ສາຍໄຟຫ້ອຍກະແຈກກະຈາຍ, ເປັນມະໂລງໂຕງໂຕ້ຍ ຕາມກາງອາກາດເກາະຕິດເສົາໄຟຟ້າ, ຕົ້ນໄມ້ ແລະ ພາດບ່ຽງຫຼັງຄາເຮືອນປະຊາຊົນ ໃນຕົວເມືອງນະຄອນຫຼວງວຽງຈັນ ບໍ່ຈົບງາມ, ບໍ່ເປັນລະບຽບຮຽບຮ້ອຍ ກາຍເປັນບັນຫາທີ່ຢືດເຢືອຍາວນານ ແລະ ເປັນຄຳຖາມທີ່ຫຼາຍຄົນຢາກໄດ້ຄຳຕອບວ່າ: “ ຈະມີການແກ້ໄຂຢ່າງໃດ? ”
ຈາກບັນຫາທີ່ສັງຄົມພົບເຫັນ ແລະ ເກີດຄວາມກັງວົນ, ທີມງານລາວໂພສ ໄດ້ພົວພັນໄປຍັງພະແນກໄປສະນີ, ໂທລະຄົມມະນາຄົມ ແລະ ການສື່ສານ ພ້ອມໝ່ວຍງານວິຊາການຮັບຜິດຊອບວຽກງານດັ່ງກ່າວ ຕ່າງກໍໃຫ້ຂໍ້ມູນໄປໃນທິດທາງດຽວກັນວ່າ: “ບັນຫານີ້, ເກີດຂຶ້ນມາຫຼາຍປີຖືເປັນບັນຫາທີ່ຍັງບໍ່ສາມາດແກ້ໄຂໄດ້ໜົດ ຍ້ອນງົບປະມານບໍ່ພຽງພໍ. ສາເຫດທີ່ສາຍໄຟຕົກ ຫຼື ຢ່ອນຍານຕາມເສົາໄຟຟ້າຕາມທ້ອງຖະໜົນ ຫຼື ບ້ານເຮືອນປະຊາຊົນ ເນື່ອງຈາກເຈົ້າຂອງສາຍໄຟບໍ່ໄດ້ນໍາໃຊ້ບຸກຄະລາກອນວິຊາການສະເພາະມາຕິດຕັ້ງ ແລະ ຂາດຄວາມຮັບຜິດຊອບ ເຖິງວ່າຈະມີສັນຍາກັບລັດວິສາຫະກິດໄຟຟ້າກໍຕາມ ແຕ່ກໍຍັງມີບາງບໍລິສັດແລ່ນສາຍໄຟຂຶ້ນດ້ວຍຕົນເອງ ໂດຍທີ່ບໍ່ແຈ້ງໃຫ້ພາກສ່ວນກ່ຽວຂ້ອງໄດ້ຮັບຊາບ.
ສິ່ງທີ່ເຫັນສ່ວນຫຼາຍນັ້ນບໍ່ແມ່ນສາຍໄຟຟ້າ ເພາະສາຍໄຟຟ້າແມ່ນຢູ່ເທິງສຸດ ແຕ່ເປັນສາຍໂທລະສັບ, ສາຍເຄເບີ້ນ, ສາຍກາບໄຍແກ້ວຂອງພາກລັດ ແລະ ເອກະຊົນຕ່າງໆ ເຊິ່ງພາກສ່ວນທີ່ກ່ຽວຂ້ອງບໍ່ສາມາດລ່ວງລະເມີດໜ້າວຽກຂອງເຈົ້າຂອງໄດ້. ການທີ່ຈະສ້ອມແປງຮືຖອນຕ້ອງໄດ້ປະສານຫາໜ່ວຍງານທີ່ກ່ຽວຂ້ອງ ເຊິ່ງພາກສ່ວນຮັບຜິດຊອບຫຼັກມີ: ບໍລິສັດໂທລະຄົມມະນາຄົມ ຮັບຜິດຊອບສາຍໄຟສາຍໂທລະສັບ, ສາຍເຄເບີ້ນ ແລະ ອື່ນໆ; ຟຟລ ຮັບຜິດຊອບເລື່ອງເສົາໄຟຟ້າ; ພະແນກໄປສະນີ, ຄົມມະນາຄົມ ແລະ ການສື່ສານ ຮັບຜິດຊອບເລື່ອງງົບປະມານ ແລະ ອພບ ຮັບພາກສ່ວນຕົ້ນໄມ້.
ຜ່ານມາມີການແກ້ໄຂ້ດ້ວຍການເອີ້ນຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງມາປະຊຸມກັນ ແລ້ວກໍສັ່ງເກັບມ້ຽນໃຫ້ເປັນລະບຽບ. ໃນກໍລະນີ້ສາຍໄຟຢູ່ຕາມບໍລິເວນຕົ້ນໄມ້, ພາດຕາມເຮືອນປະຊາຊົນ ເຂົາເຈົ້າກໍມີການແກ້ໄຂໄດ້ດີ ແຕ່ກໍມີບາງບ່ອນເທົ່ານັ້ນ ຕົວຢ່າງບ່ອນໃດທີ່ມີຄວາມສ່ຽງທີ່ຈະເກີດອຸບັດຕິເຫດກໍໄດ້ມີການແນະນຳໃຫ້ພວກເຂົາໄດ້ປັບປຸງ ໂດຍໃຫ້ແຕ່ລະບໍລິສັດມີເຄື່ອງໝາຍຢູ່ສາຍໄຟຟ້າຂອງຕົນ ແລະ ກຳນົດໃຫ້ຕໍ່າສຸດ 6 ແມັດ. ປັດຈຸບັນ, ພະແນກໄປສະນີ ໝ່ວຍງານພວກເຮົາໄດ້ມີແຜນການປັບປຸງປ່ຽນຖ່າຍສາຍໄຟດັ່ງກ່າວ ຕອນນີ້, ຢູ່ໃນຂັ້ນຕອນປະສານງານກັບພາກສ່ວນທຸລະກິດທີ່ມີປະສົບການສູງ ແລະ ມີຄວາມຊຳນານໃນການແກ້ໄຂສາຍໄຟ ໃນການວາງແຜນການປະຕິບັດງານ ເຊິ່ງມີທັງໝົດ 26 ເສັ້ນທາງ ທີ່ຈະປັບປຸງຮືຖອນສາຍໄຟສາຍໄຟໂທລະຄົມ ແລະ ເສົາໄຟຟ້າອັນເກົ່າ ໂດຍຈະໄດ້ເລີ່ມລົງປະຕິບັດຢູ່ໃນຕົວເມືອງຕາມລໍາດັບ.
ຂຽນໂດຍ: ໃບບົວ ຈັນທະລັງສີ
ຜູ້ສະໜອງຂໍ້ມູນ: ພະແນກໄປສະນີ, ໂທລະຄົມມະນາຄົມ ແລະ ການສື່ສານ