ກົມສ່ວຍສາອາກອນ ກະຊວງການເງິນ ຮ່ວມກັບທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ເປີດບໍລິການຊຳລະຄ່າພາສີທີ່ດິນຜ່ານທາງລະບົບທະນາຄານ ໃນມື້ວານນີ້, ວັນທີ 14 ພະຈິກ 2018 ເຊິ່ງໄລຍະທຳອິດຈະເປີດໃຫ້ກະຊວງການເງິນ ແລະ ທຄຕລ ເປີດນຳໃຊ້ທົດລອງກ່ອນ 1 ອາທິດ ຈາກນັ້ນ, ຈະເປີດໃຫ້ປະຊາຊົນໃນນະຄອນຫຼວງວຽງຈັນ ແລະ ຈະເປີດນຳໃຊ້ຢ່າງເປັນທາງການທົ່ວປະເທດ ວັນທີ 1 ມັງກອນ 2019.
ການຊຳລະພາສີທີ່ດິນສາມາດຊຳລະໄດ້ 3 ຊ່ອງທາງຄື: ຜ່ານທາງເຄົາເຕີ້ ທຄຕລ, ແຜນແອັບ BCEL one ແລະ ຜ່ານຕົວແທນ ທຄຕລ ທົ່ວປະເທດ. ສຳລັບເອກະສານປະກອບໃນການຊຳລະພາສີທີ່ດິນ ຜ່ານລະບົບຂອງທະນາຄານດັ່ງກ່າວ, ມີຄື: ໃບຕາດິນ, ໃບຢັ້ງຢືນສິດນຳໃຊ້ ພ້ອມໃບຮັບເງິນຊຳລະປີສຸດທ້າຍທີ່ໄດ້ຊຳລະ ເຊິ່ງສາມາດໃຊ້ສຳເນົາ ຫຼື ຕົ້ນສະບັບກໍໄດ້ ຫຼັງຈາກຊຳລະແລ້ວ ຈະໄດ້ຮັບໃບບິນ ເພື່ອເປັນຫຼັກຖານໃນການຊຳລະແກ່ເຈົ້າຂອງໃບຕາດິນ.
ທ່ານ ພູນເພັດ ໄຊສົມບັດ, ຫົວໜ້າກົມສ່ວຍສາອາກອນ ກ່າວວ່າ: ກົມສ່ວຍສາອາກອນໄດ້ຮ່ວມມືກັບ ທຄຕລ ເປັນເທື່ອທຳອິດພັດທະນາລະບົບຮັບຊຳລະຄ່າທຳນຽມທາງຜ່ານ ທຄຕລ ໃນທ້າຍປີ 2017 ແລະ ໄດ້ຮັບຜົນສຳເລັດທີ່ໜ້າພໍໃຈ ໂດຍໄດ້ຮັບຄວາມສົນໃຈ ແລະ ຄວາມເຊື່ອຖືຈາກສັງຄົມຢ່າງກ້ວາງຂວາງ ສືບເນື່ອງໂຄງການດັ່ງກ່າວ, ລັດຖະບານໄດ້ເຫັນວ່າການເກັບລາຍຮັບເຂົ້າງົບປະມານແຫ່ງລັດ ຜ່ານທາງທະນາຄານ ແມ່ນມີຄວາມສະດວກສະບາຍຕໍ່ປະຊາຊົນ ແລະ ພາກລັດ. ສາມາດເກັບລາຍຮັບເຂົ້າງົບປະມານແຫ່ງລັດ ໃຫ້ມີຄວາມຖືກຕ້ອງ, ໂປ່ງໃສ ແລະ ສາມາດກວດຄືນໄດ້.
ຮຽບໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມວຽງຈັນໃໝ່, ເສດຖະກິດການຄ້າ