ເພື່ອໃຫ້ງານບຸນນະມັດສະການພະທາດຫຼວງ ແລະ ງານວາງສະແດງສິນຄ້າ ທີ່ລາວ-ໄອເຕັກ ປະຈຳປີ 2018 ດຳເນີນໄປດ້ວຍບັນຍາກາດເບີກບານມ່ວນຊື່ນ ແລະ ຫຼຸດຜ່ອນບັນຫາການສັນຈອນແອອັດ ທັງຫຼີກລ້ຽງການເກີດອຸບັດຕິເຫດໃນມື້ບຸນດັ່ງກ່າວນໍາ, ປກສ ຈຶ່ງແຈ້ງການກ່ຽວກັບສະຖານທີ່ຈອດລົດ ແລະ ການນຳໃຊ້ເສັ້ນທາງແຕ່ລະເສັ້ນ ໂດຍໄດ້ແບ່ງອອກດັ່ງນີ້:
- ສະເພາະສະຖານທີ່ຈອດລົດປະເພດຕ່າງໆແບ່ງອອກຄື:
- ເຂດ VIP ອະນຸຍາດໃຫ້ຈອດທາງທິດຕະເວັນອອກ ເຂດເຮືອນຊົງລາວ (ບໍລິສັດ CNP).
- ເຂດ P1, P2 ຈອດຢູ່ສະໜາມຫຼວງ ໜ້າຫ້ອງການສະພາແຫ່ງຊາດ.
- ສຳລັບລົດທີ່ມາສົ່ງເຄື່ອງ ເລີ່ມແຕ່ເວລາ 8:00 ຫາ 12:00 ໂມງ ພາຍຫຼັງທີ່ເອົາເຄື່ອງລົງໜົດແລ້ວໃຫ້ເອົາລົດໄປຈອດໄວ້ບ່ອນທີ່ກຳມະການກຳນົດ.
- ລົດຂົນສົ່ງມວນຊົນ, ຕຸກໆ, ຈຳໂບ້, ລົດໂດຍສານອະນຸຍາດໃຫ້ຈອດຊົ່ວຄາວ ເພື່ອສົ່ງຄົນໂດຍສານລົງຕາມຈຸດທີ່ກຳນົດເຊັ່ນ: ເສັ້ນທາງຊ້າງເຜືອກເຂດບ້ານຮ່ອງໄກ່ແກ້ວ, ຕະຫຼາດທາດຫຼວງ, ສີສັງວອນ-ໂພນໄຊ, ປະຕູໄຊ, ໂພນສະອາດ ແລະ ຮ່ອມໂຮງຮຽນມັດທະຍົມໜອງສ້າງທໍ່.
- ລົດໃຫຍ່, ລົດຈັກ, ລົດສາມລໍ້-ລົດຖີບ ທີ່ຈະໄປທ່ຽວບຸນທາດຫຼວງ ແລະ ໄອເຕັກ ໃຫ້ຈອດຕາມສະຖານທີ່ຈອດລົດທີ່ທາງຄະນະກຳມະການຈັດງານກຳນົດໄວ້ ເຊິ່ງເຈົ້າໜ້າທີ່ຈະອຳນວຍຄວາມສະດວກຕາມຈຸດຕ່າງໆ.
- ພາຫະນະທີ່ມາແຕ່ເສັ້ນທາງ 13 ເໜືອໃຫ້ຈອດຢູ່ສະຖານທີ່ຈອດລົດປະຕູໄຊ ແລະ ໜ້າທະນາຄານອິນດູຈີນ, ທາງຮ່ອມບ້ານສີບຸນເຮືອງ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງໃຫ້ກັບສິ່ງອື່ນໆ.
- ພາຫະນະທີ່ມາແຕ່ເສັ້ນທາງ 13 ໃຕ້ ແລະ ເສັ້ນທາງເລກ 10 ບ້ານເກີນ ອະນຸຍາດໃຫ້ຈອດລຽບຕາມເສັ້ນທາງຮ່ອມເຂດບ້ານໂພນພະເນົາ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງໃຫ້ກັບສິ່ງອື່ນໆ.
- ພາຫະນະທີ່ມາແຕ່ເສັ້ນທາງ ທ່າເດື່ອ, ເມືອງຫາດຊາຍຟອງ ໃຫ້ຈອດລຽບຕາມເສັ້ນທາງຮ່ອມເຂດບ້ານສະພັງໜໍ້ ແລະ ເສັ້ນທາງໂພນສີນວນ (ສະເພາະລົດເມ, ລົດໂດຍສານ ແລະ ລົດ 6 ລໍ້ຂຶ້ນໄປ).
- ພາຫະນະທີ່ມາແຕ່ບ້ານຊຳເຄ້, ນາຄວາຍ, ດຳຄຳຊ້າງ, ຊຽງດາ ໃຫ້ຈອດຢູ່ສະຖານທີ່ຕະຫຼາດຫົວຂົວ.
