ໃນວັນທີ 5 ທັນວາ 2018, ນອກຈາກ ບັນດາສະມາຊິກສະພາແຫ່ງຊາດ (ສສຊ) ຈະພິຈາລະນາ ແລະ ຮັບຮອງ ເອົາການແຕ່ງຕັ້ງ ລັດຖະມົນຕີ ກະຊວງປ້ອງກັນຄວາມສະຫງົບຄົນໃໝ່ ແລະ ຜູ້ວ່າການທະນາຄານແຫ່ງ ສປປ ລາວ ແລ້ວ, ສສຊ ຍັງຮັບຮອງເອົາ ຊົນເຜົ່າບຣູ ເປັນຊົນເຜົ່າໃນວົງຄະນະຍາດແຫ່ງຊາດຂອງລາວ ດ້ວຍຄະແນນສຽງ 93% ຂອງຈໍານວນທັງໝົດ 121 ທ່ານ. ຈາກເມື່ອກ່ອນມີ 49 ເຊົ່າເຜົ່າ ປັດຈຸບັນ, ສປປ ລາວ ມີຊົນເພີ່ມຕື່ມເປັນ 50 ຊົນເຜົ່າ.

ການຮັບຮອງດັ່ງກ່າວ, ສະເໜີໂດຍ ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ທີ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີVIII, ເນື່ອງຈາກໄດ້ເຫັນເຖິງຄວາມສໍາຄັນ ແລະທ່າແຮງຂອງຊົນເຜົ່າທີ່ຈະຊ່ວຍໃນການສ້າງສາພັດທະນາປະເທດຊາດ ແລະ ຊ່ວຍທັບມ້າງຕີຖອຍກໍາລັງອິດທິປໍລະປັກຢູ່ພາຍໃນ ແລະ ຕ່າງປະເທດ ທີ່ຫວັງແຕ່ຈະສ້າງຄວາມບໍ່ສະຫງົບໃນ ສປປ ລາວ ດັ່ງນັ້ນ, ສສຊ ຈຶ່ງປະກອບຄໍາເຫັນ ແລະ ເຫັດດີຮັບຮອງເອົາຊົນເຜົ່າບຣູ ເປັນຊົນເຜົ່າທີ50 ຂອງ ສປປ ລາວ.

ຊົນເຜົ່າບຣູ ເປັນອີກຊົນເຜົ່າຫນຶ່ງທີ່ມີປະຫວັດຄວາມເປັນມາຍາວນານ ໂດຍພື້ນຖານການດໍາລົງຊີວິດສ່ວນໃຫຍ່ຕັ້ງຖິ່ນຖານຢູ່ເຂດພາກກາງຫາພາກໃຕ້ຂອງ ສປປ ລາວ ໂດຍສະເພາະຢູ່ແຂວງຄໍາມ່ວນ, ສະຫວັນນະເຂດ ແລະ ແຂວງອື່ນໆ. ຊົນເຜົ່າດັ່ງກ່າວ, ມີຂະນົບທໍານຽມ ແລະ ຮີດຄອງປະເພນີອັນດີງາມທີ່ເປັນເອກະລັກ ທີ່ສໍາຄັນມີພາສາປາກເວົ້າເປັນຂອງຕົ້ນເອງອີກດ້ວຍ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: laoedaily.com.la, Lao National Radio

ຮູບພາບຈາກ:  laoedaily.com.la