ກະຊວງການເງິນ ເປີດນຳໃຊ້ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ ພ້ອມທັງຈະອອກເລກປະຈຳຕົວຜູ້ເສຍອາກອນ ແລະ ອອກໃບທະບຽນວິສາຫະກິດ ຜ່ານລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ (TaxRis) ລະບົບໃໝ່ ຂອງກົມຊ່ວຍສາອາກອນ ໂດຍເລີ່ມເປີດແຕ່ວັນທີ 5 ເດືອນ ພະຈິກ 2018 ເປັນຕົ້ນໄປ ເຊິ່ງທຳອິດຈະເປີດໃຊ້ໃນ 5 ແຂວງ ແລະ ຕົ້ນປີ 2019 ຢູ່ສ່ວຍສາອາກອນ 2 ແຂວງ ພ້ອມທັງສືບຕໍ່ຂະຫຍາຍໄປບັນດາແຂວງທີ່ເຫຼືອໃຫ້ສຳເລັດພາຍໃນປີ 2019.

ບາງສ່ວນຂອງແຈ້ງການລະບຸວ່າ: ວັນທີ 5 ເດືອນ ພະຈິກ 2018 ເລີ່ມແຈ້ງມອບອາກອນໃນລະບົບໃໝ່ຕາມຮູບແບບການແຈ້ງການແບບໃໝ່ ແລະ ຜູ້ເສຍອາກອນສາມາດແຈ້ງມອບອາກອນດ້ວຍຕົນເອງຜ່ານເວັບໄຊສ໌ http://taxservice.mof.gov.la ເຊິ່ງລະບົບດັ່ງກ່າວຈະໄດ້ນຳໃຊ້ຢູ່ສ່ວຍສາອາກອນປະຈຳ 5 ແຂວງ ຄື: ນະຄອນຫຼວງວຽງຈັນ, ຫຼວງພະບາງ, ວຽງຈັນ, ສະຫວັນນະເຂດ ແລະ ຈຳປາສັກ; ສ່ວຍສາອາກອນປະຈຳ 5 ເມືອງ ຄື: ນະຄອນຫຼວງພະບາງ, ຈັນທະບູລີ, ສີໂຄດຄະບອງ, ໄຊເສດຖາ ແລະ ສີສັດຕະນາກ. ໃນຕົ້ນປີ 2019 ຢູ່ສ່ວຍສາອາກອນປະຈຳ 2 ແຂວງຄື: ບໍລິຄຳໄຊ ແລະ ຄຳມ່ວນ; ສ່ວຍສາອາກອນປະຈຳ 05 ເມືອງຄື: ວັງວຽງ, ປາກຊັນ, ທ່າແຂກ, ນະຄອນໄກສອນພົມວິຫານ ແລະ ນະຄອນປາກເຊ ພ້ອມດຽວກັນນັ້ນ ຍັງມີແຜນຂະຫຍາຍການນຳໃຊ້ລະບົບດັ່ງກ່າວໄປບັນດາແຂວງທີ່ຍັງເຫຼືອໃນຂອບເຂດທົ່ວປະເທດໃຫ້ສຳເລັດໃນປີ 2019.

ຫຼັງຈາກວິສາຫະກິດໄດ້ເລກປະຈຳຕົວຜູ້ເສຍອາກອນ ແລະ ໃບທະບຽນວິສາຫະກິດ ສາມາດດຳເນີນທຸລະກິດໄດ້ຖືກຕ້ອງຕາມລະບຽບກົດໝາຍ ແລະ ພາຍໃນ 90 ວັນ ນັບແຕ່ມື້ອອກໃບທະບຽນວິສາຫະກິດ ໃຫ້ຂຶ້ນມາພົວພັນນຳລັດຖະບານສ່ວຍສາອາກອນ ເພື່ອປະກອບຂໍ້ມູນການແຈ້ງມອບອາກອນ ໃຫ້ຖືກຕ້ອງຄົບຖ້ວນຕາມລະບຽບ ແລະ ກົດໝາຍທີ່ກ່ຽວຂ້ອງ ຖ້າບໍ່ພົວພັນຕາມກຳນົດດັ່ງກ່າວ ຖືວ່າລັດວິສາຫະກິດດັ່ງກ່າວບໍ່ເຄື່ອນໄຫວ ແລະ ຈະຖືກປະຕິບັດຕາມ ມາດຕາທີ 22 ຂອງກົດໝາຍວ່າດ້ວຍວິສາຫະກິດ.

ແຈ້ງການດັ່ງກ່າວ, ສະບັບເລກທີ 3532/ກງ, ລົງວັນທີ 02 ພະຈິກ 2018 ໂດຍອີງຕາມລຳດັດນາຍົກລັດຖະມົນຕີ, ສະບັບທີ 144/ນຍ, ລົງວັນທີ 8 ພືດສະພາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງິນ ເພື່ອຈັດຕັ້ງປະຕິບັດ ແລະ ຫັນການຄຸ້ມຄອງລາຍຮັບສ່ວຍສາອາກອນໃຫ້ທັນສະໄໝ ທັງຊ່ວຍຊຸກຍູ້ຫົວໜ່ວຍວິສາຫະກິດໃຫ້ນຳໃຊ້ລະບົບດັ່ງກ່າວໃນການອອກໃບແຈ້ງມອບອາກອນ ແລະ ໄປມອບອາກອນຜ່ານທະນາຄານໃນຂອບເຂດທົ່ວປະເທດ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ກະຊວງການເງິນ