ກະຊວງຍຸຕິທຳ ເປີດນຳໃຊ້ແອັບກົດໝາຍລາວ ຮູບແບບທີ 3 (Version 3) ແຫ່ງ ສປປ ລາວ ຂຶ້ນໃນວັນທີ 2 ພະຈິກ 2018, ນະຄອນຫຼວງວຽງຈັນ ເພື່ອໃຫ້ທຸກຄົນສາມາດເຂົ້າເຖິງຂໍ້ມູນຂ່າວສານທີ່ເປັນກົດໝາຍຂອງ ສປປ ລາວ ພ້ອມທັງເພີ່ມຄວາມສະດວກ ແລະ ວ່ອງໄວຂຶ້ນຫຼາຍເທົ່າໃນການຄົ້ນຫາຂໍ້ມູນ.

ທ່ານ ເສີມສຸກ ສິມມະວົງ ຮອງລັດຖະມົນຕິ ກະຊວງຍຸດຕິທຳໄດ້ກ່າວຄຳເຫັນໃນງານເປີດນຳໃຊ້ແອັບດັ່ງກ່າວວ່າ: ໃນການສ້າງ, ພັດທະນາ ແລະ ການເຂົ້າເຖິງແຫຼ່ງຂໍ້ມູນຂ່າວສານດ້ານກົດໝາຍ ໄດ້ສ້າງທຸກເງື່ອນໄຂໃຫ້ມີຄວາມສະດວກແກ່ປະຊາຊົນບັນດາເຜົ່າໄດ້ເຂົ້າເຖິງແຫຼ່ງຂໍ້ມູນຂ່າວສານທາງດ້ານກົດໝາຍດ້ວຍຫຼາຍຮູບແບບ ເຊິ່ງແອັບກົດໝາຍລາວນີ້, ໄດ້ເປີດນຳໃຊ້ຢ່າງເປັນທາງການໃນວັນທີ 5 ທັນວາ 2016 ຜ່ານມາ.

ຄຽງຄູ່ກັບການພັດທະນາສື່ເອເລັກໂຕຣນິກໃຫ້ນັບມື້ນັບສົມບູນນັ້ນ, ກະຊວງຍຸດຕິທຳເຫັນວ່າການພັດທະນາແອັບກົດໝາຍເທິງໂທລະສັບມືຖື ມີຄວາມສຳຄັນ ຕາມຄວາມຮຽກຮ້ອງຕ້ອງການຂອງສັງຄົມໃນປັດຈຸບັນ. ດັ່ງນັ້ນ, ຈິ່ງສືບຕໍ່ສ້າງ ແລະ ພັດທະນາແອັບພລິເຄຊັນກົດໝາຍລາວມາເປັນຮູບແບບທີ 3 (Version 3) ເປັນຮູບແບບໂຄສະນາເຜີຍແຜ່ກົດໝາຍທີ່ມີຄວາມທັນສະໄໝ ໃນການຄົ້ນຫາກົດໝາຍເທິງມືຖືເພື່ອອຳນວຍຄວາມສະດວກແກ່ປະຊາຊົນບັນດາເຜົ່າ.

ຮຽບຮຽງໂດຍ: ໃບບົວ ຈັນທະລັງສີ

ແຫຼ່ງຂໍ້ມູນຈາກ: ໜັງສືພິມປະຊາຊົນ