ກອງປະຊຸມສະໄໝສາມັນ ຄັ້ງທີ 06 ຂອງສະພາແຫ່ງຊາດ ຊຸດທີ VIII ຈະໄດ້ຈັດຂຶ້ນໃນວັນທີ 20 ພະຈິກ ຫາວັນທີ 21 ທັນວາ 2018 ທີ່ຫ້ອງປະຊຸມສະພາແຫ່ງຊາດ (ຫຼັກ 6) ນະຄອນຫຼວງວຽງຈັນ ໂດຍຈະພິຈາລະນາ ແລະ ຮັບຮອງເອົາ 14 ບັນຫາສໍາຄັນ. ນອກຈາກນັ້ນ, ໃນໄລຍະດຳເນີນກອງດັ່ງກ່າວ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກທົ່ວສັງຄົມ ທີ່ຈະສົ່ງໄປຍັງກອງປະຊຸມ; ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງກອງປະຊຸມໄດ້ຕາມວິທີ ຄື: ໂທລະສັບບໍ່ເສຍຄ່າ ໝາຍເລກ 156, ໂທລະສານ ໝາຍເລກ 021 413 528 ແລະ ສົ່ງເປັນຈົດໝາຍທາງໄປສະນີ ຕູ້ໄປສະນີເລກທີ 662 ແລະ ສົ່ງອີເມລ: na_session@na.gov.la
ບັນດາບັນຫາສໍາຄັນທີ່ຈະຈະພິຈາລະນາ ແລະ ຮັບຮອງບົດລາຍງານມີຄື:
- ພິຈາລະນາ, ຮັບຟັງບົດລາຍງານຂອງ ທ່ານນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນ ປະຈຳປີ 2018 ແລະ ທິດທາງວຽກງານຈຸດສຸມ ໃນປີ 2019 ຂອງລັດຖະບານ
- ລັດຖະມົນຕີກະຊວງການເງິນລາຍງານ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາປີ 2018, ທິດທາງແຜນການປີ 2019 ແລະ ບົດລາຍງານການສະຫຼຸບຂາດຕົວ, ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2017
- ພິຈາລະນາ, ຮັບຮອງເອົາການຊີ້ແຈງຂອງລັດຖະບານຕໍ່ຄຳຊັກຖາມຂອງ 02 ກະຊວງ ຄື: 1. ກະຊວງໂຍທາທິການ ແລະ ຂົນສົ່ງ ຊີ້ແຈງກ່ຽວກັບສະພາບການກໍ່ສ້າງ ແລະ ສ້ອມແປງຖະໜົນຫົນທາງ ໃນໄລຍະຜ່ານມາເຫັນວ່າຄຸນນະພາບຂອງການກໍ່ສ້າງຕໍ່າ ມູນຄ່າການກໍ່ສ້າງສູງ, ແກ່ຍາວເວລາກໍ່ສ້າງ ແລະ ທິດທາງແກ້ໄຂບັນຫາດັ່ງກ່າວໃນຕໍ່ໜ້າມີແນວໃດ; 2. ກະຊວງສາທາລະນະສຸກ ຊີ້ແຈງກ່ຽວກັບຄຸນນະພາບຂອງການບໍລິການ, ການປິ່ນປົວຢູ່ໃນໂຮງໝໍ, ສຸກສາລາ ແລະ ທິດທາງແກ້ໄຂໃນຕໍ່ໜ້າ
- ພິຈາລະນາ, ຮັບຮອງການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນ ເທື່ອທີ 04 ຂອງສະພາແຫ່ງຊາດ ຊຸດທີ VIII ວ່າດ້ວຍການພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບເປົ້າໝາຍການພັດທະນາແບບຍືນຍົງ
