ຂະແໜງຊັບສິນທາງປັນຍາ, ມາດຕະຖານ ແລະ ການວັດແທກ ແຂວງເຊກອງ ລົງກວດກາຜະລິດຕະພັນສິນຄ້າຫຸ້ມຫໍ່ພາຊະນະບັນຈຸປິດ (ນໍ້າດື່ມບໍລິສຸດ) ທີ່ເມືອງ ທ່າແຕງວັນທີ 31 ຕຸລາ 2018 ທີ່ຜ່ານມາ ເຊິ່ງກວດພົບໂຮງງານນໍ້າດື່ມ 3 ແຫ່ງ ທີ່ບໍ່ຖືກຕ້ອງຕາມຜະລິດຕະພັນສິນຄ້າຫຸ້ມຫໍ່ພາຊະນະບັນຈຸປິດ ແລະ ສັ່ງໃຫ້ເຈົ້າຂອງໂຮງງານນໍ້າດື່ມ ເລັ່ງປັບປຸງໃຫ້ຖືກຕ້ອງຕາມມາດຕະຖານຂອງການຜະລິດນໍ້າດື່ມບໍລິສຸດ ສປປ ລາວ.
ທ່ານ ບຸນປະຄອງ ສິມມາວັດ ຮອງຫົວໜ້າຂະແໜງຊັບສິນທາງປັນຍາ, ມາດຕະຖານ ແລະ ການວັດແທກ ແຂວງເຊກອງ ໃຫ້ຮູ້ວ່າ: ໃນທົ່ວແຂວງ ເຊກອງມີໂຮງງານຜະລິດນໍ້າດື່ມບໍລິສຸດທັງໝົດ 9 ແຫ່ງ; ມີໂຮງງານນໍ້າດື່ມທີ່ເມືອງ ທ່າແຕງ 3 ແຫ່ງ. ຜ່ານການກວດສອບທັງ 3 ໂຮງງານຄື: ໂຮງງານໍ້າດື່ມດອກບົວທອງ ບ້ານ ໂກງຕາຢູນ, ໂຮງງານຜະລິດນໍ້າດື່ມຍອດນໍ້າເຊໂດນ ບ້ານ ທ່າແຕງໃຕ້ ແລະ ໂຮງງານຜະລິດນໍ້າດື່ມກາເຟທອງ ບ້ານ ກາເຟ ເຫັນວ່າບໍລິມາດນໍ້າພາຍໃນຕຸກນໍ້າບໍ່ຖືກຕ້ອງຕາມສະຫຼາກຫຸ້ມຫໍ່ຕຸກ. ດັ່ງນັ້ນ, ຈິ່ງສະເໜີໃຫ້ຜູ້ດຳເນີນທຸລະກິດ ຫຼື ເຈົ້າຂອງໂຮງງານຜະລິດນໍ້າດື່ມ ປັບປຸງເພື່ອໃຫ້ຖືກຕ້ອງຕາມຄວາມເປັນຈິງ.
ທ່ານ ບຸນປະຄອງ ໄດ້ໃຫ້ຮູ້ອີກຕື່ມວ່າາ: ການລົງກວດສອບຄັ້ງນີ້, ໄດ້ປະຕິບັດຕາມຂໍ້ຕົກລົງຂອງລັດຖະມົນຕີກະຊວງ ວິທະຍາສາດ ແລະ ເຕັກໂນໂລຊີ ວ່າດ້ວຍການຄຸ້ມຄອງສິນຄ້າຫຸ້ມຫໍ່ໃນ ສປປ ລາວ ແລະ ວິທີການກວດສອບກໍໄດ້ປະຕິບັດຕາມກົດລະບຽບ-ຫຼັກການຂອງກົມມາດຕະຖານ ແລະ ການວັດແທກ ເພື່ອໃຫ້ມີຄວາມຖືກຕ້ອງ-ຊັດເຈນ ລວມເຖິງການບໍ່ເອົາປຽບກັນລະຫວ່າງຜູ້ດຳເນີນທຸລະກິດກັບຜູ້ຊົມໃຊ້ ແລະ ເຮັດໃຫ້ສັງຄົມມີຄວາມຍຸຕິທຳ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໝັງສືພິມເສດຖະກິດ-ສັງຄົມ
ຮູບພາບຈາກ: http://jclao.com