ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ວັນທີ 21 ພະຈິກ 2018, ສະມາຊິກສະພາແຫ່ງຊາດ (ສສຊ) 6 ເຂດ ໄດ້ສະເໜີຫຼາຍບັນຫາໃຫ້ ລັດຖະບານ ຊອກຫາງຊ່ອງທາງແກ້ໄຂເປັນຕົ້ນ ການແກ້ໄຂບັນຫາຍາເສບຕິດໄດ້ແຜ່ລະບາດໃນໂຮງຮຽນເຂດຕົວເມືອງຈົນຮອດເຂດຫ່າງໄກສອກຫຼີກ ພ້ອມທັງກວດຄືນການເຊົ່າສໍາປະທານທີ່ດິນ; ແບ່ງປັນທີ່ດິນລະຫວ່າງແຂວງຕໍ່ແຂວງ, ເມືອງຕໍ່ເມືອງ ແລະ ບ້ານຕໍ່ບ້ານຍັງບໍ່ທັນຊັດເຈນ; ໃຫ້ລັດຖະບານ ພິຈາລະນາລາຄາຂອງໄຟຟ້າຄືນໃໝ່ ແລະ ບັນຫາອື່ນໆ.

ທ່ານ ສົມດີ ແກ້ວດາລາວິນ ສສຊ ເຂດ 10 ແຂວງວຽງຈັນ ໄດ້ສະເໜີໃຫ້ລັດຖະບານກວດຄືນການເຊົ່າສໍາປະທານທີ່ດິນ ຂອງບັນດາບໍລິສັດ ເນື່ອງຈາກວ່າຍັງມີຫຼາຍໂຄງການທີ່ບໍ່ໄດ້ຈັດຕັ້ງປະຕິບັດ ຂະນະທີ່ປະຊາຊົນຊໍ້າພັດຕ້ອງການເນື້ອທີ່ທໍາການຜະລິດ ນອກນັ້ນ, ບັນຫາຢາເສບຕິດໄດ້ແຜ່ລະບາດເຂົ້າສູ່ໂຮງຮຽນມັດທະຍົມນັບແຕ່ຕົວເມືອງໃຫຍ່ຈົນຮອດເຂດຊົນນະບົດຫ່າງໄກສອກຫຼີກ ເຊິ່ງມີນັກຮຽນຫຼາຍຄົນຕິດຢາເສບຕິດ ຈຶ່ງສະເໜີໃຫ້ພາກສ່ວນກ່ຽວຂ້ອງແກ້ໄຂ.

ທ່ານ ລີເບີ ລີບົວປາວ ສສຊ ເຂດ 11 ແຂວງບໍລິຄໍາໄຊ ສະເໜີໃຫ້ລັດຖະບານຫາວິທີແກ້ໄຂ ຄວາມບອບບາງດ້ານເສດຖະກິດຂອງປະເທດຍັງອ່ອນນ້ອຍ ເຊິ່ງເຫັນໄດ້ຊັດເຈນຫຼັງຈາກທີ່ໄພພິບັດເກີດຂຶ້ນໃນປີນີ້ ຈຶ່ງສະເໜີໃຫ້ລັດຖະບານລົງທຶນໃສ່ຂະແໜງກະສິກໍາ ເນື່ອງຈາກວ່າຫຼາຍກວ່າ 60% ຂອງພົນລະເມືອງລາວ ຢືດຖືອາຊີບການຜະລິດກະສິກໍາ ແລະ ແຮງງານສ່ວນຫຼາຍໃນຂະແໜງການນີ້ ແຕ່ການຂະຫຍາຍຕົວພັດເພີ່ມຂຶ້ນພຽງ 2,5% ເທົ່ານັ້ນ. ດັ່ງນັ້ນ, ຈຶ່ງສະເໜີໃຫ້ລັດຖະບານເອົາໃຈໃສ່ຂະແໜງການດັ່ງກ່າວຕື່ມ.

ທ່ານ ບຸນປອນ ສີສຸລາດ ສສຊ ເຂດ 14 ແຂວງສາລະວັນ ສະເໜີໃຫ້ລັດຖະບານ ແກ້ໄຂບັນຫາການແບ່ງປັນທີ່ດິນຍັງບໍ່ທັນຊັດເຈນ ລະຫວ່າງແຂວງຕໍ່ແຂວງ, ເມືອງຕໍ່ເມືອງ ແລະ ບ້ານຕໍ່ບ້ານ ເຫັນວ່າຍັງບໍ່ທັນມີແຜນ ຫຼື ມາດຕະການລະອຽດເພື່ອມາແກ້ໄຂຢ່າງຈະແຈ້ງ ສ່ວນບັນຫາການລົງທຶນຢູ່ໂຮງງານອຸດສະຫະກຳປຸງແຕ່ງຜະລິດຕະພັນກະສິກຳເຫັນວ່າ ບໍ່ມີການຂະຫຍາຍຕົວເທົ່າທີ່ຄວນ.

