ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບ ກົມກິດຈະການນັກສຶກສາ ກະຊວງສຶກສາທິການ ແລະ ກິລາ (ສສກ) ໄດ້ເປີດນໍາໃຊ້ໂປຣແກຣມລົງທະບຽນໃຫ້ນັກສຶກສາໄດ້ຊອກວຽກໃນລະບົບຂໍ້ມູນຂ່າວສານຕະຫຼາດແຮງງານ ຂຶ້ນໃນວັນທີ 23 ພະຈິກ 2018 ເພື່ອເພີ່ມຄວາມສະດວກ, ວ່ອງໄວທັນໃຈ ແລະ ສະໜອງຂໍ້ມູນໃຫ້ແກ່ບັນດານັກສຶກສາ ຫຼື ຜູ້ທີ່ຕ້ອງການຊອກວຽກເຮັດງານທໍາໃນທົ່ວປະເທດ ແລະ ບັນດານັດທຸລະກິດຜູ້ປະກອບການທັງພາກລັດ-ເອກະຊົນໄດ້ຮັບຮູ້ຂໍ້ມູນຂ່າວສານໃນການຊອກວຽກຂອງກັນ ແລະ ກັນ ໂດຍການສ້າງເວັບໄຊສ໌ລະບົບຂໍ້ມູນຂ່າວສານຕະຫຼາດແຮງດັ່ງຕໍ່ໄປຍນີ້: http://www.lmi.molsw.gov.la
ທ່ານ ບຸນຄົງ ຫຼ້າສຸກັນ, ຮອງລັດຖະມົນຕີ ກະຊວງ ຮສສ ກ່າວວ່າ: “ປັດຈຸບັນ, ກົມພັດທະນາສີມືແຮງງານ ແລະ ຈັດຫາງານ ໄດ້ສ້າງລະບົບຂໍ້ມູນຂ່າວສານຕະຫຼາດແຮງງານໄດ້ສໍາເລັດແລ້ວໂດຍພື້ນຖານ ເຊິ່ງການສ້າງເວັບໄຊສ໌ດັ່ງກ່າວ http://www.lmi.molsw.gov.la ໄດ້ຂະຫຍາຍຕາໜ່າງວຽກງານທີ່ວ່າງ ແລະ ໄດ້ຂຶ້ນທະບຽນຜູ້ຈະຈົບການສຶກສາພ້ອມທີ່ຈະເຜີຍແຜ່ຂໍ້ມູນໄປທົ່ວແຂວງໃນ ສປປ ລາວ ເພື່ອສືບຕໍ່ພັດທະນາລະບົບຂໍ້ມູນຂ່າວສານດັ່ງກ່າວ ໃຫ້ມີຫຼາຍຮູບຫຼາຍສີ ທັງຄົບຖ້ວນ ໂດຍອໍານວຍຄວາມສະດວກຂໍ້ມູນທີ່ຖືກຕ້ອງໃຫ້ປະຊາຊົນ ແລະ ຜູ້ປະກອບການໄດ້ຮັບຂໍ້ມູນຂ່າວສານຕະຫຼາດແຮງງານທີ່ມີຄຸນນະພາບສູງ , ທັນຕາມເວລາ ແລະ ສອດຄ່ອງກັບຄວາມຕ້ອງການຂອງຕະຫຼາດແຮງງານ ອີກທັງສ້າງຄວາມສະດວກໃຫ້ແກ່ ສສກ ໃນການເກັບກໍາປະຫວັດນັກສຶກສາອີກດ້ວຍ.
ທັງນີ້, ຮຽກຮ້ອງໃຫ້ພາກສ່ວນຕ່າງໆໃນສັງຄົມສະໜອງຂໍ້ມູນດ້ານແຮງງານເຂົ້າໃນລະບົບດັ່ງກ່າວ ເຊັ່ນ: ກະຊວງ ສສກ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ກົມສົ່ງເສີມການລົງທຶນ, ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ກະຊວງແຜນການ ແລະ ການລົງທຶນ, ກົມທະບຽນ ແລະ ຄຸ້ມຄອງວິສາຫະກິດ ກະຊວງອຸດສາຫະກໍາ ແລະ ການຄ້າ, ກົມທຸລະກິດພະລັງງານ, ກົມຄຸ້ມຄອງບໍ່ແຮ່ ກະຊວງພະລັງງານ ແລະ ບໍ່ແຮ່ ແລະ ອື່ນໆ ທີ່ເປັນກຸນແຈສໍາຄັນໃນການກະຕຸກຊຸກຍູ້ໃຫ້ຫົວໜ່ວຍແຮງງານ, ຫົວໜ່ວຍລົງທຶນ ໄດ້ສະໜອງຂໍ້ມູນຕາມຄວາມຕ້ອງການ ແຮງງານໃນປັດຈຸບັນ ແລະ ອະນາຄົດ, ທ່ານ ບຸນຄົງ ຫຼ້າສຸກັນ,ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວ.
ສ່ວນກົມກິດຈະການນັກສຶກສາ ກະຊວງ ສສກ ຈະແນະນໍາຜູ້ທີ່ສໍາເລັດການສຶກສາຈາກພາຍໃນ ແລະ ຕ່າງປະເທດ ທັງເທິງພາກລັດ-ເອກະຊົນ ໃຫ້ຂຶ້ນທະບຽນເຂົ້າໃນລະບົບຂໍ້ມູນຂ່າວສານຕະຫຼາດແຮງງານໃນຕໍາແໜງວ່າງ ເພື່ອໃຫ້ນັກສຶກສາທີ່ຮຽນຈົບໃໝ່ ຫຼື ກໍາລັງຊອກວຽກ ລວມເຖິງນັກສຶກສາກຸ່ມເປົ້າໝາຍ ໄດ້ຮັບຂໍ້ມູນຕາມຈຸດປະສົງຂອງຕົນ ນອກນີ້, ວິຊາການທີ່ກ່ຽວຂ້ອງຂອງກະຊວງ ສສກ ຕ້ອງເຮັດໜ້າທີ່ໂຄສະນາເຜີຍແຜ່ແນະນໍາ ການບໍລິການສັງຄົມໃຫ້ມີຄວາມສະດວກວ່ອງໄວ, ມີກົນໄກປະສານງານ, ກົນໄກສະໜອງຂໍ້ມູນໃຫ້ມີປະສິດທິຜົນ ພ້ອມນັ້ນ, ຕ້ອງໄດ້ເຄົາລົບສິດທິ ແລະ ປົກປ້ອງຜົນປະໂຫຍດເຊິ່ງກັນ ແລະ ກັນ ກ່າວໂດຍ ທ່ານ ບົວລານ ສີລິປັນຍາ, ຮອງລັດຖະມົນຕີ ກະຊວງສຶກສາທິການ ແລະ ກິລາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສພິມເສດຖະກິດ-ສັງຄົມ, ໜັງສືພິມເສດຖະກິດການຄ້າ