ນະຄອນຫຼວງວຽງຈັນ ໄດ້ຖະແຫຼງຂ່າວກ່ຽວກັບງານບຸນນະມັດສະການພະທາດຫຼວງວຽງຈັນ ທີ່ຈະຈັດຂຶ້ນໃນກາງເດືອນນີ້ ລະຫວ່າງວັນທີ 16-22 ພະຈິກ 2018. “ການຈັດງານບຸນປີນີ້, ມີຫຼາຍກິດຈະກຳເປັນຕົ້ນ ການສະເຫຼີມສະຫຼອງບຸນນະມັດສະການພະທາດຫຼວງ ແລະ ວາງສະແດງສິນຄ້າປີ 2018 ເຊິ່ງງານວາງສະແດງສິນຄ້າຈະຈັດຂຶ້ນ 2 ຈຸດຄື: ຢູ່ສະໜາມຫຼວງ (ເດີ່ນທາດຫຼວງ) ແລະ ສູນການຄ້າລາວ-ໄອເຕັກ; ໃນນັ້ນ, ສະໜາມຫຼວງ ອະນຸຍາດໃຫ້ວາງສະແດງ, ຈຳໜ່າຍສະເພາະສິນຄ້າພາຍໃນ ແລະ ຜະລິດຕະພັນໂອດ໋ອບ ເລີ່ມແຕ່ວັນທີ 16-22 ພະຈິກ; ສ່ວນສູນການຄ້າລາວ-ໄອເຕັກ ຈຳໜ່າຍສິນຄ້າພາຍໃນ ແລະ ຕ່າງປະເທດແຕ່ວັນທີ 16-25 ພະຈິກ” ກ່າວໂດຍ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ.
ພ້ອມນັ້ນ, ທ່ານໄດ້ກ່າວອີກວ່າ: “ປີນີ້, ມີຄວາມແຕກຕ່າງກັບປີຜ່ານມາ ໂດຍເນັ້ນຄວາມເປັນລະບຽບຮຽບຮ້ອຍ ຮັກສາໄດ້ຮີດຄອງປະເພນີ ແລະ ວັດທະນະທຳ ໂດຍສະເພາະບໍລິເວນສະໜາມຫຼວງ ຈະເນັ້ນແຕ່ວັດທະນະທຳທີ່ເປັນເອກະລັກຂອງລາວ, ສະແດງສິລະປະພື້ນເມືອງ, ຂັບ-ລຳ ລະຄອນພື້ນເມືອງ, ຮ້ອງເພງ ແລະ ອື່ນໆ. ນອກຈາກນີ້, ກົມຮູບເງົາຈະນຳເອົາຮູບເງົາຈີນ ແລະ ຮູບເງົາລາວມາສາຍໃຫ້ປະຊາຊົນໄດ້ຊົມ ເພື່ອສ້າງບັນຍາກາດຟົດຟື້ນມ່ວນຊື່ນ. ສ່ວນສູນການຄ້າລາວ-ໄອເຕັກ ຈະມີການສະແດງຮ້ອງເພງ ແລະ ການສະແດງຂອງສິລະປິນຕ່າງປະເທດຈຳນວນໜຶ່ງ”.
ສຳລັບຂໍ້ຫ້າມໃນງານບຸນຄັ້ງນີ້ມີຄື:
- ຫ້າມຂາຍ ແລະ ນຳເອົາຢາເສບຕິດ, ສິ່ງມຶນເມົາ, ອາວຸດທຸກປະເພດ ແລະ ສິ່ງຕ້ອງຫ້າມຕ່າງເຂົ້າມາໃນງານ, ຂອງລອກຮຽນແບບ, ສິນຄ້າລາມົກອະນາຈານ ແລະ ສິນຄ້າຜິດກົດໝາຍ
- ຫ້າມດື່ມສິ່ງມຶນເມົາ
- ຫ້າມອາລະວາດຕີກັນ
- ຫ້າມຂາຍເຄື່ອງຊະຊາຍ, ວາງສິນຄ້າອອກມານອກຮ້ານ ແລະ ຊື້ສິນຄ້າເປັນເງິນຕາຕ່າງປະເທດ
- ຫ້າມບຸກຄົນ, ວັດ, ສຳນັກງານ, ອົງການປົກຄອງບ້ານ ກີດຂວາງການຈັດສັນສະຖານທີ່ວາງສະແດງຂາຍສິນຄ້າຂອງຄະນະກຳມະການຈັດງານ.
ສຳລັບນັກສິລະປະຢູ່ໃນງານແຕ່ລະຈຸດ ຕ້ອງນຸ່ງເຄື່ອງສຸພາບຮຽບຮ້ອຍ ໃຫ້ຖືກຕ້ອງຕາມຮີດຄອງປະເພນີ ຕໍ່ກັບຂໍ້ຫ້າມດັ່ງກ່າວຫາກໃຜລະເມີດ ຈະຖືກປະຕິບັດຕາມລະບຽບກົດໝາຍ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: ໜັງສືພິມວຽງຈັນໃໝ່
ຮູບພາບຈາກ: dnqtravel.com