ທ່ານ ນາງ ວາລີ ເວດສະພົງ ສສຊ ເຂດ 1 ນະຄອນຫຼວງວຽງຈັນ ໄດ້ປະກອບຄຳເຫັນວ່າ: “ການລົງທຶນດ້ານພະລັງງານບໍ່ແຮ່ໃນປະເທດເຮົາມີຫຼາຍ ແລະ ຂາຍໃຫ້ຕ່າງປະເທດກໍ່ລາຄາຖືກ ໃນຂະນະທີ່ປະເທດເຮົາເອງຜັດຕ້ອງໄດ້ຊື້ນຳເຂື່ອນໄຟຟ້າໃນລາຄາທີ່ແພງກວ່າລາຄາທີ່ຂາຍອອກ; ບັນຫານີ້ເກີດຂຶ້ນຍ້ອນການວາງແຜນ ແລະ ຕະຫຼາດຮອງຮັບບໍ່ໄປຕາມແຜນສົມມຸດຕິຖານໃນເມື່ອກ່ອນ ຈິ່ງເຮັດໃຫ້ປະເທດເຮົາໄດ້ຮັບຜົນກະທົບ. ອີກດ້ານໜຶ່ງ, ປະເທດເຮົາກໍ່ຍັງບໍ່ທັນມີການວາງແຜນພັດທະນາດ້ານພະລັງງານໄຟຟ້າທີ່ດີເທົ່າທີ່ຄວນ ແລະ ລັດຖະບານ ກໍບໍ່ຄວນລົງທຶນເອງໃນບາງເຂື່ອນ ສ່ວນລາຄາຂອງໄຟຟ້າ ຢາກຂໍສະເໜີໃຫ້ລັດຖະບານຄວນເຈລະຈາຄືນໃໝ່ ເພື່ອໃຫ້ເໝາະສົມກວ່າເກົ່າ.

ທ່ານ ທິບພະຈັນ ໂພໄຊ ສສຊ ເຂດ 12 ແຂວງຄຳມ່ວນ ໄດ້ຍົກບັນຫາແຜນການການລົງທຶນຂອງ ສປປ ລາວ ໃນກົດໝາຍວ່າດ້ວຍການສົ່ງເສີມການລົງທຶນ ໄດ້ກຳນົດຈະແຈ້ງວ່າ: “ຕ້ອງໄດ້ສົ່ງເສີມສ້າງສະພາບແວດລ້ອມທີ່ເອື້ອອຳນວຍໃຫ້ນັກທຸລະກິດມີຄວາມສະດວກໃນການລົງທຶນເຮັດທຸລະກິດໃນລາວ” ແຕ່ໃນຕົວຈິງຍັງມີບາງບັນຫາເກີດຂຶ້ນຢູ່ບາງທ້ອງຖິ່ນທີ່ຈັດຕັ້ງປະຕິບັດການສົ່ງເສີມ ແລະ ການດຶງດູດການລົງທຶນຍັງເຮັດບໍ່ທັນໄດ້ດີ ແທນທີ່ຈະປະຕິບັດຕາມລະບຽບກົດໝາຍ ແຕ່ຜັດໄປສ້າງສິ່ງກີດຂວາງໃນການລົງທຶນ ແລະ ກີດກັ້ນການລົງທຶນທັງພາຍໃນ ແລະ ຕ່າງປະເທດ. ສະນັ້ນ, ຈຶ່ງສະເໜີໃຫ້ພາກສ່ວນກ່ຽວຂ້ອງ ລົງໄປຕິດຕາມກວດກາ ແລະ ແກ້ໄຂຕາມທາງຄວນດ້ວຍ.

ທ່ານ ສາຍສະໜອນ ຄົມທະວົງ ສສຊ ເຂດ 6 ແຂວງຫຼວງພະບາງ ໄດ້ປະກອບຄຳເຫັນກ່ຽວກັບການແກ້ໄຂຄວາມທຸກຍາກ ເຫັນວ່າ ຍັງບໍ່ທັນສອດຄ່ອງກັບຕົວຈິງ ແລະ ມີຄວາມຢາກໄດ້ສູງ ແຕ່ຄວາມສາມາດໃນການຈັດຕັ້ງປະຕິບັດຕົວຈິງຍັງມີໜ້ອຍ. ໃນການປະຕິບັດໜ້າທີ່ຂອງພາກສ່ວນຕ່າງໆ ເພື່ອແກ້ໄຂຄວາມທຸກຍາກ ຖ້າທຽບໃສ່ແຜນການກໍຄື ມະຕິຂອງສະພາວາງອອກ ເຫັນວ່າມີຄວາມສ່ຽງທີ່ຈະບໍ່ບັນລຸໄດ້ຕາມລະດັບຄາດໝາຍ ເພາະຄາດໝາຍສູງແຕ່ຄວາມສາມາດຈັດຕັ້ງປະຕິບັດພັດຕໍ່າ.

ຮຽບຮຽງໂດຍ: ໃບບົວ ຈັນທະລັງສີ 

ແຫຼ່ງຂໍ້ມູນຈາກ: ໜັງສືພິມປະຊາຊົນ, ໜັງສືພິມວຽງຈັນໃໝ່, ວິທະຍຸກະຈາຍສຽງແຫ່ງຊາດ

ຮຽບພາບຈາກ: lao national radio