົນແທ້, ໂດຍອີງໃສ່ເສື້ອຜ້າທີ່ນຸ່ງຫົ່ມ.
ຈາກເຫດການຄູກັນນ້ຳເຂື່ອນໄຟຟ້າເຊປຽນ-ເຊນໍ້ານ້ອຍແຕກ ຢູ່ເມືອງສະໜາມໄຊ ໃນວັນທີ 23 ກໍລະກົດຜ່ານມາ ມີຕົວເລກຜູ້ສູນຫາຍທັງໝົດ 65 ຄົນ, ປັດຈຸບັນ ພົບແລ້ວ 42 ສົບ ແລະ ຍັງເຫລືອເປົ້າໝາຍ ທີ່ຍັງຕ້ອງຄົ້ນຫາ ອີກ 23 ສົບ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ຂ່າວສານປະເທດລາວ