ເຈົ້າເມືອງວັງວຽງ ຊີ້ແຈ້ງກ່ຽວກັບເຫດການທີ່ນໍ້າຊອງຂຸ້ນເປັນສີດໍາຕັ້ງແຕ່ວັນທີ 10 ພະຈິກ 2018 ເປັນຕົ້ນມາ ຍ້ອນການເຈາະອຸໂມງເສັ້ນທາງລົດໄຟລາວ-ຈີນ ເຂດບ້ານຜາຕັ້ງທີ່ເປັນດິນດໍາ ຫຼື ດິນຂີ້ຖ່ານໄຟ ເຮັດໃຫ້ນໍ້າໃຕ້ດິນທະລຸອອກມາແລ້ວໄຫຼລົງສູ່ນໍ້າຊອງ ເພາະໂຄງການບໍ່ໄດ້ສ້າງບໍ່ບໍາບັດນໍ້າເປື້ອນ. ປັດຈຸບັນ, ຍັງບໍ່ມີບັນຫາປາຕາຍ ແລະ ບໍ່ມີຜົນກະທົບຕ່າງໆກັບນໍ້າຊອງແຕ່ຢ່າງໃດ ສ່ວນນັກທ່ອງທ່ຽວຍັງສາມາດທ່ອງທ່ຽວຕາມນໍ້າຊອງໄດ້ປົກກະຕິ.
ທ່ານ ຄຳຜອງ ດວງວິໄລ ເຈົ້າເມືອງວັງວຽງ ແຂວງວຽງຈັນ ໄດ້ໃຫ້ການສໍາພາດຜ່ານວິທະຍຸກະຈາຍສຽງແຫ່ງຊາດວ່າ: ເຫດການນໍ້າຊອງຂຸ້ນເປັນສີດໍານັ້ນ ແມ່ນເນື່ອງມາຈາກໂຄງການກໍ່ສ້າງທາງລົງໄຟລາວ-ຈີນ ໄດ້ເຈາະອຸມົງຢູ່ບ້ານ ຜາຕັ້ງທາງດ້ານເໜືອຂອງຜາຕັ້ງ ໄດ້ພົບກັບບັນຫານໍ້າໃຕ້ດິນທະລຸອອກມາ ເຮັດໃຫ້ນໍ້າໄຫຼອອກຈາກອຸມົງລົງສູ່ແມ່ນໍ້າຊອງ ດິນທີ່ເຈາະອອກມາເປັນດິນປະເພດດິນດໍາ ແຕ່ຢູ່ທີ່ນັ້ນມີສອງຟາກ ພວກເຂົາໄດ້ເຈາະອຸມົງໄປທາງເໜືອ ແລະ ຂ້າມນໍ້າຊອງເຈາະອຸມົງໄປທາງໃຕ້, ທາງບໍລິສັດກໍ່ສ້າງບໍ່ບໍາບັດນໍ້າເສຍພຽງແຕ່ທາງໃຕ້ເທົ່ານັ້ນ ເພື່ອຮອງຮັບນໍ້າເສຍຈາກການເຈາະອຸມົງດັ່ງກ່າວນັ້ນ ແຕ່ບໍ່ໄດ້ສ້າງບໍ່ບໍາບັດນໍ້າໃນທາງເໜືອ ຈິ່ງເຮັດໃຫ້ນໍ້າໃຕ້ດິນທະລຸອອກມາ ແລະ ເຮັດໃຫ້ນໍ້າຊອງຂຸ້ນເປັນສີດຳ.
ຕໍ່ກັບບັນຫາດັ່ງກ່າວ, ທາງຄະນະນໍາຂັ້ນເມືອງກໍໄດ້ຮັບຊາບ ແລະ ແຕ່ງຕັ້ງພະນັກງານວິຊາການ ແລະ ຜູ້ຮັບຜິດຊອບໂຄງການດັ່ງກ່າວໃນຂັ້ນເມືອງ ພ້ອມຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມຂັ້ນເມືອງ ລົງກວດກາເບິ່ງພື້ນທີ່ຕົວຈິງ ເຫັນວ່າຍັງບໍ່ມີສິ່ງຜິດປົກກະຕິ ຫຼື ຍັງບໍ່ເຫັນມີປາຕາຍ ແລະ ສົ່ງຜົນກະທົບອັນຮ້າຍແຮງຕໍ່ກັບນໍ້າຊອງນັ້ນ ການທ່ຽວຫຼິ້ນຂອງນັກທ່ອງທ່ຽວກໍຍັງຖືໄດ້ວ່າເປັນປົກກະຕິ.
ເພື່ອໃຫ້ເກີດຄວາມເຊື່ອໃຈແກ່ນັກທ່ອງທ່ຽວພາຍໃນ ແລະ ຕ່າງປະເທດ, ປະຊາຊົນທີ່ອາໄສຢູ່ລຸ່ມແມ່ນໍ້າຊອງ ວ່າບັນຫາທີ່ຈະເກີດຂຶ້ນຈະມີຜົນກະທົບຕໍ່ກັບສັດ ແລະ ປະຊາຊົນທີ່ອາໄສຢູ່ຕອນລຸ່ມຂອງແມ່ນໍ້າຊອງ ອົງການປົກຄອງເມືອງວັງວຽງໄດ້ເຮັດບົດລາຍງານເຖິງພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງວຽງຈັນ ເພື່ອໄປກວດກາວັດແທກກ່ຽວກັບບັນຫາດັ່ງກ່າວ; ສິ່ງສໍາຄັນຢາກຮູ້ວ່າມັນຈະສົ່ງຜົນກະທົບຕໍ່ກັບສິ່ງແວດລ້ອມແທ້ບໍ່ ຫຼື ຈະໄດ້ມາດຕະຖານທີ່ຈະປ່ອຍລົງສູ່ແມ່ນໍ້າໄດ້ບໍ່ ເຊິ່ງຄາດວ່າໜ່ວຍງານທີ່ກ່ຽວຂ້ອງຂອງພະແນກດັ່ງກ່າວຈະລົງໄປກວດຄືນອີກເທື່ອໜຶ່ງໃນໄວໆນີ້.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ວິທະຍຸກະຈາຍສຽງແຫ່ງຊາດ