ເມື່ອວັນທີ 13 ພະຈິກ 2018 ສຳນັກຂ່າວ ເອເອຟພີລາຍງານວ່າ ຮູບຖ່າຍດາວທຽມຈາກພາກເອກະຊົນໃນສະຫະລັດອາເມລິກາກວດພົບຖານຍິງຂີປະນາວຸດຫຼາຍແຫ່ງໃນເກົາຫຼີເໜືອ ເຊິ່ງທາງການເກົາຫຼີເໜືອບໍ່ເຄີຍເປີດເຜີຍມາກ່ອນ.
ຮູບຖ່າຍດາວທຽມດັ່ງກ່າວໄດ້ມີການເປີດເຜີຍຄັ້ງທຳອິດຜ່ານ ນິວຢອກທາມ ໜຶ່ງໃນສື່ຂອງສະຫະລັດ ອ້າງອີງຈາກໂຄງການ ບີຍອນ ພາຣາເຣລ ຂອງສູນສຶກສາດ້ານຍຸດທະສາດນານາຊາດ ພົບຖານເກັບຂີປະນາວຸດໃນເກົາຫຼີເໜືອທີ່ປົກປິດຢູ່ 13 ແຫ່ງ ແຕ່ຄາດວ່າມີບໍ່ຕໍ່າກວ່າ 20 ແຫ່ງ ໂດຍສະເພາະທີ່ເມືອງ ຊັກກັນໂມລ ທາງຕາເວັນຕົກສ່ຽງເໜືອຈາກນະຄອນຫຼວງໂຊລຂອງເກົາຫຼີໃຕ້ໄປປະມານ 136 ກິໂລແມັດ.
ຫຼັກຖານດັ່ງກ່າວໄດ້ຕອກຢໍ້າຂໍ້ຫາທີ່ວ່າເກົາຫຼີເໜືອຍັງຄົງເດີນໜ້າພັດທະນາເຕັກໂນໂລຢີຂີປະນາວຸດຂ້າມທະວີບ ຫຼື ໄອຊີບີເອັມ ເຖິງແມ່ນວ່າຈະມີການລົງນາມໃນຂໍ້ຕົກລົງປົດອາວຸດນິວເຄຣຍກັບສະຫະລັດແລ້ວກໍ່ຕາມ.
ຖານຂີປະນາວຸດເຫຼົ່ານີ້ຍັງມີການເຄື່ອນໄຫວຢູ່ ແລະ ສາມາດເກັບໄດ້ຕັ້ງແຕ່ຂີປະນາວຸດວິຖີໂຄ້ງພິໄສສັ້ນ ຫຼື SRBM ໄປຈົນເຖິງຂີປະນາວຸດຂ້າມທະວີບ ເຊິ່ງກ່ອນການລົງນາມ ທາງເກົາຫຼີເໜືອຄວນຕ້ອງເປີດເຜີຍຖານເຫຼົ່ານີ້ເພື່ອໃຫ້ໜ່ວຍງານສາກົນກວດສອບ ແລະ ເຂົ້າສູ່ຂະບວນການປົດອາວຸດນິວເຄຣຍຢ່າງຖາວອນ ແລະ ກວດສອບໄດ້.
ສຳນັກງານຂ່າວກອງກາງຂອງສະຫະລັດ ຫຼື ຊີໄອເອ ປະຕິເສດທີ່ຈະສະແດງຄວາມຄິດເຫັນໃດໆ ແຕ່ລາຍງານລະບຸວ່າຖານຂີປະນາວຸດເຫຼົ່ານີ້ຂອງເກົາຫຼີເໜືອເປັນທີ່ຮັບຮູ້ຢູ່ແລ້ວຂອງຊີໄອເອ. ສ່ວນດ້ານປະທານາທິບໍດີ ໂດນັລ ທຣໍ້າຍັງບໍ່ເຄີຍອອກມາປະກາດຍອມຮັບວ່າເປັນຈິງ ຫຼື ບໍ່ ຫຼັງເຄີຍປະກາດໄວ້ວ່າ “ໄພຄຸກຄາມນິວເຄຣຍຈາກເກົາຫຼີເໜືອຈົບລົງແລ້ວ”.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: khaosod.co.th
ວິດີໂອປະກອບ: CNN