ລັດຖະບານຈີນ ສັ່ງໃຫ້ມີການສອບສວນ ໃນກໍລະນີນັກວິທະຍາສາດຄົນໜຶ່ງ ອ້າງວ່າໄດ້ສໍາເລັດໃນການແກ້ໄຂພັນທຸກໍາ ເພື່ອປ້ອງກັນການຕິດເຊື້ອ HIV.
ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ວ່າ ຄະນະກໍາມາທິການສາທາລະນະສຸກແຫ່ງຊາດ ຂອງ ສປ ຈີນ ອອກຖະແຫຼງຂ່າວໃນຕອນເຊົ້າຂອງວັນທີ 27 ພະຈິກ 2018 ເລື່ອງການແຕ່ງຕັ້ງທີມງານສະເພາະກິດສອບສວນ ສຈ. ເຫີ ຈ້ຽນຂຸຍ ທີ່ໄດ້ໂພສຄລິບໃນເວັບໄຊ ຍູທູບໃນຊ່ວງຕົ້ນອາທິດນີ້ ອ້າງຄວາມສໍາເລັດໃນການໃຫ້ກໍາເນີດເດັກຝາແຝດຍິງ ດ້ວຍວິທີເດັກຫຼອກແກ້ວ ເຊິ່ງໃນຊ່ວງໜຶ່ງຂອງຂະບວນການມີການຕັດແຕ່ງໂຄງສ້າງພັນທຸກໍາບາງຢ່າງ ເພື່ອໃຫ້ເດັກທີ່ເກີດມາມີພູມຕ້ານທານຈາກເຊື້ອໄວຣັສ HIV ໂດຍເດັກນ້ອຍຝາແຝດຍິງຄູ່ນີ້ມີຊື່ວ່າ: ລູລູ່ ແລະ ນານະ ທີ່ໄດ້ມືນຕາເບິ່ງໂລກໃນອາທິດຜ່ານທີ່ມາ.
ນອກຈາກນັ້ນ, ການລາຍງານຂອງ ສຈ. ເຫີ ຈ້ຽນຂຸຍ ໄດ້ຮັບການເຜີຍແຜ່ໃນວາລະສານຂອງສະຖາບັນເຕັກໂນໂລຊີ ແມສຊາຊູເຊດສ (MIT) ແຕ່ກໍຍັງບໍ່ມີຫຼັກຖານອັນໃດທີ່ສາມາດຢືນຢັນຄໍາກ່າວຂອງ ເຫີ ຈ້ຽນຂຸຍ ໄດ້ ລວມເຖິງບົດຄວາມຂອງ MIT ກ່ຽວກັບຜົນງານຂອງ ເຫີ ຈ້ຽນຂຸຍ ໄດ້ລົງທ້າຍວ່າ: “ກໍລະນີດັ່ງກ່າວ, ມີຄວາມຫຼໍ່ແຫຼມທາງຈະລິຍະທໍາ”.
ແນວໃດກໍຕາມ ເຫີ ຈ້ຽນຂຸຍ ຈະເຂົ້າຮ່ວມປະຊຸມລະຫວ່າງປະເທດດ້ານການແພດ ທີ່ຮົງກົງໃນກາງອາທິດນີ້ ແລະ ຈະມີການແລກປ່ຽນຄວາມຄິດເຫັນກ່ຽວກັບປະເດັນດັ່ງກ່າວ ຖ້າຫາກມີຫຼັກຖານ ຫຼື ຂໍ້ມູນໃດທີ່ສາມາດຢືນຢັນວ່າເປັນເລື່ອງຈິງ ຈິ່ງຈະຖືວ່າຜົນງານວິທະຍາສາດຄັ້ງນີ້ເປັນກໍລະນີທໍາອິດຂອງໂລກ.
Gene-edited babies immune to AIDS born in China? The ethic debate continues while an investigation by the health commission of China' Guangdong Province is currently underway pic.twitter.com/lyHhV6aw0k
— CGTN (@CGTNOfficial) November 26, 2018
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: dailynews.co.th