ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 33 ແລະ ບັນດາກອງປະຊຸມສຸດຍອດອື່ນໆທີ່ກ່ຽວຂ້ອງ ຈັດຂຶ້ນວັນທີ 13 ພະຈິກ 2018 ທີ່ປະເທດສິງກະໂປ (ປະທານອາຊຽນປີ 2018) ພາຍໃຕ້ຄຳຂວັນ: “ສ້າງປະຊາຄົມອາຊຽນໃຫ້ເຂັ້ມແຂງ ແລະ ທັນສະໄໝ” ກອງປະຊຸມດັ່ງກ່າວ, ຜູ້ນຳອາຊຽນຍັງໄດ້ຮັບຮອງເອົາ 7 ເອກະສານສຳຄັນ ແລະ ຈະສືບຕໍ່ດຳເນີນກອງປະຊຸມໄປຈົນສຳເລັດ.
ກອງປະຊຸມສຸດຍອດຄັ້ງນີ້, ໄດ້ແລກປ່ຽນຄວາມຄິດເຫັນກ່ຽວກັບບັນຫາໃນພາກພື້ນ ແລະ ສາກົນທີ່ພົ້ນເດັ່ນເປັນຕົ້ນ ສະພາບການຢູ່ຕາເວັນອອກກາງ ແຫຼມເກົາຫຼີ ແລະ ອື່ນໆ ເຊິ່ງໂດຍລວມເຫັນວ່າມີຄວາມຄືບໜ້າໄປໃນທາງບວກ ອັນເປັນທ່ວງທ່າທີ່ດີຕໍ່ການສ້າງສັນຕິພາບ ແລະ ສະຖຽນລະພາບໃນພາກພື້ນ ພ້ອມນັ້ນ ຍັງໄດ້ສະແດງຄວາມຍິນດີຕໍ່ຄວາມຄືບໜ້າຂອງການຈັດຕັ້ງປະຕິບັດ ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້ ລວມທັງການປຶກສາຫາລືຮ່າງ ກົດແຫ່ງການປະພຶດທີ່ໄດ້ເລີ່ມເຈລະຈາຕັ້ງແຕ່ຕົ້ນປີ 2018. ໃນກອງປະຊຸມສຸດຍອດອາຊຽນ ຄັ້ງທີ 33 ຜູ້ນຳອາຊຽນໄດ້ຮັບຮອງເອົາ 7 ເອກະສານສຳຄັນຄື:
- ເອກະສານແຜນວຽກເຄືອຂ່າຍເມືອງອັດສະລິຍະອາຊຽນ ເຊິ່ງເປັນບຸູລິມະສິດຂອງສິງກະໂປໃນນາມປະທານ ປີ 2018;
- ລະບຽບການວ່າດ້ວຍການຊ່ວຍເຫຼືອດ້ານກົງສູນແກ່ພົນລະເມືອງອາຊຽນຢູ່ປະເທດທີສາມ;
- ແຜນແມ່ບົດສົ່ງເສີມອາຊຽນ 2025 ການສົ່ງເສີມສິດທິຂອງຄົນພິການ;
- ການຮັບຮອງເອົາວັນຊາວໜຸ່ມອາຊຽນ, ການຈັດຕັ້ງປະຕິບັດບັນຫາການປ່ຽນແປງດິນຟ້າອາກາດ ແລະ ຄວາມພ້ອມໃນການຮັບມືກັບໄພພິບັດ;
- ການສົ່ງເສີມອາຊີບສີຂຽວ ເພື່ອຄວາມສະເໝີພາບ ແລະ ການເຕີບໂຕແບບມີສ່ວນຮ່ວມຂອງປະຊາຄົມອາຊຽນ;
- ການປ່ຽນແປງດິນຟ້າອາກາດ ນຳສະເໜີຕໍ່ກອງປະຊຸມລັດພາຄີຕໍ່ສັນຍາ ສປຊ ວ່າດ້ວຍການປ່ຽນແປງດິນຟ້າອາກາດ ຄັ້ງທີ 24;
- ການຮ່ວມອາຊຽນຕໍ່ກອງປະຊຸມລັດພາຄີຂອງສົນທິສັນຍາວ່າດ້ວຍຄວາມຫຼາກຫຼາຍດ້ານຊີວະນາໆພັນ ຄັ້ງທີ 14.
ໃນວັນທີ 14-15 ພະຈິກນີ້ ທ່ານ ທອງລຸນ ສີສຸລິດ ພ້ອມຄະນະຈະສືບຕໍ່ເຂົ້າຮ່ວມບັນດາກອງປະຊຸມສຸດຍອດທີ່ກ່ຽວຂ້ອງຄື:
- ງານລ້ຽງອາຫານເຊົ້າຂອງຜູ້ນຳອາຊຽນ-ອົດສະຕຣາລີ;
- ກອງປະຊຸມສຸດຍອດອາຊຽນ-ຈີນ ຄັ້ງທີ 21;
- ກອງປະຊຸມສຸດຍອດອາຊຽນ- ສ.ເກົາຫຼີ ຄັ້ງທີ 20;
- ງານລ້ຽງອາຫານທ່ຽງແບບບໍ່ເປັນທາງການຂອງຜູ້ນຳອາຊຽນ ແລະ ແຂກຂອງປະທານ;
- ກອງປະຊຸມສຸດຍອດອາຊຽນ-ຣັດເຊຍ ຄັ້ງທີ 3;
- ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 21;
- ກອງປະຊຸມສຸດຍອດຄູ່ຮ່ວມເສດຖະກິດຮອບດ້ານລະດັບພາກພື້ນ ຄັ້ງທີ 2;
- ງານລ້ຽງອາຫານເຊົ້າແບບບໍ່ເປັນທາງການຂອງຜູ້ນຳອາຊຽນ-ອິນເດຍ;
- ກອງປະຊຸມສຸດຍອດອາຊຽນ-ສະຫະລັດອາເມຣິກາ ຄັ້ງທີ 6;
- ກອງປະຊຸມສຸດຍອດອາຊຽນບວກສາມ ຄັ້ງທີ 21;
- ກອງປະຊຸມສຸດຍອດອາຊີຕາເວັນອອກແບບວົງແຄບ ແລະ ແບບຄົບຄະນະຕື່ມອີກ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່, ໜັງສືພິມປະຊາຊົນ
ຮູບພາບຈາກ: pcoo.gov.ph