ຫ້ອງວ່າການເມືອງສັງທອງ ນະຄອນຫຼວງວຽງຈັນ ຫ້າມນຳເອົາສັດນ້ຳທີ່ຕາຍຕາມແມ່ນໍ້າຕອນມາຈຳໜ່າຍ ແລະ ບໍລິໂພກ ເນື່ອງຈາກມີສັດນ້ຳ (ປາ) ຕາຍຕາມສາຍແມ່ນ້ຳຕອນ ໂດຍບໍ່ຮູ້ສາເຫດແຕ່ວັນທີ 7 ພະຈິກ 2018 ເປັນຕົ້ນມາ. ປັດຈຸບັນ, ພາກສ່ວນທີ່ກ່ຽວຂ້ອງກຳລັງກວດກາຫາສາເຫດທີ່ເກີດຂຶ້ນ.
ຕໍ່ກັບເຫດການດັ່ງກ່າວ, ຫ້ອງວ່າການເມືອງສັງທອງ ຈຶ່ງໄດ້ອອກແຈ້ງການຫ້າມນຳເອົາສັດນ້ຳທີ່ຕາຍຕາມແມ່ນນໍ້າຕອນມາຈຳໜ່າຍ ແລະ ບໍລິໂພກ ພ້ອມທັງໃຫ້ອຳນາດການປົກຄອງບ້ານ ທີ່ອາໄສຢູ່ຕາມສາຍນໍ້າຕອນ ເປັນເຈົ້າການແຈ້ງປະຊາຊົນທີ່ຫາກິນຢູ່ຕາມສາຍນໍ້າຕອນ ກໍລະນີພົບເຫັນປາ, ສັດນໍ້າທຸກປະເພດທີ່ຕາຍແມ່ນຫ້າມນຳມາບໍລິໂພກ ແລະ ຈຳໜ່າຍຢ່າງເດັດຂາດ, ຖ້າພົບເຫັນສັດນໍ້າທຸກປະເພດໃຫ້ທຳລາຍຖິ້ມດ້ວຍການຝັງ ຫຼື ເຜົາທຳລາຍຖິ້ມ, ຫ້າມນໍາມາປຸງແຕ່ງ ຫຼື ບໍລິໂພກເດັດຂາດ ທັງແຈ້ງໃຫ້ປະຊາຊົນລະມັດລະວັງໃນການນໍ້າໃຊ້ນໍ້າຕອນ. ຖ້າປະຊາຊົນມີອາການຜິດປົກກະຕິ ຈາກການຊົມໃຊ້ນໍ້າຕອນ ໃຫ້ຮີບຮ້ອນໄປພົບແພດຢູ່ໂຮງໝໍ ຫຼື ສຸກສາລາໃກ້ບ້ານໂດຍດ່ວນ.
ນອກຈາກນັ້ນ, ຂະແໜງການທີ່ກ່ຽວຂ້ອງຕ້ອງສົມທົບ ກັບອຳນາດການປົກຄອງບ້ານຕິດຕາມສະພາບສັດນໍ້າໃນສາຍແມ່ນໍ້າດັ່ງກ່າວ, ຫາກມີປະກົດການໃຫ້ຮີບຮ້ອນລາຍງານພາກສ່ວນກ່ຽວຂ້ອງລົງກວດກາ ແລະ ເຮັດບົດລາຍງານໃຫ້ຂັ້ນເທິງເປັນແຕ່ລະໄລຍະ.
ອີງຕາມການບອກເລົ່າຂອງປະຊາຊົນໃນເຂດດັ່ງກ່າວໃຫ້ຮູ້ວ່າ: ຢູ່ເທິງແມ່ນໍ້າຕອນ ມີສວນກ້ວຍ ເຊິ່ງເປັນຂອງນັກລົງທຶນຕ່າງປະເທດ ທີ່ມາເຮັດກະສິກຳຢູ່ເຂດນັ້ນ ຄິດວ່າອາດຈະມີສ່ວນກ່ຽວຂ້ອງກັບການຕາຍຂອງປາຈຳນວນຫຼາຍນີ້ ຈຶ່ງແຈ້ງໃຫ້ເຈົ້າໜ້າທີ່ກ່ຽວຂ້ອງຊ່ວຍເລັ່ງກວດສອບ ແລະ ຫາທາງແກ້ໄຂ ເນື່ອງຈາກວ່າບໍ່ເຄີຍເຫັນປາຕາຍເປັນຈຳນວນຫຼວງຫຼາຍແບບນີ້ມາກ່ອນ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ຫ້ອງວ່າການເມືອງສັງທອງ, ໜັງສືພິມເສດໂະກິດການຄ້າ