ຂົວຂ້າມນ້ຳງື່ມ ບ້ານນາບົງ-ບ້ານທ່າກົກໄຮ ເມືອງປາກງື່ມ ນະຄອນຫຼວງວຽງຈັນ ໄດ້ເປີດນໍາໃຊ້ເປັນທາງການໃນຕົ້ນອາທິດຜ່ານມາ. ຂົວດັ່ງກ່າວ, ໃຊ້ເວລາການກໍ່ສ້າງທັງໝົດ 24 ເດືອນ ຈາກທຶນຊ່ວຍເຫຼືອລ້າຂອງ ທ່ານ ສັກໄຊ ວົງມາລາສິດ ດ້ວຍມູນຄ່າການ103,4 ຕື້ກີບ, ມີລວງຍາວ 220 ແມັດ ກວ້າງ 11 ແມັດ ສາມາດຮັບນ້ຳໜັກໄດ້ 80 ໂຕນ ໂດຍມີອາຍຸນຳໃຊ້ຫຼາຍກວ່າ 50 ປີ.
ທ່ານ ເດດສົງຄາມ ທຳມະວົງ, ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ກ່າວໃນພິທີເປີດນໍາໃຊ້ຂົວຂ້າມດັ່ງກ່າວ ໃນວັນທີ 27 ພະຈິກ 2018 ຜ່ານມາວ່າ: ເນື່ອງຈາກວັນທີ 26 ພຶດສະພາ 2015 ໄດ້ເກີດເຫດເສົ້າສະຫຼົດໃຈແບບບໍ່ຄາດຝັນ ເມື່ອເຮືອແພຂົນສົ່ງນັກຮຽນຈາກບ້ານນາບົງ ເພື່ອໄປສອບເສັງຢູ່ບ້ານທ່າກົກໄຮ ໄດ້ຫຼົ້ມລົງນ້ຳງື່ມ ເຮັດໃຫ້ນັກຮຽນເສຍຊີວິດຈຳນວນຫຼາຍ ທ່ານ ສັກໄຊ ວົງມາລາສິດ ຈຶ່ງໄດ້ສະເໜີຕໍ່ນະຄອນຫຼວງວຽງຈັນ ແລະ ລັດຖະບານ ເພື່ອສ້າງຂົວຂ້າມຢູ່ຈຸດດັ່ງກ່າວ ດ້ວຍທຶນຊ່ວຍເຫຼືອຂອງຕົນເອງ ແລະ ລັດຖະບານ ໄດ້ເຊັນສັນຍາຮັບເອົາການຊ່ວຍເຫຼືອລ້ານັ້ນ.
ຂົວດັ່ງກ່າວ, ໃຊ້ເວລາການກໍ່ສ້າງທັງໝົດ 24 ເດືອນ ເປັນການກໍ່ສ້າງດ້ວຍເບຕົງເສີມເຫຼັກອັດແຮງ ມີລວງຍາວ 220 ແມັດ ແລະ ກວ້າງ 11 ແມັດ (ລວມທັງທາງຄົນຍ່າງ 2 ຟາກ) ສາມາດຮັບນ້ຳໜັກໄດ້ 80 ໂຕນ ແລະ ມີອາຍຸນຳໃຊ້ຫຼາຍກວ່າ 50 ປີເບື້ອງຕົ້ນລວມມູນຄ່າ 105 ຕື້ກີບ ແຕ່ບໍລິສັດໄດ້ເພີ່ມລວງຍາວຂອງຂົວໄປເປັນ 236 ແມັດ ແລະ ກໍ່ສ້າງທາງເບຕົງສົ້ນຂົວເບື້ອງລະ 30 ແມັດ ດັ່ງນັ້ນ, ມູນຄ່າການກໍ່ສ້າງຈຶ່ງເພີ່ມເປັນ 103,4 ຕື້ກີບ ເນື່ອງຈາກການສຳຫຼວດເກັບກຳຂໍ້ມູນ ແລະ ອອກແບບຢ່າງລະອຽດ ທັງອີງໃສ່ສະພາບພື້ນທີ່ຕົວຈິງ ຈຶ່ງມີຄວາມຈຳເປັນຕ້ອງເພີ່ມມູນຄ່າການກໍ່ສ້າງ. ປັດຈຸບັນ, ການກໍ່ສ້າງມີຄວາມຄືບໜ້າ 98% ຂອງໜ້າວຽກທັງໝົດ ໜ້າວຽກທີ່ເຫຼືອເປັນວຽກອະນາໄມ ແລະ ຕົບແຕ່ງເລັກໜ້ອຍ ເຊິ່ງບໍລິສັດຈະສືບຕໍ່ໃຫ້ສຳເລັດໃນໄວໆນີ້.
ພ້ອມນັ້ນ, ບໍລິສັດ ລາວເວີນອະສັງຫາລິມາຊັບ ຈຳກັດ ໄດ້ມອບທຶນການສຶກສາໃຫ້ນັກຮຽນເກ່ງ 91 ຄົນ ແລະ ນັກຮຽນທຸກຍາກ 26 ຄົນ ໃນ 6 ໂຮງຮຽນ ທີ່ຢູ່ໃກ້ຄຽງກັບຂົວ ມູນຄ່າ 89.500.000 ກີບ ຕາງໜ້າມອບໂດຍທ່ານ ບຸນມີ ລັດຕະນະວັນ ນັກທຸລະກິດ ແລະ ຮັບໂດຍທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍມູນຈາກ: ໜັງສືພິມວຽງຈັນໃໝ່