ຈາກກໍລະນີ, ມີຂ່າວ ” ໃບຂັບຂີ່ລາວບໍ່ສາມາດເດີນທາງໄປຍັງບັນດາປະເທດສະມາຊິກອາຊຽນໄດ້ ຍ້ອນບໍ່ມີພາສາອັງກິດ ” ໃນຊ່ວງຕົ້ນເດືອນ ພະຈິກ, ຕໍ່ມາກອງຄຸ້ມຄອງພາຫະນະການຂັບຂີ່ ໄດ້ເປີດບໍລິການປ່ຽນໃບຂັບຂີ່ທີ່ກໍາລັງໝົດອາຍຸ ຫຼື ບໍ່ມີພາສາອັງກິດ ທີ່ສູນການຄ້າລາວ–ໄອເຕັກ ໂດຍເລີ່ມແຕ່ 16-25 ພະຈິກ 2018.
ໃນວັນທີ 20 ພະຈິກ 2018 ທີມງານ ລາວໂພສ ໄດ້ຕິດຕໍ່ໄປຫາກົມຂົ່ນສົ່ງ ໃຫ້ຮູ້ເຖີງລາຍລະອຽດກໍລະນີການຕໍ່ໃບຂັບຂີ່ຕ່າງແຂວງ ທີ່ຂັ້ນແຂວງອອກໃບຂັບຂີ່ໃຫ້ ແລະ ໄດ້ຄຳຕອບວ່າ ໃບຂັບຂີ່ຕ່າງແຂວງຈະບໍ່ສາມາດໄປຕໍ່ໃນແຂວງອື່ນໄດ້ ເຊັ່ນ: ທ້າວ ກ ຂຶ້ນຊື່ຢູ່ທີ່ຫຼວງພະບາງ ເມື່ອໃບຂັບຂີ່ໝົດອາຍຸຈະຕໍ່ໄດ້ສະເພາະຢູ່ຫຼວງພະບາງເທົ່ານັ້ນ. ໃນກໍລະນີທີ່ໃບຂັບຂີ່ບໍ່ມີພາສາອັງກິດ ອາດຍ້ອນຄວາມຜິດພາດໃນການປະກອບຂໍ້ມູນໃສ່ເອກະສານ ດັ່ງນັ້ນ, ເພື່ອບໍ່ໃຫ້ເກີດບັນຫາຕາມມາ ຄວນມີການກະກຽມຂໍ້ມູນຂອງຕົນใຫ້ຖືກຕ້ອງ ໂດຍສະເພາະຊື່ຕ້ອງໃຫ້ກົງກັບພາສສະປອດ. ປັດຈຸບັນ, ກອງຄຸ້ມຄອງພາຫະນະການຂັບຂີ່ໄດ້ເປີດບໍລິການປ່ຽນໃບຂັບຂີ່ທີ່ກໍາລັງໝົດອາຍຸ ຫຼື ບໍ່ມີພາສາອັງກິດ ທີ່ສູນການຄ້າລາວ–ໄອເຕັກ ຖ້າໄດ້ຮັບຜົນດີກໍອາດຈະມີແຜນໃຫ້ພະນັກງານຂັ້ນແຂວງ ລົງພື້ນທີ່ເປີດໃຫ້ບໍລິການໃນແຂວງນັ້ນໆ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ກົມຂົນສົ່ງ ກະຊວງໂຍທາທິການ