- ພິຈາລະນາ, ຮັບຮອງເອົາການແຕ່ງຕັ້ງຜູ້ວ່າການທະນາຄານ ແຫ່ງ ສປປ ລາວ ຕາມການສະເໜີຂອງ ທ່ານນາຍົກລັດຖະມົນຕີ
- ບົດສະເໜີຂອງລັດຖະບານກ່ຽວການຄົ້ນຄວ້າຊື່ເອີ້ນ ຊົນເຜົ່າບຣູ
- ອົງການກວດສອບແຫ່ງລັດລາຍງານແຜນການເຄື່ອນໄຫວວຽກງານ ປະຈຳປີ 2018 ແລະ ທິດທາງແຜນການ ປະຈຳປີ 2019
- ຜົນການກວດສອບບົດສະຫຼຸບຂາດຕົວແຜນງົບປະມານແຫ່ງລັດ ປະຈຳປີ 2017
- ບົດລາຍງານຂອງອົງການກວດກາລັດຖະບານ ກ່ຽວກັບການກວດກາຕາມຜົນການກວດສອບບົດສະຫຼຸບຂາດຕົວ, ແຜນງົບປະມານແຫ່ງລັດ ສົກປີ 2015-2016
- ໄອຍະການປະຊາຊົນສູງສຸດລາຍງານ ແຜນການເຄື່ອນໄຫວວຽກງານກາງສະໄໝ 2016-2018 ແລະ 09 ເດືອນ ປະຈຳປີ 2018, ທິດທາງແຜນການຮອດປີ 2020 ແລະ ວຽກງານຈຸດສຸມ ປະຈຳປີ 2019
- ການຊີ້ແຈງຂອງອົງການໄອຍະການປະຊາຊົນສູງສຸດ ກ່ຽວກັບພາລະບົດບາດໃນການຕິດຕາມກວດກາ, ການລະເມີດສັນຍາກູ້ຢືມທີ່ມີຫຼັກຊັບຄໍ້າປະກັນ ແຕ່ມາດຳເນີນຄະດີອາຍາ ໃນຂໍ້ຫາສໍ້ໂກງຊັບຂອງພົນລະເມືອງ
- ການເຄື່ອນໄຫວວຽກງານຂອງສະພາແຫ່ງຊາດ ຊຸດທີ VIII ກາງສະໄໝ ( 2016 – 2018 ) ປະຈຳປີ 2018, ທິດທາງແຜນການແຕ່ປີ 2019 ຮອດກອງປະຊຸມຄັ້ງປະຖົມມະເລີກ ຂອງສະພາແຫ່ງຊາດ ຊຸດທີ IX ແລະ ແຜນວຽກຈຸດສຸມ ປະຈຳປີ 2019 ຂອງສະພາແຫ່ງຊາດ
- ການສ້າງ ແລະ ປັບປຸງກົດໝາຍຂອງສະພາແຫ່ງຊາດ ປະຈຳປີ 2019
- ແຜນການຕິດຕາມກວດກາຂອງຄະນະປະຈຳສະພາແຫ່ງຊາດ ປະຈຳປີ 2019 ການສ້າງ, ປັບປຸງ ແລະ ທາບທາມຮ່າງກົດໝາຍຈຳນວນ 09 ສະບັບ.
ພ້ອມນັ້ນ, ຄະນະປະຈຳສະພາແຫ່ງຊາດ, ຄະນະເລຂາທິການສະພາແຫ່ງຊາດ ຂໍເຊີນບັນດາພະນັກງານ, ລັດຖະກອນ, ທະຫານ-ຕຳຫຼວດ, ນັກຮຽນ-ນັກສຶກສາ, ປັນຍາຊົນ-ກຳມະກອນ, ຊາວຜູ້ອອກແຮງງານ-ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ຈົ່ງຕິດຕາມການດຳເນີນກອງປະຊຸມສະພາສະໄໝສາມັນຄັ້ງທີ 6 ຂອງສະພາແຫ່ງຊາດ ຊຸດທີ VIII ຄັ້ງນີ້ດ້ວຍ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ສະພາແຫ່ງຊາດ