ພາຍຫຼັງ, ລັດຖະມົຕີກະຊວງສາທາລະນະສຸກ ໄດ້ຂຶ້ນຊີ້ແຈງກ່ຽວກັບຄຸນນະພາບການບໍລິການ, ການປິ່ນປົວຢູ່ໂຮງໝໍ-ສຸກສາລາ ແລະ ທິດທາງແກ້ໄຂໃນຕໍ່ໜ້າ ອ່ານຂ່າວກ່ອນໜ້ານີ້: https://laopost.com/?p=107106&preview=true ສະມາຊິກສະພາແຫ່ງຊາດ (ສສຊ) ໄດ້ປະກອບຄໍາຄິດເຫັນ ໂດຍໃຫ້ສາທາເອົາໃຈໃສ່ການລົງທຶນ, ການຄຸ້ມຄອງໂຮງໝໍ ແລະ ຮ້ານຂາຍຢາ, ການນໍາໃຊ້ບັດປະກັນສຸຂະພາບໃຫ້ເປັນເອກະພາບລະຫວ່າງໂຮງໝໍເມືອງກັບແຂວງ ແລະ ອື່ນໆ.
ວັນທີ 29 ພະຈິກ 2018 ທີ່ກອງປະຊຸມສະໄໝສາມັນເທື່ອທີ6 ຂອງສະພາແຫ່ງຊາດຊຸດທີ VIII ສສຊ ໄດ້ປະກອບຄໍາຄິດຄໍາເຫັນ ດ້ານວຽກງານສາທາລະນະສຸກ ໂດຍຝາກໃຫ້ມີການລົງທຶນສ້າງໂຮງໝໍ ແລະ ສຸກສາລາໃຫ້ຫຼາຍຂຶ້ນ ເພື່ອຫຼຸດຜ່ອນການໄປປິ່ນປົວຢູ່ປະເທດເພື່ອນບ້ານ, ສ້າງບຸກຄະລາກອນໃຫ້ຕິດພັນກັບການບໍລິການ, ຄຸ້ມຄອງໂຮງໝໍເອກະຊົນ ແລະ ຮ້ານຂາຍຢາ ສ້າງບຸກຄະລາກອນເພື່ອຄຸ້ມຄອງອຸປະກອນການແພດ, ການນໍາໃຊ້ບັດປະກັນສຸຂະພາບຍັງບໍ່ທັນເປັນເອກະພາບລະຫວ່າງໂຮງໝໍເມືອງ ແລະ ແຂວງ ການນໍາສົ່ງຄົນເຈັບຈາກເມືອງໄປແຂວງຍັງມີຄວາມຊັກຊ້າ ບາງຄັ້ງກໍເມີນເສີຍ ການບົ່ງມະຕິພະຍາດຍັງບໍ່ຖືກຕ້ອງ ແພດໝໍທີ່ປະຈໍາຢູ່ສຸກສາລາຍັງບໍພຽງພໍຕໍ່ຄົນເຈັບ. ນອກນັ້ນ, ຍັງມີການໂຄສະນາເກີນເຫດ ແລະ ຢາກໃຫ້ເຂັ້ມງວດໃນການສຶກສາອົບຮົມຈັນຍາບັນ-ຈັນຍາທໍາຂອງແພດໝໍ ແລະ ອື່ນໆ ເພື່ອຍົກສູງດ້ານສຸຂະພາບ ແລະ ການບໍລິການຂອງແພດໝໍໃຫ້ດີຂຶ້ນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: Lao National Radio