ອຸຍເນັດສ໌ໂກ ປະເມີນການຄຸ້ມຄອງ ແລະ ປົກປັກຮັກສາສະຖານທີ່ແຫຼ່ງມໍລະດົກໂລກຢູ່ ສປປ ລາວ ບາງສະຖານທີ່ທ່ອງທ່ຽວແມ່ນຕ່ຳກວ່າມາດຕະຖານ ບັນຫາຂີ້ເຫຍື້ອ ແລະ ການຈາລະຈອນໃນຕົວເມືອງຍັງບໍ່ເປັນລະບຽບເທື່ອ.
ເມື່ອວັນທີ 9 ພະຈິກ 2018 ທີ່ນະຄອນຫຼວງວຽງຈັນ ໄດ້ຈັດກອງປະຊຸມປະເມີນຜົນກ່ຽວກັບການຄຸ້ມຄອງແຫຼ່ງມໍລະດົກໂລກຢູ່ ສປປ ລາວ ຂອງສູນມໍລະດົກໂລກ ອຸຍເນັດສ໌ໂກຂຶ້ນ ໂດຍການເປັນປະທານຂອງທ່ານ ບົວເງິນ ຊາພູວົງ, ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ສູນມໍລະດົກໂລກ ອຸຍເນັດສ໌ໂກ ໄດ້ລາຍງານການປະເມີນຜົນກ່ຽວກັບການຄຸ້ມຄອງແຫຼ່ງມໍລະດົກໂລກຢູ່ ສປປ ລາວ ເຊິ່ງການປະເມີນຜົນໃນຄັ້ງນີ້ ແມ່ນນຳໃຊ້ຄູ່ມືການປະເມີນກ່ຽວກັບການຄຸ້ມຄອງການທ່ອງທ່ຽວ ແລະ ແຂກທ່ອງທ່ຽວ ຫຼື ເອີ້ນຊື່ຫຍໍ້ວ່າ VTMAT ເຊິ່ງໄດ້ເລີ່ມຈັດຕັ້ງປະຕິບັດແຕ່ເດືອນກັນຍາຜ່ານມາ ຢູ່ເມືອງມໍລະດົກໂລກຫຼວງພະບາງ ໂດຍມີທ່ານ ໂຣບິນ ບາສເຊວ ແລະ ທ່ານ ປີເຕີ ເດບຣິນ ຮ່ວມກັບຫ້ອງການມໍລະດົກໂລກຫຼວງພະບາງ.
ຜ່ານການປະເມີນເຫັນວ່າ ການຄຸ້ມຄອງ ແລະ ປົກປັກຮັກສາສະຖານທີ່ທ່ອງທ່ຽວທີ່ໜ້າສົນໃຈ ສິ່ງແວດລ້ອມ ຊີວະນາໆພັນ ສິ່ງກໍ່ສ້າງ ວັດຖຸບູຮານ ແລະ ສະຖານທີ່ບູຮານຕ້ອງໄດ້ຮັບການປັບປຸງ ບາງສະຖານທີ່ທ່ອງທ່ຽວແມ່ນຕ່ຳກວ່າມາດຕະຖານການຄຸ້ມຄອງຂີ້ເຫຍື້ອຍັງຕ່ຳກວ່າມາດຕະຖານ ແລະ ເປັນບັນຫາທີ່ເພີ່ມຂຶ້ນ ການຄຸ້ມຄອງການຈະລາຈອນໃນຕົວເມືອງ ແລະ ອ້ອມເມືອງຫຼວງພະບາງ ຍັງບໍ່ເປັນລະບົບເທື່ອ ເຊິ່ງຄູ່ມືປະເມີນການຄຸ້ມຄອງການທ່ອງທ່ຽວ ແລະ ແຂກທ່ອງທ່ຽວນີ້ ແນໃສ່ປັບປຸງປະສິດທິພາບຂອງການຄຸ້ມຄອງການທ່ອງທ່ຽວຢູ່ໃນເຂດມໍລະດົກໂລກ ແລະ ການນຳໃຊ້ຊັບພະຍາກອນຢ່າງມີປະສິດທິພາບ ໃນການປົກປັກຮັກສາຄຸນຄ່າມໍລະດົກ ຢູ່ໃນສະຖານທີ່ມໍລະດົກ ແລະ ອື່ນໆ ເຊິ່ງປະກອບສ່ວນເຂົ້າໃນການພັດທະນາແບບຍືນຍົງ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ໜັງສືພິມວຽງຈັນໃໝ່
ຮູບປະກອບ: laodermedia.com