ຫຼັງຈາກ, ກະຊວງອຸດສາຫະກຳ ແລະ ການຄ້າ ອອກຄຳສັ່ງຢູດຕິການອອກໃບອະນຸຍາດນຳເຂົ້າເຫຼັກ ແລະ ຊີມັງ ໂດຍລະບຸໃຫ້ບັນດາແຂວງທົ່ວປະເທດນຳເຂົ້າ-ສົ່ງອອກ ດ້ວຍການແຈ້ງພາສີຢູ່ດ່ານໄດ້ເລີຍ ແຕ່ຕ້ອງແມ່ນດ່ານສາກົນເທົ່ານັ້ນ ໂດຍມີຜົນປະຕິບັດໃນຕົ້ນປີ 2019 ເປັນຕົ້ນໄປ ເຖິງແມ່ນວ່າຍັງບໍ່ໄດ້ເລີ່ມປະຕິບັດ ແຕ່ກຸ່ມຜູ້ຜະລິດພາຍໃນໄດ້ສະແດງຄວາມເປັນຫ່ວງຕໍ່ກັບບັນຫາຕະຫຼາດຊີມັງໃນລາວ ເນື່ອງຈາກ, ໃນເວລານັ້ນຊີມັງຂອງຕ່າງປະເທດທີ່ມີສັກກະຍະພາບເໜືອກວ່າຈະຫຼັ່ງໄຫຼເຂົ້າມາ ແລະ ສ້າງຄວາມຫຍຸ້ງຍາກເພີ່ມທະວີຄູນ ທັງທີ່ໂຮງງານພາຍໃນກໍແຂ່ງຂັນກັນເລື່ອງຕະຫຼາດຂ້ອນຂ້າງດຸເດືອດຢູ່ແລ້ວ ໂດຍການຫຼຸດລາຄາລົງຕໍ່າເກີນຈິງທຽບໃສ່ຕົ້ນທຶນ.
ທ່ານ ວັນທອງ ສິດທິກຸນ ປະທານກູ່ມຜູ້ຜະລິດຊີມັງລາວ ສະແດງທັດສະນະຕໍ່ທີມຂ່າວໜັງສືພິມເສດຖະກິດ-ສັງຄົມວ່າ: ຕະຫຼາດຊີມັງລາວເຮົາຍັງນ້ອຍ ທັງມີການຈຳກັດຄວາມຕ້ອງການ ເຊິ່ງໃນທົ່ວປະເທດຕ້ອງການ 4 ລ້ານໂຕນ/ປີ ແຕ່ກຳລັງການຜະລິດ 8 ລ້ານໂຕນ/ປີ. ບັນດາໂຮງງານຂອງລາວເຮົາໄດ້ຍາດສ່ວນແບ່ງຕະຫຼາດພາຍໃນແຂ່ງຂັນກັນຫຼຸດລາຄາເກີນຄວາມເປັນຈິງ ທຽບໃສ່ຕົ້ນທຶນການຜະລິດ ບໍ່ສາມາດຄວບຄຸມໄດ້ ອາດເຮັດໃຫ້ໂຮງງານຂະຫຼາດນ້ອຍ-ກາງລົ້ມລະລາຍ ຫຼື ຢຸດຕິການຜະລິດກໍເປັນໄປໄດ້.
ໃນກໍລະນີຈະສົ່ງຊີມັງອອກໄປຕະຫຼາດຕ່າງປະເທດຍັງພົບບັນຫາຫຼາຍ ເພາະຊີມັງປະເທດເພື່ອນບ້ານອ້ອມຂ້າງເຮົາກໍເກີດສະພາບລົ້ມລະລາຍເຊັ່ນກັນ ແຕ່ສິນຄ້າຂອງເຂົາແຂງແຮງກວ່າເຮົາຫຼາຍ ເປັນຕົ້ນເຕັກໂນໂລຊີ-ກຳລັງການຜະລິດ, ດ້ານການບໍລິການ ແລະ ຕົ້ນທຶນການຜະລິດ ແລ້ວລາຄາສົ່ງກໍຕໍ່າກວ່າເຮົາຫຼາຍ ພ້ອມກັນນັ້ນ, ປະເທດເພື່ອນບ້ານກໍມີນະໂຍບາຍປົກປ້ອງອຸດສາຫະກຳພາຍໃນທີ່ເໝາະສົມ ແລະ ບໍ່ຂັດກັບ WTO ກໍຄືກົນໄກການຄ້າເສລີອາຊຽນ ເຊິ່ງທັງໝົດນີ້ແມ່ນຄວາມເສຍປຽບຂອງຊີມັງລາວ ທ່ານ ວັນທອງ ສິດທິກຸນ ກ່າວ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມເສດຖະກິດ-ສັງຄົມ
ຮຸບພາບຈາກ: laocement.com