ຍານອາວະກາດ ອິນໄຊ (InSight) ຂອງນາຊາ ໄດ້ລົງຈອດຢູ່ດາວອັງຄານໄດ້ຢ່າງປອດໄພໃນວັນທີ 26 ພະຈິກນີ້ ຫຼັງຈາກທີ່ຜ່ານຜ່າອຸປະສັກການລົງຈອດກວ່າ 7 ນາທີ ທີ່ຄາດວ່າຈະສາມາດລົງຈອດໄດ້ສໍາເລັດ ຫຼື ບໍ່ ແລະ ກຽມພ້ອມກວດສອບໂຄງສ້າງພາຍໃນຂອງດາວອັງຄານເປັນເທື່ອທໍາອິດ.
ສໍານັກຂ່າວຕ່າງປະເທດລາຍງານຈາກນະຄອນຫຼວງ ວໍຊີງຕັນ ສະຫະລັດອາເມລິກາວ່າ: ອົງການບໍລິຫານການບິນ ແລະ ອາວະກາດແຫ່ງຊາດ (ນາຊາ) ອອກຖະແຫຼງການໃນວັນທີ 26 ພະຈິກ 2018 ວ່າ:ພາຍຫຼັງ 7 ນາທີ ທີ່ອັນຕະລາຍໃນການໂຄຈອນຂອງຍານອິນໄຊ ເຂົ້າໃກ້ດາວອັງຄານຫຼາຍທີ່ສຸດເພື່ອຫາທາງລົງຈອດໄດ້ສໍາເລັດຢ່າງປອດໄພ; ແຕ່ກ່ອນຈະຈອດນັ້ນ, ໄດ້ມີການສົ່ງສັນຍານຜ່ານຄື້ນວິທະຍຸພ້ອມຮູບພາບມາທີ່ສູນປະຕິບັດການຂອງນາຊາທີ່ ລອສແອນເຈີລິສ ເວລາ 19:53 ຕາມເວລາສາກົນ (ກົງກັບເວລາ 2:53 ເວລາທ້ອງຖິ່ນຂອງວັນອັງຄານທີ 27 ພະຈິກນີ້).
https://www.facebook.com/NASA/videos/259004648105914/
ຍານ ອິນໄຊ ຈະສໍາຫຼວດໂຄງສ້າງພາຍໃນຂອງດາວອັງຄານ ລວມທັງສະພາບຂອງຊັ້ນຫິນ ແລະ ໂຄງສ້າງທາງທໍລະນິວິທະຍາ ເພື່ອຮວບຮວມຂໍ້ມູນຕ່າງໆ ທີ່ເປັນປະໂຫຍດໃນການສຶກສາວິວັດທະນາການຂອງດາວເຄາະໃນລະບົບສຸລິຍະຈັກກະວານ ເຊິ່ງຍານອິນໄຊ ໄດ້ອອກເດີນທາງຈາກໂລກໃນວັນທີ 5 ພຶດສະພາ 2018 ໂດຍມີກໍານົດປະຕິບັດງານ 24 ເດືອນ (1 ປີໃນດາວອັງຄານ) ໃນການຝັງໄຊໂມມິເຕີ ໃຫ້ເລີກລົງເຖິງພື້ນປະມານ 3-5 ແມັດ ເລີກລົງໄປຫຼາຍກວ່າໃນຄັ້ງກ່ອນ 15 ເທົ່າ ເພື່ອສໍາຫຼວດຊັ້ນຫີນ ແລະ ວັດອຸຫະພູມໃນດາວອັງຄານ.
ການສໍາເລັດໃນຄັ້ງນີ້, ເປັນການຢໍ້າເຕືອນຄວາມກ້າວໜ້າຂອງນາຊາ ທີ່ຍັງເປັນອົງການອາວະກາດພຽງແຫ່ງດຽວຂອງໂລກທີ່ສາມາດສົ່ງຍານສໍາຫຼວດໄປຈອດລົງຢູ່ດາວອັງຄານໄດ້ສໍາເລັດ ໂດຍຕະຫຼອດໄລຍະ 4 ທົດສະວັດຜ່ານມາ ມີຫຼາຍປະເທດພະຍາຍາມຫຼາຍກວ່າ 43 ຄັ້ງໃນການສົ່ງຍານໄປສໍາຫຼວດດາວອັງຄານ ເຊິ່ງສາມາດເຂົ້າສູ່ວົງໂຄຈອນພຽງເຄິ່ງເທົ່ານັ້ນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: thairath.co.th, dailynews.co.th, tnamcot.com