ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ເປີດສາຍດ່ວນ 1514 ແລະ ເຟສບຸກ https://www.facebook.com/monre.gov.la ເພື່ອຮັບຄໍາຄິດຄໍາເຫັນຈາກສັງຄົມໂດຍກົງ ໂດຍສະເພາະປະຊາຊົນຜູ້ທີ່ພົບບັນຫາການຊື້-ຂາຍສິດນໍາໃຊ້ທີ່ດິນ, ແບ່ງປັນດິນ ແລະ ໂອນກໍາມະສິດໄປອອກຊື່ຄົນອື່ນໃນໃບຕາດິນຂອບທອງ ທີ່ໄດ້ເສຍເງິນເປັນຈໍານວນຫຼາຍ ເພາະມີການສວຍໃຊ້ຂອງຄົນບາງຈໍານວນ(ນາຍໜ້າ) ອັນເປັນບັນຫາທີ່ຊໍ້າເຮື້ອແກ່ຍາວມາຫຼາຍປີ ແລະ ມີຫາງສຽງຈົມວ່າໃນສັງຄົມ.

ອີງຕາມບົດລາຍງານຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ທີ່ສະເໜີຕໍ່ສະພາແຫ່ງຊາດໃຫ້ຮູ້ວ່າ: ໃນຂະແໜງທີ່ດິນໄປຄຽງຄູ່ກັບວິຊາສະເພາະ ທາງກະຊວງໄດ້ເພີ່ມທະວີວຽກງານສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານລັດຖະກອນຂະແໜງທີ່ດິນໃຫ້ມີຈັນຍາບັນ, ຈັນຍາທໍາ, ມີທັດສະນະຮັບໃຊ້ປະຊາຊົນຢ່າງສຸດໃຈ ໃນການປະຕິບັດໜ້າທີ່ວຽກງານວິຊາສະເພາະ ແລະ ໄດ້ອອກຂໍ້ຕົກລົງວ່າດ້ວຍຂໍ້ຫ້າມ ແລະ ວິໄນຂອງພະນັກງານຂະແໜງທີ່ດິນ ສະບັບເລກທີ 1369/ກຊສ, ລົງວັນທີ 28 ມີນາ 2018 ເພື່ອປັບປຸງການຄຸ້ມຄອງພະນັກງານລັດຖະກອນບໍ່ໃຫ້ສວຍໃຊ້ຊ່ອງຫວ່າງໄປກະທໍາທີ່ບໍ່ເນາະສົມ.

ພ້ອມນັ້ນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ມີຊ່ອງທາງຕິດຕາມຫາງສຽງສັງຄົມໂດຍຜ່ານທາງໂທລະສັບສາຍດ່ວນ 1514, ເຟສບຸກຂອງກະຊວງ https://www.facebook.com/monre.gov.la ແລະ ຕູ້ຮັບຄໍາຮ້ອງ-ຄໍາສະເໜີຂອງກະຊວງ ເຊິ່ງຜ່ານການຕິດຕາມແຕ່ຕົ້ນປີ 2018 ເຖິງປັດຈຸບັນ ເຫັນວ່າຫາງສຽງກ່ຽງກັບການປະຕິບັດໜ້າທີ່ຂອງພະນັກງານທີ່ດິນ ທີ່ບໍ່ສອດຄ່ອງກັບກົດມາຍ ແລະ ລະບຽບການມີທ່າອ່ຽງຫຼຸດລົງ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມເສດຖະກິດການຄ້າ