ເມື່ອວັນທີ 13 ພະຈິກ 2018 ທີ່ຜ່ານມາ ກະຊວງການເງິນ ກັບ ບໍລິສັດ ຫຼັກຊັບລ້ານຊ້າງມະຫາຊົນ, ບໍລິສັດ ຫຼັກຊັບ ທຄຕລ-ກທ ແລະ ບໍລິສັດ ຫຼັກຊັບລາວ-ຈີນ ຈຳກັດ ໄດ້ຈັດພິທີເຊັນສັນຍາແຕ່ງຕັ້ງທີ່ປຶກສາດ້ານການເງິນ ແລະ ຕົວແທນຈຳໜ່າຍພັນທະບັດລັດຖະບານ ໂດຍມີ ທ່ານ ອາດສະພັງທອງ ສີພັນດອນ, ຮອງລັດຖະມົນຕີກະຊວງການເງິນ ທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍແຂກຖືກເຊີນເຂົ້າຮ່ວມ.
ເພື່ອເປັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ແຜນງົບປະມານແຫ່ງ ລັດ 5 ປີ (2016 – 2020) ໃຫ້ບັນລຸຕາມເປົ້າໝາຍທີ່ກໍານົດໄວ້, ເນື່ອງຈາກແຫຼ່ງລາຍຮັບງົບປະມານບໍ່ພຽງພໍກັບຄວາມຕ້ອງການທາງດ້ານລາຍຈ່າຍ ລັດຖະບານຈຶ່ງມີຄວາມຈຳເປັນຕ້ອງຊອກຫາແຫຼ່ງທຶນມາດຸ່ນດ່ຽງງົບປະມານແຫ່ງລັດໃນແຕ່ລະປີ ດ້ວຍການລະດົມທຶນຈາກພາຍໃນ ແລະ ຕ່າງປະເທດ ໂດຍກະຊວງການເງິນ ໃນນາມເປັນເສນາທິການໃຫ້ລັດຖະບານ ແລະ ຄຸ້ມຄອງມະຫາພາກກ່ຽວກັບວຽກງານການເງິນ ໄດ້ເລັ່ງເຫັນຄວາມສຳຄັນວຽກງານດັ່ງກ່າວ ຈຶ່ງມີຈຸດປະສົງອອກຈຳໜ່າຍພັນທະບັດລັດຖະບານ ໂດຍຜ່ານຕະຫຼາດຫຼັກຊັບລາວ ເຊິ່ງການອອກຈຳໜ່າຍພັນທະບັດລັດຖະບານຄັ້ງນີ້ ແມ່ນມີຄວາມຕ້ອງການບໍລິສັດທີ່ປຶກສາທາງດ້ານການເງິນ ເພື່ອຈັດຕັ້ງປະຕິບັດວຽກງານດັ່ງກ່າວໃຫ້ສຳເລັດຜົນ.
ສຳລັບການອອກພັນທະບັດລັດຖະບານ ຖືວ່າເປັນໂຄງການຕົ້ນແບບໃນການນຳເອົາພັນທະບັດລັດຖະບານມາຈຳ ໜ່າຍຜ່ານລະບົບຊື້-ຂາຍໃນຕະຫຼາດຫຼັກຊັບລາວຄັ້ງທຳອິດ ຊຶ່ງຜູ້ລົງທຶນທົ່ວໄປທັງພາຍໃນ ແລະ ຕ່າງປະເທດສາມາດຈັບຈອງຖືຄອງໄດ້ ແລະ ກໍສາມາດແລກປ່ຽນຊື້-ຂາຍໃນຕະຫຼາດຫຼັກຊັບລາວ ຊຶ່ງມູນຄ່າການອອກຈຳໜ່າຍພັນທະບັດລັດຖະບານໃນຄັ້ງນີ້ ມີທັງໝົດປະມານ 1.000 ຕື້ກີບ (ໜຶ່ງພັນຕື້ກີບ) ຄາດວ່າຈະເລີ່ມອອກຈຳໜ່າຍໃນຕົ້ນເດືອນທັນວາ ປີ 2018 ແລະ ຫາກຜູ້ລົງທຶນໃດມີຄວາມປະສົງກໍສາມາດຈັບຈອງໄດ້ທີ່ 3 ບໍລິສັດດັ່ງກ່າວ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ໜັງສືພິມປະຊາຊົນ, ໜັງສືພິມວຽງຈັນໃໝ່