ກ່ອນຈະຮອດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 8 ທີ່ຈະໄຂຂຶ້ນໃນທ້າຍເດືອນ ພະຈິກ 2018, ລັດຖະບານໄດ້ເປີດກອງປະຊຸມລັດຖະບານສາມັນ ປະຈໍາເດືອນ ພະຈິກ 2018, ໃນວັນທີ 12 ພະຈິກ ທີ່ຜ່ານມາ ໂດຍເອົາ 8 ບັນຫາສຳຄັນ ຂຶ້ນສະເໜີ ແລະ ລາຍງານຕໍ່ກອງປະຊຸມທີ່ຈະຈັດຂຶ້ນທ້າຍເດືອນນີ້ ເຊິ່ງກອງປະຊຸມດັ່ງກ່າວ, ຍັງຈະສືບຕໍ່ດໍາເນີນເປັນມື້ທີ 2 ໃນວັນທີ 19 ພະຈິກ 2018.
ໃນ 8 ບັນຫາສຳຄັນ ທີ່ລັດຖະບານຈະສະເໜີ ແລະ ລາຍງານຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 8 ກຽມຈະໄຂຂຶ້ນໃນທ້າຍເດືອນ ພະຈິກ 2018, ມີເນື້ອໃນລຸ່ມນີ້:
1. ລາຍງານກ່ຽວກັບການຈັດຕັ້ງປະຕິບັດ ວຽກງານພົ້ນເດັ່ນໃນໄລຍະທີ່ຜ່ານມາ ແລະ ທິດທາງໃນຕໍ່ໜ້າຂອງລັດຖະບານ.
2. ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ງົບປະມານແຫ່ງລັດ, ເງິນຕາ ປີ 2018 ແລະ ແຜນໃນປີ 2019.
3. ລາຍງານການກໍ່ສ້າງ ແລະ ສ້ອມແປງຖະໜົນຫົນທາງໃນໄລຍະຜ່ານມາ
4. ລາຍງານຄຸນນະພາບການບໍລິການປິ່ນປົວຢູ່ໂຮງໝໍ-ສຸກສາລາ ແລະ ທິດທາງແກ້ໄຂໃນຕໍ່ໜ້າ.
5.ລາຍງານວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບເປົ້າໝາຍພັດທະນາແບບຍືນຍົງ (SDGs) ແຕ່ປີ 2016-2018 ແລະ ທິດທາງແຜນການປີ 2019.
6. ລາຍງານຄວາມພ້ອມໃນການສ້າງກົດໝາຍ, ສະເໜີແຜນການສ້າງ ແລະ ປັບປຸງນິຕິກຳປີ 2019.
7. ບົດລາຍງານກ່ຽວກັບການເອີ້ນຊື່ຊົນເຜົ່າ ບຣູ.
8. ລາຍງານຜົນການກວດກາ ຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດ ແຜນງົບປະມານແຫ່ງລັດ ສົກປີ 2015-2016.
ພ້ອມນັ້ນ, ກອງປະຊຸມເຫັນດີເປັນເອກະພາບຮັບຮອງເອົາ ແລະ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາຄິດຄໍາເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນຈະແຈ້ງ, ຮັດກຸມ ແລະ ມີເຫດມີຜົນ ໃຫ້ເປັນຂໍ້ມູນທີ່ເປັນລະບົບຄົບຊຸດນໍາສະເໜີກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ທີ່ຈະພິຈາລະນາຮັບຮອງ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: Lao National Radio