- ພາຫະນະທີ່ມີຈຸປະສົງມາທ່ຽວງານວາງສະແດງສິນຄ້າລາວ-ໄອເຕັກ ໃຫ້ຈອດຢູ່ເດີ່ນສູນການຄ້າລາວ-ໄອເຕັກ.
- ສຳລັບການນຳໃຊ້ເສັ້ນທາງໃນຊ່ວງໄລຍະຈັດງານບຸນ:
- ພາຫະນະທີ່ມາແຕ່ເສັ້ນທາງເລກ 13 ໃຕ້, ເລກ 10 ຫຼື ເສັ້ນທາງດອນໜູນຕໍ່ໃສ່ເສັ້ນທາງໄກສອນພົມວິຫານ ຖ້າບໍ່ມີຈຸດປະສົງຈະມາທ່ຽວບຸນທາດຫຼວງ ເມື່ອມາຮອດໄຟແດງໜອງໜ່ຽງ (ຫໍປະຊຸມແຫ່ງຊາດ) ໃຫ້ລ້ຽວຊ້າຍເຂົ້າໄປເສັ້ນທາງບ້ານໜອງໜ່ຽງອອກໃສ່ບ້ານວັງຊາຍ ຫຼື ລ້ຽວຂວາອອກໄປເສັ້ນທາງ 150 ຕຽງ ແລ້ວໄປຕາມຈຸດປະສົງຂອງຕົນ.
- ສະເພາະລົດບັນທຸກທີ່ມາແຕ່ເສັ້ນທາງເລກ 13 ເໜືອ ມີຈຸດປະສົງຈະໄປຂົວມິດຕະພາບ ໃຫ້ໃຊ້ເສັ້ນທາງໜອງບຶກ-ດົງໂດກອອກມາເສັ້ນທາງ 450 ປີໄປຂົວມິດຕະພາບ.
- ລົດບັນທຸກທີ່ມາແຕ່ເສັ້ນທາງເລກ 13 ເໜືອ ມີຈຸປະສົງຈະໄປເສັ້ນທາງ 13 ໃຕ້ ຖ້າມາຮອດ 3 ແຍກໜອງບຶກໃຫ້ລ້ຽວຊ້າຍໄປຕາມເສັ້ນທາງໜອງບຶກ ເມື່ອຮອດໄຟແດງດົງໂດກໃຫ້ລ້ຽວຊ້າຍໄປຕາມຈຸດປະສົງ.
- ລົດບັນທຸກທີ່ມາແຕ່ຂົວມິດຕະພາບທີ່ຈະໄປເສັ້ນທາງ 13 ໃຕ້ໃຫ້ໃຊ້ເສັ້ນທາງ 450 ປີ ຮອດ 4 ແຍກໄຟແດງດົງໂດກໃຫ້ລ້ຽວຂວາໄປທາງດອນໜູນແລ້ວໄປຕາມຈຸດປະສົງ.
- ລົດບັນທຸກທີ່ມາແຕ່ຂົວມິດຕະພາບທີ່ຈະໄປເສັ້ນທາງ 13 ໃຕ້ ທີ່ຈະໄປຂົວມິດຕະພາບ ຮອດໄຟແດງຫຼັກ 21 ໃຫ້ລ້ຽວຊ້າຍອອກໄປຊອດເສັ້ນທາງ 450 ປີ ແລ້ວລ້ຽວຊ້າຍໄປຂົວມິດຕະພາບ.
- ໃນກໍລະນີການສັນຈອນມີຄວາມສັບສົນເຈົ້າໜ້າທີ່ຈະແຍກລົດຢູ່ຈຸດໄຟແດງດົງໂດກ ແລະ ໄຟແດງໜອງໜ່ຽງໃຫ້ລ້ຽວຂວາໄປຕາມເສັ້ນທາງດົງໂດກ-ໂພນຕ້ອງ ຫຼື ຮອດໄຟແດງຕານມີໄຊໃຫ້ລ້ຽວຊ້າຍໄປຕາມເສັ້ນທາງຕານມີໄຊ-ດອນແດງ.
- ພາຫະນະທີມາແຕ່ເສັ້ນທາງໜອງໄຮ, ໂພນທັນ, ເສັ້ນທາງມິດຕະພາບທີ່ມີຈຸດປະສົງໃຊ້ເສັ້ນທາງກຳແພງເມືອງແຕ່ໄຟແດງສັງກະສີຫາໄຟແດງທາດຫຼວງ, ຖ້າໄປຮອດໄຟແດງທາດຫຼວງໃຫ້ລ້ຽວຂວາອອກໃສ່ບ້ານໂນນຄໍ້ ແລ້ວໄປຕາມຈຸດປະສົງ (ໃຊ້ສະເພາະມື້ຕັກບາດມື້ບຸນທາດຫຼວງ)
ຂໍ້ມູນດັ່ງກ່າວ, ຄັດຈາກແຈ້ງການ ກອງບັນາທິການ ປກສ ນະຄອນຫຼວງວຽງຈັນ, ເລກທີ 366/ປກສ.ນວ, ວັນທີ 7 ພະຈິກ 2018.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ກອງບັນຊາການ ປກສ ນະຄອນຫຼວງວຽງຈັນ.