ຈາກຂ່າວກ່ອນໜ້ານີ້, ກ່ຽວກັບງານບຸນນະມັດສະການພະຫຼວງ ແລະ ງານຕະຫຼາດນັດ ປະຈຳປີ 2018 ທີ່ຈະຈັດຂຶ້ນໃນລະຫວ່າງວັນທີ 16-22 ພະຈິກ 2018. ມື້ນີ້ຜູ້ຂຽນຈະນຳສະເໜີຂ່າວກ່ຽວກັບການກຳນົດຂອບເຂດສະຖານທີ່ໃນສະໜາມຫຼວງ (ເດີ່ນທາດຫຼວງ) ໂດຍແບ່ງອອກເປັນ 4 ຈຸດໃຫຍ່ ແລະ ມີຈຸດນ້ອຍອີກຫຼາຍບ່ອນ ທີ່ທາງຄະນະຮັບຜິດຊອບຈັດງານໄດ້ອອກກົດລະບຽບຊົ່ວຄາວ ວ່າດ້ວຍການຄຸ້ມຄອງງານບຸນນະມັດສະການພະທາດຫຼວງ ແລະ ງານຕະຫຼາດນັດ ປະຈຳປີ 2018 ວັນທີ 16-22 ພະຈິກ 2018, ເລກທີ 381/ຈວນ, ລົງວັນທີ 31 ຕຸລາ 2018.
ການກຳນົດສະຖານທີ່ຂາຍເຄື່ອງໃນງານບຸນດັ່ງກ່າວ ໂດຍສະເພາະເດີ່ນທາດຫຼວງແບ່ງອອກເປັນ 4 ເຂດຄື:
- ເຂດA: ດ້ານເໜືອນັບແຕ່ຖະໜົນໄກສອນພົມວິຫານ ຫາທາງເຂົ້າສະພາແຫ່ງຊາດດ້ານເໜືອ ເປັນສະຖານທີ່ວາງສະແດງ ແລະ ຈຳໜ່າຍສິນຄ້າຜະລິດຕະພັນພາຍໃນ-ຕ່າງປະເທດ, ສິນຄ້າ ODOP, ເຄື່ອງຊົນເຜົ່າ ແລະ ການບໍລິການທ່ອງທ່ຽວ.
- ເຂດB: ເດີ່ນທາງເຂົ້າສະພາແຫ່ງຊາດ ໃຊ້ເປັນບ່ອນຈອດລົດຂອງແຂກ ການນຳຄະນະກຳມະການຈັດງານ, ການນຳພະນັກງານ ແລະ ຜູ້ເຂົ້າມາພົວພັນວຽກໃນສະພາແຫ່ງຊາດ.
- ເຂດC: ນັບແຕ່ແຈສະພາແຫ່ງຊາດດ້ານໃຕ້ ຫາປະຕູທາງເຂົ້າສວນອະນຸສາວະລີເຈົ້າໄຊເສດຖາ ໃຫ້ເປັນບ່ອນວ່າງເປົ່າ ເພື່ອໃຫ້ມວນຊົນໄດ້ທຽວໄປມາສະດວກ ແລະ ຈະໃຊ້ເປັນທາງແຫ່ຜາສາດເຜິ້ງ; ບ່ອນປະຈຳການຂອງກຳລັງ ປກຊ-ປກສ; ຂອບຮົວກຳແພງເປັນບ່ອນຈັດວາງສະແດງສິນຄ້າ; ເວທີຕີມວຍໃນວັນທີ 16-19 ພະຈິກ 2018; ເດີ່ນຫຍ້າເປັນບ່ອນຂາຍເຂົ້າປຸ້ນ, ຕົ້ມໄກ່ (ມື້ສຸດທ້າຍ).
- ເຂດD: ນັບແຕ່ທາງເຂົ້າປະຕູສວນອະນຸສາວະລີເຈົ້າໄຊເສດຖາ ຫາກຳແພງຮົ້ວສະຖານີໄຟຟ້າເຂດທາດຫຼວງ ເປັນບ່ອນຕັ້ງເວທີສິລະປະມວນຊົນ (ເວທີກາງ), ບ່ອນຕີຄີໃນງານບຸນ, ຜາມກຳມະການ ແລະ ລຽບຕາມກຳແພງເປັນບ່ອນວາງສະແດງສິນຄ້າທີ່ມີມາດຕະຖານ.
ສຳລັບເຂດເດີ່ນອ້ອມວັດທາດຫຼວງໃຕ້ ເປັນບ່ອນບໍລິການຫ້ອງນ້ຳສາທະລານະ, ຂາຍເຄື່ອງທີ່ລະນຶກ ແລະ ທາງທິດຕາເວັນອອກເປັນເວລທີໝໍລຳເລື່ອງ; ວັດທາດຫຼວງເໜືອ ເປັນບ່ອນຂາຍເຄື່ອງໄຫວເທດສະການທາງດ້ານສາສະໜາ, ວັດທະນາທຳ ແລະ ການທ່ອງທ່ຽວ (ລວມທັງບໍລິເວນວັດທາດຫຼວງໃຕ້-ເໜືອ). ນອກຈາກນັ້ນ, ບໍລິເວດຟຸດບາດທີ່ອ້ອມຮອບເປັນຈຸດຂາຍເຂົ້າຫຼາມ, ປີ້ງໄກ່, ສິນຄ້າຫັດຖກຳລາວ, ແຜ່ນຊີດີ ແຕ່ບໍ່ໃຫ້ກວມເອົາທາງຍ່າງ.
ການກຳນົດສະຖານທີ່ດັ່ງກ່າວ, ຢູ່ໃນກົດລະບຽບຊົ່ວຄາວ ວ່າດ້ວຍການຄຸ້ມຄອງງານບຸນນະມັດສະການພະທາດຫຼວງ ແລະ ງານຕະຫຼາດນັດ ປະຈຳປີ 2018 ວັນທີ 16-22 ພະຈິກ 2018, ເລກທີ 381/ຈວນ, ລົງວັນທີ 31 ຕຸລາ 2018, ມາດຕາທີ2 ວ່າດ້ວຍການກຳນົດວັນ, ເວລາ ແລະ ຂອບເຂດສະຖານທີ່ຂອງການຈັດງານ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່